“Biz bunu o zaman edə bilərik ki, Rusiya vətəndaşı, cinayətkar oliqarx, Avropada çirkli pulların yuyulmasında əli olan şəxs - Vardanyan bizim ərazimizi tərk etsin”. Bunu Prezident İlham Əliyev Münhendə "Dağları aşmaq? Cənubi Qafqazda təhlükəsizliyin qurulması" mövzusunda plenar iclasda çıxışı zamanı deyib.
Ölkə başçısının sözlərinə görə, bizim beynəlxalq tərəfdaşlarımızla razılaşdırılıb ki, Qarabağdakı erməni azlığın hüquqları və təhlükəsizliyi ilə bağlı müzakirələr aparılacaq: “Biz bunu etməyə hazırıq, lakin erməni icmasının Qarabağda doğulmuş və bütün ömrü boyu orada yaşamış nümayəndələri ilə, Qarabağda Rusiyadan rəhbər mövqe tutmaq üçün ixrac edilmiş (exported) şəxslə deyil. Qarabağ erməniləri Azərbaycan vətəndaşlarıdır, azlıqdır. Biz Qarabağdakı erməni icmasının nümayəndələri ilə praktiki təmaslara başlamağa hazırıq. Dövlət katibi Blinkenin qarşısında mən Ermənistandan olan həmkarıma bu barədə dedim. Lakin biz bunu o zaman edə bilərik ki, Rusiya vətəndaşı, cinayətkar oliqarx, Avropada çirkli pulların yuyulmasında əli olan şəxs - Vardanyan bizim ərazimizi tərk etsin”.
Bütün bu deyilənlərin fonunda, Vardanyanla bağlı fikirlər Rusiya və Ermənistana net şərt kimi başa düşülə bilərmi?
“Kənardan gələn, desant olaraq Qarabağa atılan Vardanyanla danışıqlardan söhbət gedə bilməz”
Məsələyə münasibət bildirən AVCİYA-nın vitse-prezidenti, professor Məhərrəm Zülfüqarlı hesab edir ki, bu həm Ermənistana, həm də Rusiyaya ünvanlanan konkret şərtdir: “Bu çox cəsarətli və aydın yanaşma idi. Zaman-zaman deyirdilər ki, Azərbaycan Ermənistanla danışıqlar aparır, amma Qarabağdakı erməni icması ilə təmaslar qurulmur. Halbuki, bütün bu münaqişənin başında Rusiyanın müdafiə etdiyi Ermənistan dayanırdı. Ancaq elə ki danışıqlar başlayırdı, o zaman yaxalarını çəkirdilər kənara. Deyirdilər ki, bunu bizlə yox, gedin Qarabağdakı erməni icması ilə razılaşdırın. Əraziləri Ermənistan yox, guya Qarabağdakı etnik ermənilər ələ keçirib. Hər vasitə ilə çalışırdılar ki, Azərbaycan danışıqlarda separatçıları tərəf kimi tanısın. Ancaq Azərbaycan işğal dövründə buna imkan vermədi. Lakin Vətən müharibəsində qələbəmizdən sonra yeni reallıq yarandı. Ermənistan baş naziri Nikol Paşinyan Qarabağın Azərbaycan ərazisi olması ilə demək olar barışır. Əgər buna inanarıqsa, bu, Ermənistanın separatçıları dəstəkləməkdən imtina etməsi anlamına gəlir. Prezidentimiz bəyan edir ki, biz Qarabağda doğulan, orada yaşayan etnik ermənilərlə danışıqlara hazırıq. Ancaq kənardan gələn, desant olaraq Qarabağa atılan Vardanyanla danışıqlardan söhbət gedə bilməz. Kənardan cinayətkar erməniləri Qarabağa doldurmaqla reallıqları dəyişmək mümkün deyil. Azərbaycan buna getməyəcək və Ermənistanla yanaşı Rusiya da bunu qəbul etməlidir. Rəsmi Bakı yalnız Qarabağda doğulan və Azərbaycan vətəndaşı olan ermənilərlə danışıq apara bilər. Onların problemlərini həll edə bilər. O cümlədən, onlara Konstitusiya çərçivəsində öz hüquqlarından istifadə etmələrinə şərait yarada bilər. Yalmız o zaman məsələ həll oluna bulər. Ona görə də Prezident İlham Əliyev bütün dünyaya açıq mesaj vermiş oldu. Ölkə başçısının bu mövqeyi tamamilə yerində verilən bir mesajdır. Biz öz vətəndaşımız olan ermənilərlə danışıqlara hazırıq. Kənardan gətirilən, müəyyən missiya ilə göndərilən şəxslərlə yox”.
Vidadi ORDAHALLI
