İran rejimi xarici qüvvələri, ilk növbədə, təbii ki, İsraili ölkədəki etnik azərbaycanlıların hakimiyyətə qarşı etiraz aksiyalarını dəstəkləməkdə ittiham edir. Bu ittiham İslam İnqilabı Keşikçiləri Korpusunun rəsmi teleqram kanalı vasitəsilə mütəmadi olaraq yayımlanır.
Bu barədə "Yerusəlim Post" qəzetində dərc olunan məqalədə deyilir.
Məqalədə qeyd olunur ki, İrandakı hazırkı gərginliyin mərkəzi Təbriz şəhəridir. Şərqi Azərbaycan əyalətinin inzibati mərkəzi olan bu şəhərdə yaşayan müxtəlif hesablamalara görə təxminən 25 milyon etnik azərbaycanlı İranın əsarətindən xilas olmaq və Güney Azərbaycan adlı ayrıca dövlət yaratmaq istəyir.
İrandakı azərbaycanlıların müstəqillik uğrunda mübarizəsi və bundan fars-molla rejiminin keçirdiyi narahatlığın dünya mediasında işıqlandırılması nəyin əlaməti sayıla bilər?
Cümhuriyyət Xalq Partiyasının sədri Bədrəddin Quliyev “Bakı-Xəbər”ə açıqlamasında bildirdi ki, İran öz ərazisində müstəqil Azərbaycanın qurulacağından olduqca ehtiyat edir: “1991-ci ildən bəri bizim müstəqil olmağımız onları çox narahat edir. Onlar azərbaycanlıların əlindən hakimiyyəti alıb İran adlanan fars sistemi qurublar. 1614 il oradakı bütün proseslərə nəzarəti türklər həyata keçirib. Onlar İsraili bəhanə edib bizimlə türk düşmənçiliyini aparırlar. Əslində yəhudilərə ən yaxın olan elə farsların özüdür. Sadəcə, dini dünyagörüşləri fərqlidir. İran hər zaman dini pərdə altında mübarizə aparıb. Ordakı azərbaycanlıları da milli kimlikdən uzaqlaşdırıb, dini kimliyə keçirmək istəyirlər. Əvvəlllər isə din pərdəsi altında xilafət uğrunda mübarizə aparıblar. Bu yöndə də çox vaxt türkləflə qarşı-qarşıya gəliblər. Təəssüflə qeyd etməliyik ki, İrandaxili proseslərdə Rusiya bir çox hallarda bizim soydaşlarımızdan öz məqsədləri üçün istifadə edib. Son nəticədə ingilislərlə farslar birləşib bizi kənarda qoyublar. İndi isə Rusiya İranla yaxın dostdur. İranın gələcəyi ilə bağlı layihələr ortaya çıxıb. Həmin ölkəni 5 yerə parçalamaq istəyirlər. İran türklərinin yaradacağı dövlətin də adı bu layihədə var. İran türkləri heç də məqalədə qeyd edildiyi kimi 25 milyon deyil. Onların sayı 55 milyondur. İrana edilən hava hücumları göstərdi ki, istənilən vaxt həmin ölkəni hədəfə almaq mümkündür. İndidən bu prosesi boğmaq istəyirlər. Xoydakı zəlzələ zamanı heç kimi ora buraxmadılar. Fakt odur ki, milli azadlıqla bağlı proseslər gedir. Hazırda Rusiya ilə Ukraynanın apardığı müharibədə Moskvanın arxa cəbhəsi İrandı. Buna görə də Rusiyanın düşmənləri İranın nəfəsini kəsməkdə çox maraqlıdırlar. Bu da İranın parçalanmasını sürətləndirəcək. İran başına gələcək prosesləri indidən qabaqlayıcı addımlar atır. Səfirliyimizə edilən terroru da bu qəbildən saya bilərik. İslama terror yaraşmaz. Ancaq İslam adını mənimsəmiş ölkə bu istiqamətdə əlindən gələni edir. Milli mübarizəni dəstəkləyən güclü beynəlxalq koalisiya yaranıb. Ermənistanla sülh sazişi imzalanandan sonra Zəngəzur dəhlizi işləyəcək və bölgədə yeni siyasi situasiya yaranacaq. Belə olan halda, İranın vəziyyəti daha da pisləşəcək. İran sərsəm iddialarını kənara qoyub, normal qonşuluq da apara bilər. Onun yeni layihələrə qoşulmaq şznsı da var. Dünyaya meydan oxumaqda davam edəcəksə, ciddi beynəlxalq təzyiqlərlə üzləşəcək. Belə təzyiqlərdən ən güclüsü İran daxilindəki azərbaycanlıların müstəqil olması üçün mübarizənin alovlandırılmasıdır.
Artıq bunun qığılcımları var. Beynəlxalq medianın da prosesə informasiya dəstəyi verəcıyinə qəti şübhə ola bilməz”.
Məhəmmədəli QƏRİBLİ
