Bəşər tarixinin ən dəhşətli soyqırım cinayətlərindən birini ermənilər Azərbaycanın Xocalı şəhərində həyata keçirib. 31 il əvvəl azərbaycanlılara qarşı törədilən genosid aktının hüquqi və siyasi müstəvidə tanıdılması ulu öndər Heydər Əliyevin adı ilə bağlıdır.
Xocalı soyqırımının hüquqi müstəvidə tanıdılması yönündə Heydər Əliyevin başlatdığı iş nəticəsində bu sahədə böyük işlər görüldü. Heydər Əliyev hakimiyyətə gələndən dərhal sonra Xocalı soyqırımının dünyada və ölkə daxildə tanıdılması, dünyanın, cəmiyyətin diqqətinin bu genosidə yönəldilməsi, onun bu faciəyə hüquqi və siyasi qiymətin verilməsi yönündə addımlar atdı.
Bu addımların əhəmiyyəti barədə danışan ekspertlər vurğulayır ki, Heydər Əliyevə qədər bu istiqamətdə işlər görülməyib, yalnız onun hakimiyyətə gəlişindən sonra bu proses canlandırılıb.
Qeyd edilir ki, Heydər Əliyevin təşəbbüsü ilə 1994-cü il fevralın 24-də Azərbaycan Respublikasının Milli Məclisi “Xocalı soyqırımı günü haqqında” qərar qəbul edib, BMT-yə, dünya dövlətlərinə bu qətliamın gerçək mahiyyətini açıqlayaraq, beynəlxalq ictimaiyyəti erməni terrorizminə qarşı təsirli tədbirlər görməyə çağırıb. Ekspertlərə görə, Heydər Əliyevin başlatdığı proses bu gün Prezident İlham Əliyev tərəfindən davam etdirilir, Heydər Əliyev Fondunun da bu istiqamətdə gördüyü işlər genişdir. Xocalı həqiqətlərinin dünya ictimaiyyətinə çatdırılması, onun beynəlxalq aləmdə yayılması, həmçinin bu faciəyə obyektiv qiymət verilməsi istiqamətində Heydər Əliyev Fondunun fəaliyyətini xüsusilə vurğulamaq olar.
Vüqar Rəhimzadə: “Dünyanın bir sıra dövlətləri Xocalı soyqırımını rəsmən tanıyıblar, parlamentləri bununla bağlı qərar qəbul edib”
Yeni Azərbaycan Partiyası (YAP) Xətai rayon təşkilatının sədri, siyasi elmlər doktoru Vüqar Rəhimzadə “Bakı-Xəbər”ə bildirdi ki, Xocalı hadisəsinin azərbaycanlıların genosidi kimi beynəlxalq aləmə çatdırılması istiqamətində görülən işlər bu gün öz nəticəsini verir və artıq neçə ölkə tərəfindən rəsmən soyqırım kimi tanınıb. “Xocalı hadisəsi bəşər tarixində baş verən ən dəhşətli soyqırım cinayətidir. Bütün faktlar, sənədlər, qəbul edilən qərar və qəqnamələr də bunu təsdiq edir. Xocalı soyqırımı dünyada insanlığa, bəşəriyyətə qraşı yönəlik çox ağır cinayətdir. Bu cinayəti törədən erməni quldurlarıdır, cinayətkarlarıdır. Bilirsiz ki, erməni danşakları zaman-zaman Azərbaycan xalqına qarşı soyqırım cinayətləri törədiblər. Xocalı soyqırımına ilk dəfə hüquqi-siyasi qiymət ulu öndər Heydər Əliyev tərəfindən verilib. Bütövlükdə, Azərbaycanda həm Xocalı soyqırımına, həm 20 yanvar faciəsinə hüquqi-siyasi qiymətin verilməsi ulu öndərin təşəbbüsü ilə olub və qanunvericilik orqanları da bunu təsdiqləyib. Bu gün Xocalı soyqırımının dünyada, beynəlxalq arenada genosid kimi tanınmasında kifayət qədər uğurlu addımlar atılıb.. Hesab edirəm ki, Heydər Əliyev Fondu bu proseslərdə, çox fəal şəkildə iştirak edir və bu qurum təkcə regionda deyil, dünyanın bir çox ölkələrində soyqırımla bağlı kitabların təqdimatını keçirir, sərgilər açır. Xocalı soyqırımının dünyada tanıdılmasında Heydər Əliyev Fondu ilə yanaşı dövlət qurumları da kifayət qədər böyük işlər görür. Dünyanın bir sıra dövlətləri Xocalı soyqırımını rəsmən tanıyıblar, parlamentləri bununla bağlı qərar qəbul edib. Bu gün ulu öndərin başlatdığı, təməlini qoyduğu siyasətin dövlətimiz, eyni zamanda Heydər Əliyev Fondu tərəfindən davam etdirilir və Xocalı soyqırımının dünya ictimaiyyəti tərəfindən tanınmasında mühüm rol oynayırlar”.
V.Rəhimzadə qeyd etdi ki, H.Əliyevin başlatdığı bu işi Azərbaycan ictimiayyətinin nümayəndələri də çox yüksək səviyyədə davam etdirirlər. Bunun Azərbaycanın dünyada apardığı vacib siyasət olduğunu deyən V.Rəhimzadə bildirdi ki, bu da ermənilərin hansı xislətə malik olduqlarını, nə qədər böyük cinayət işlətdiklərini sübut edən faktlardan biridir.
Rauf Zeyni: “Xocalı soyqırımının beynəlxalq aləmdə tanıdılması istiqamətində görülən işlərin təməlində ulu öndərin fəaliyyəti, addımları dayanır”
Milli QHT Forumunun prezidenti Rauf Zeyni də bizimlə söhbətində bildirdi ki, bu hadisəyə soyqırım kimi hüquqi-siyasi qiymət verilməsi, onun ilkin olaraq dünya ictimiayyətinə çatdırılması ulu öndərin adı ilə bağlıdır: “Azərbaycan dövlətinin ilkin formalaşdığı dövrdə Xocalı soyqırımına siyasi-hüquqi qiymət verilməsi, eyni zamanda parlamentdə qərarların qəbul olunması, bu soyqırımın dünya ictimiayyətinə tanıtdırılması, ermənilərin ifşa olunması və bütün bunlarla əlaqədar olaraq görülən işlərin hamısının, əlbəttə ki, ilkin təməlində Heydər Əliyevin tarixi xidmətləri var. Bu xidmətləri yüksək səviyyədə Prezident İlham Əliyev davam etdirir. Xocalı soyqırımının dünya ictimaiyyətinə çatdırılmasında “Xocalıya ədalət” beynəlxalq kampaniyasını təşkil etməklə Heydər Əiliyev Fondunun vitse-prezidenti Leyla Əliyeva bu işləri davam etdirir”.
R.Zeyninin sözlərinə görə, Azərbaycan həqiqətlərinin dünyaya çatdırılması, Azərbaycana qarşı törədilmiş işğal, terror və digər bütün hərəkətlərin hüquqi cəhətdən təsbit olunması çox mühüm idi. Azərbaycan xalqının deportasiya tarixinə də o dövrdə ayrıca münasibət olub. O vurğuladı ki, o illərdə Milli QHT Forumu da Heydər Əliyevin başlatdığı işi davam etdirib. Bütün fəaliyyətləri boyu Xocalı soyqırımın dünya ictimaiyyətinə çatdırılması, geniş mənada Azərbaycan həqiqətlərinin yayılması işiilə məşğul olublar. “Xocalı soyqırımının beynəlxalq aləmdə tanıdılması istiqamətində görülən işlərin təməlində ulu öndərin fəaliyyəti, addımları dayanır. Heydər Əliyevin zəngin irsini biz hər zaman araşdırmalıyıq. Xüsusilə də “Heydər Əliyev İli”ndə geniş imkanlar var ki, ulu öndərin xalqımıza miras qoyub getdiyi zəngin irsini araşdıraq, öyrənək, onu layiqincə təbliğ edək” - deyə R.Zeyni vurğuladı.
Leyla QARAXANLI
