Rəsmi Tehran İrandakı səfirliyimizə qarşı terror aktının törədilməsini hələ də etiraf etmir. Onlar sözügedən qanlı hadisəni güya məişət zəminində baş verən hadisə kimi yozmağa çalışırlar.
Azərbaycan tərəfi isə əlində olan dəlilləri ortaya qoyaraq, baş vermiş hadisənin birmənalı şəkildə terror olduğunu iddia edir. Artıq bizim qənaətimizi tam neytral olan ölkələrin ekspertləri də bölüşür. Latviya silahlı qüvvələrinin istefada olan baş zabiti Eynars Qraudins bildirib ki, İran hakimiyyət orqanlarının səssiz razılığı olmadan onun paytaxtında başqa bir dövlətə qarşı terror aktı törətmək mümkün deyil: “Azərbaycanın İrandakı səfirliyinə hücum, şübhəsiz, terror aktı idi. Burada hələ aydınlaşdırmaq lazımdır ki, razılıq səssiz olub, yoxsa terror aktında hakimiyyət fəal iştirak edib”.
Neytral beynəlxalq ekspertlərin bu rəyləri qarşısında İran hakimiyyəti nə deyəcək?
Təhlükəsizlik məsələləri üzrə ekspert Elşən Həsənov “Bakı-Xəbər”ə açıqlamasında bildirdi ki, dövlət başçısı İlham Əliyev Azərbaycanın İrandakı səfirliyinə edilən silahlı hücumu hadisə baş verən ilk gündən terror adlandırıb: “Bunun üçün əldə əsaslı dəlillər, hadisənin videogörüntüləri var.
İran hüquq-mühafizə orqanların hadisəyə laqeydliyi, polisin hadisənin məişət zəminində olmasını iddia etməsi və cinayətkarın hadisənin ilk günündə mediaya müsahibələr verməsi terror aktının planlı olduğunu göstərir. Bütün faktlar hadisənin məişət zəminində baş vermədiyini təsdiq edir. İran beynəlxalq hüququ ciddi şəkildə pozub və məlum hadisə onun Azərbaycana qarşı düşmən mövqeyinin göstəricisidir. Özünü din qardaşı kimi təqdim edən İran həmişə Ermənistanla həmrəy olduğunu nümayiş etdirib. Ötən əsrin 90-cı illərində ərazilərimiz işğal olunan dövrdə, 44 günlük Vətən müharibəsində və bu günlərdə İran düşmənlərimizə, erməni təcazüvkarlarına dəstək olur, maddi və mənəvi yardım edir. Təqdim edilən videokadrların xronoloji ardıcıllığından görünür ki, hadisə yerinə gələn İran polisi terrorçuya heç nə etmir. Sonra onu əli silhalı hadisə yerində buraxaraq, oranı tərk edir. Bundan sonra terrorçu təkrarən səfirliyin binasına hücum edir. Bütün bunlar İran dövlətinin terrorda əlinin olduğunu sübut edən mötəbər dəlillər sayılır. Bizim səfirliyimiz baş verən terrordan əvvəl İran dövlətinə müraciət etmişdi ki, onların təhlükəsizliyi lazımi şəkildə təmin edilsin. Çünki səfirlik əməkdaşları açıq şəkildə təhdid edilirdi. İran dövləti isə üzərinə düşən beynəlxalq öhdəlikləri belə yerinə yetirməkdən boyun qaçırdı. Sonda isə terrora əl atdılar. Bunun əlavə isbata ehtiyacı yoxdur. Səfirliyin önündə baş verənlərdən açıq görünür ki, terrorçuya öz əməlini yerinə yetirmək üçün şərait yaradıblar. Hətta terrorçunun əli ilə polisə müəyyən jestlər etdiyi də görünür. Polis də öz vəzifə funksiyalarını yerinə yetirmək əvəzinə, terrorçunun komandalarına tabelik nümayiş etdirir. Onların planı hamını, hətta diplomatların ailələrini belə qətlə yetirmək olub. Burada mütəşəkkil bir dəstənin əməli həyata keçirilib”.
Ekspertin sözlərinə görə, Azərbaycan tərəfinin əlində olan dəlilləri izləyən sadə vətəndaş belə, nəyin nə olduğunu aydın görə bilər: “Bunun üçün heç də peşəkar istintaqçı olmaq lazım deyil. Bunu görən beynəlxalq ekspertlərin hadisəni terror kimi təsnifatlandırması təbiidir və gözləniləndir. Çünki həmin hadisəyə başqa ad vermək olmur. Mən əminəm ki, belə beynəlxalq rəylərin sayı durmadan artacaq. Təəssüf ki, qapalı ölkə olan İran çox vaxt beynəlxalq rəyi nəzərə almır və öz mahiyyətinə uyğun davranış ortaya qoyur”.
Məhəmmədəli QƏRİBLİ
