Ermənistan Təhlükəsizlik Şurasının katibi Armen Qriqoryan İrəvanda keçirilən brifinqdə sülh danışıqları ilə bağlı bir sıra məsələlərə toxunub.
A.Qriqoryan bəyan edib ki, Ermənistan Qarabağ və Bakı arasında danışıqların beynəlxalq mexanizm çərçivəsində aparılmasına tərəfdardır: “Və bu mexanizm hazırda Ermənistan və Azərbaycan tərəflərinin üzərində işlədikləri sülh müqaviləsində qeyd oluna bilər. Ermənistan Stepanakertlə Bakı arasında danışıqların beynəlxalq - görünən mexanizm çərçivəsində aparılmasına tərəfdardır. Ermənistan bu mexanizmin işləməsi üçün öz beynəlxalq tərəfdaşları ilə işi davam etdirir. Bu mexanizm sülh müqaviləsində nəzərdən keçirilə bilər ki, danışıqlar buna əsasən aparılır. Bu, digər beynəlxalq strukturlar və ya başqa bir format ola bilər. Hələlik konkret deyil, bu müzakirə mövzusudur, aydın olması üçün müzakirəni davam etdirməliyik. Ermənistanın yanaşması əvvəlkitək ondan ibarətdir ki, Dağlıq Qarabağ ermənilərinin hüquqları və təhlükəsizliyilə bağlı danışıqların aparılması üçün beynəlxalq səviyyədə görünən danışıqlar mexanizmi yaradılmalıdır”.
Görünən odur ki, Ermənistan əsas diqqəti Qarabağdakı ermənilərin hüquqları və təhlükəsizliyi ilə bağlı beynəlxalq mexanizmin yaradılmasına yönəldərək pozucu mövqedən çıxış edir. O baxımdan ekspertlər bunu necə dəyərləndirir?
“Bu, yalnız iki ölkə arasındakı danışıqlarda istifadə oluna bilər”
Məsələyə münasibət bildirən “SƏS” Media Qrupunun rəhbəri, politoloq Bəhruz Quliyevin fikrincə, bu, Ermənistanın növbəti pozuculuq taktikasıdır: “Armen Qriqoryanın fikirlərindən ilk olaraq belə nəticə çıxarmaq olar ki, əslində bu şəxs təmsil olunduğu hökumətin növbəti dəfə Azərbaycanın daxili işlərinə qarsıması fonunda çıxış edir. Daha dəqiq desək, Qarabağın Azərbaycanın ayrılmaz tərkib hissəsi olması ilə yanaşı, orada yaşayan qarabağlı ermənilər də bilavasitə ölkəmizin vətəndaşlarıdırlar. Bu baxımdan, onun Ermənistan hökuməti adından Qarabağ və sakinləri ilə bağlı hər hansı bir bəyanatı ciddiyə alınmamalıdır. Çünki artıq danışıqlar mexanizmi müəyyənləşdirilib və hazırkı dövrə qədər müxtəlif formatlarda danışıqlar aparılsa da, rəsmi İrəvan hələ də sülhün əldə edilməsi prosesini ləngidir. Əlbəttə ki, belə ləngitmələr son etibarı ilə hər hansı müsbət nəticələrə gətirib çıxarmır. Yaxşı olardı ki, A.Qriqoryan Ermənidtandakı vəziyyətdən narahat olsun və vətəndaşlarının, eləcə də ölkəsinin təhlükəsizliyi barədə hər hansı fikir bildirsin”.
Politoloq hesab edir ki, Ermənistan Fransanın təkidi ilə bu addımları atır: “Əgər Qriqoryan beynəlxalq mexanizmlərin işə salınmasından bəhs edirsə, burada da problemlərin məhz Ermənistan tərəfindən yaradıldığını deyə bilərik. Əgər bu gün Ermənistan öz yerini müəyyən edə bilmirsə, yaxud Aİ-nin missiyasına fransız jandarmlarını daxil edirsə, o cümlədən, digər şübhəli məqamlara yol verirsə, üstəlik regiondakı əzəli aktorlardan imtina edirsə, bu zaman İrəvanın hər hansı ciddiyyətindən danışmaq olmaz. Ona görə də düşünürəm ki, yaxşı olardı Ermənistan hökumətinin təmsilçiləri Qarabağdakı erməni vətəndaşlarımızla bağlı fikir yürütmək yerinə öz vəziyyətini müzakirə etsin və nəticələr çıxarmağa çalışsın. Beynəlxalq mexanizm isə yalnız iki ölkə arasındakı danışıqlarda istifadə oluna bilər. Bu mexanizmlərin Qarabağla əlaqələndirilməsi yolverilməzdir”.
Vidadi ORDAHALLI
