Rusiyanın əsasən erməni maraqlarından çıxış edən müəyyən media resursları davamlı olaraq pozucu xarakterli məlumatlar, təhlillər yayır. Çox qəribədir ki, sözügedən media resursları İranın Zəngəzur dəhlizinə qarşı olan mövqeyini böyük həvəslə dəstəkləyirlər. Baxmayaraq ki, Rusiya bu dəhlizin açılmasında maraqlıdır.
Bütün bunlar azmış kimi, Rusiya mediası İranı Zəngəzur dəhlizinə qarşı kökləmək üçün bir sıra vasitələrdən istifadə edir. Qeyd edilir ki, İran-Ermənistan yaxınlaşmasından bəzi region dövlətləri narahatdır. Bu media resurslarında İranın Ermənistandakı səfiri Abbas Bədəxşan Zohurinin bu günlərdə Zəngəzur dəhlizinin yaradılmasına imkan verilməyəcəyi ilə bağlı səsləndirdiyi fikirlərə xüsusi yer verilib: “Dəhliz deyərkən Zohuri Azərbaycan və Türkiyənin irəli sürdüyü Zəngəzur dəhlizini nəzərdə tuturdu. Bakı və Ankaranın planlarına görə, Naxçıvan muxtariyyətini Azərbaycanın qalan hissəsi ilə birləşdirmək üçün bu dəhliz erməni Sünikindən keçməlidir. Xüsusilə vacib olan Türkiyə-Azərbaycan tandeminin “Zəngəzur dəhlizi”ni Ermənistanın nəzarətindən kənarda və ekstraterritorial etmək istəyidir. Və 2022-ci ildə Sünikdə Qafan şəhərində İranın Baş Konsulluğu açıldığı üçün məlum olur ki, İslam Respublikasının sözləri əməldən fərqlənmir. İran hakimiyyətinin Sünik və bütün Ermənistan məsələsində məntiqi tamamilə başadüşüləndir. Bu hadisənin arxasında İranın Azərbaycanın düşmənçilik siyasətini nəzərə alaraq Zaqafqaziya siyasətini korrektə etmək istəyi dayanır. Görünən odur ki, yeni reallıqlar İranı nəinki Ermənistanın güc dairələri ilə, bütövlükdə Ermənistan cəmiyyəti ilə işləyərək peşəkar fəaliyyət göstərməyə çalışmağa vadar edib”.
“Məhz sözügedən dairələrə yaxın olan media resursları davamlı olaraq bununla bağlı materiallar dərc edirlər”
Məsələyə münasibət bildirən Böyak Azərbaycan Partiyasının sədri Elşad Musayevin fikrincə, Rusiya hakimiyyətində Türkiyə ilə münasibətlərin qurulmasının əleyhinə olan dairələr Zəngəzur dəhlizinə qarşı belə mövqedən çıxış edirlər: “Rusiyanın əsas marağı odur ki, şərqdən gələn nəqliyyat xətləri bu ölkənin ərazisindən keçsin. Bu baş vermirsə, o zaman bu xətlərə müəyyən nəzarəti təmin etsin. Rusiyanın əsas maraqları bundan ibarətdir. Zəngəzur dəhlizi Rusiya üçün sonrakı sırada gəlir. O şərtlə ki, dəhlizin Ermənistandan keçən hissəsinə Rusiya nəzarət etsin. Biz onu da nəzərə almalıyıq ki, Rusiya hakimiyyəti daxilində müxtəlif qruplar var və bunların da öz maraqları var. Hakimiyyətdə ermənilərin maraqlarından çıxış edən qrup Türkiyə ilə münasibətlərin qurulmasına qarşıdır. Onlar Zəngəzur dəhlizinə qarşıdılar. Məhz sözügedən dairələrə yaxın olan media resursları davamlı olaraq bununla bağlı materiallar dərc edirlər. Onlar yaxşı bilirlər ki, İran regionda Türkiyənin güclənməsini istəmir. Məhz bundan çıxış edərək İranın Zəngəzur dəhlizi ilə bağlı tutumunu daha da sərtləşdirmək üçün səylər göstərirlər. Ancaq Rusiya hakimiyyətində Türkiyə ilə münasibətlərin yaxşılaşmasını istəyən dairələr də var. Onlar hesab edir ki, iki ölkə arasında əlaqələrin genişlənməsi hər iki tərəfə fayda gətirəcək. Ancaq problem ondadır ki, Rusiya-İran-Ermənistan birliyi üzərində siyasət qurulmasını istəyən qüvvələr daha ağırlıqlı mövqeyə malikdilər. Hakimiyyətin müxtəlif qollarında fəaliyyət göstərirlər. Daha çox İranla işləməyə üstünlük verirlər. Sadəcə, Ermənistanda Qərbin maraqlarından çıxış edən Paşinyan hakimiyyəti onların planlarının tam reallaşmasına imkan vermir. Ona görə də nəticə etibari ilə biz onu gözləməliyik ki, bu prosesləri Azərbaycanla Türkiyə birlikdə həll etsin. Kimsə gəlib bizim əvəzimizə həll etməyəcək. Azərbaycanda 5-ci kalon nümayəndələri deyir ki, Ermənistanla Rusiyanın münasibətləri korlanıb. Bu səbəbdən Rusiya Azərbaycana kömək edəcək. Əsla belə deyil və Rusiya bizə kömək etməyəcək. Sadəcə, biz Ermənistanla Rusiyanın münasibətlərinin korlanmasından maksimum istifadə etməliyik. Ancaq bütün hallarda biz Rusiyanın siyasətini bilməliyik. Rusiya üçün Azərbaycanın və ya Ermənistanın güzəştə getməsinin heç bir əhəmiyyəti yoxdur. Moskva üçün əsas odur ki, Rusiya regionda pərçimlənib otursun. Paşinyanın məlum addımları Rusiyanı qıcıqlandırır və biz bundan istifadə etməliyik. Lakin Rusiya hər zaman Ermənistana forpost gözü ilə baxacaq”.
Vidadi ORDAHALLI
