Əldə edilmiş razılaşmalar çərçivəsində fevralın 15-də əvvəllər Dağlıq Qarabağa gəlmiş Rusiya Federasiyası vətəndaşlarının təxliyəsi həyata keçirilib. Ümumilikdə 47 nəfər, o cümlədən 8 uşaq çıxarılıb.
Bu barədə Rusiya sülhməramlı kontingentinin teleqram kanalındakı məlumatda deyilir.
Bugünə qədər Qarabağdan 150-dən çox Rusiya vətəndaşı çıxarılıb. Rusiya vətəndaşlarından müraciətlərin qəbulu davam edir, məlumatda qeyd olunub. Qeyd edək ki, fevralın 15-də və 16-da Laçın yolu ilə Qırmızı Xaçın bir neçə avtomobil kolonu və sülhməramlıların yük maşınları keçiblər. Erməni mətbuatının məlumatına görə, fevralın 16-da Qırmızı Xaç Ermənistana səkkiz xəstə aparıb.
Məlumat üçün qeyd edək ki, 12 dekabr 2022-ci ildən Azərbaycan vətəndaş cəmiyyətinin nümayəndələri Şuşa şəhəri yaxınlığında Laçın yolunu bağlayıblar. Aksiya Qarabağ ermənilərinin Azərbaycan qanunlarına məhəl qoymaması ilə əlaqədar başlayıb. Əsasən söhbət keçmiş Ağdərə rayonunda qızıl yataqlarının qanunsuz işlənməsindən gedib. Bundan əlavə, ermənilər 2020-ci il noyabr tarixli üçtərəfli bəyanatı pozaraq Laçın yolundan silah daşıyıblar.
Maraqlıdır, Xankəndidən çıxarılan Rusiya vətəndaşları kimlərdir və kimlər ola bilər? Niyə orada qalıblar və Rusiya vətəndaşlarının orada nə işi var? Onlar Qarabağa hansı məqsədlə gəliblər? Bəlkə onlar diversant və yaxud da “Vaqner” qrupunun üzvləridir ki, ora hansısa məxfi əməliyyat məqsədilə gəliblər?
“Rusiyanın bir sıra planları yolunda getmədiyi üçün onlar oradan çıxarılır”
Sözügedən məsələyə aydınlıq gətirən Demokratik Dəyişim Partiyası Təşkilat Komitəsinin sədri Əli Mustafayevin fikrincə, burada bir neçə versiya var: “Məsələ ondadır ki, 2020-ci ilin noyabrında Rusiya sülhməramlıları Qarabağa yerləşəndə digər qüvvələr də ora gəldi. Belə məlumatlar yayıldı ki, Rusiyanın Fövqəladə Hallar Nazirliyinin əməkdaşları da ora gəlib. O cümlədən, sülhməramlılara xidmət edən digər strukturların da nümayəndələri ora gəlib. Başqa bir tərəfdən, bir ara Kreml Qarabağda “rus icması” oyununu ortaya atdı. Bununla bağlı təbliğat kampaniyasına başladılar. Saxta reportajlar hazırladılar ki, bəs burada ruslar çoxdan yaşayır və s. Hətta Qarabağdakı ermənilərin rus əsgərləri ilə evlənməsi kimi informasiyaları dövriyyəyə buraxdılar. Ola bilər ki, sözügedən məqsədlər üçün ora ruslar gətirilib. Biz nəzərə almalıyıq ki, Rusiya, mümkün olarsa, Qarabağı özünə birləşdirməyə çalışır. Bu baxımdan istisna deyil ki, Rusiya kəşfiyyatına bağlı şəxslər ora köçürülüb. Rusiyanın bir sıra planları yolunda getmədiyi üçün onlar oradan çıxarılır. Çünki Rusiyanın emissarı olan Ruben Vardanyanın planları elə də işə yaramır. Belə məlumatlar var ki, Qarabağ erməniləri ilə Vardanyan arasında qarşıdurma var. Üstəlik, nə Ermənistan, nə də Rusiya Laçın yolunda Azərbaycan QHT təmsilçilərinin aksiyasının bu qədər uzanacağını gözləmirdi. Azərbaycanın yumşaq güc göstərmək siyasəti onların bir sıra planlarını pozdu. Görünür, bütün bunlar Rusiyanı məcbur edir ki, vətəndaşlarını Xankəndidən çıxarsın. Ola bilsin ki, sülhməramlı qüvvələrdə təmsil olunan zabitlərin ailələri də ora yerləşib”.
Bütün hallarda Əli Mustafayev hesab edir ki, rusların Qarabağdan çıxması müsbət tendensiyadır.
Vidadi ORDAHALLI
