Türkiyədə baş vermiş zəlzələni biz öz kədərimiz, öz dərdimiz kimi qəbul edirik. Bunun ən gözəl nümayişi ondan ibarətdir ki, bu gün Azərbaycanın hər bir bölgəsindən insanlar dayanmadan evlərindən hansısa bir məntəqələrə yardım gətirirlər. Kimisi əynindən isti geyimini gətirərək dəstəyini nümayiş etdirir.
Trend xəbər verir ki, bu sözləri Azərbaycanın xarici işlər naziri Ceyhun Bayramov Kahramanmaraşda türkiyəli həmkarı Mövlud Çavuşoğlu ilə keçirdiyi mətbuat konfransında deyib.
Bu gün minlərlə könüllünün Azərbaycandan Türkiyəyə gəlmək istədiyinə diqqət çəkən nazir bildirib: “Onların bu gün buraya gəlməməyinin tək bir səbəbi ondan ibrətdir ki, bu, çox çətin əməliyyatdır. Burada bütün qurumlararası bir koordinasiya olmalıdır. Həddindən artıq çox insanın bir yerə toplaşması o demək deyil ki, dərhal onlar bir işə töhfə verəcəklər. Yalnız bu səbəbdən könüllülərin zəlzələ bölgəsinə planlı şəkildə gəlməsi üzərində iş gedir. Bu gündən etibarən Azərbaycandan olan könüllülər də hissə-hissə Türkiyəyə gələcək, onlar da bu əməliyyatlara qatılacaqlar.
C.Bayramov bildirib ki, zəlzələdən irəli gələrək hər məqamın özünün prioritetləri var. Hazırda əsas prioritet insanları xilas etmək, yaralılara kömək göstərməkdir və növbəti mərhələdə bu bölgələrin hamısını yenidən həyata qaytarmaq olacaq. Bununla bağlı olaraq Prezident Rəcəb Tayyib Ərdoğan artıq bir zaman mesajı da verdi ki, bir il ərzində Türkiyə bunun öhdəsindən gələcək.
“Biz əminik ki, qüdrətli Türkiyə dövləti bunun öhdəsindən gələcək. Azərbaycan dövləti adından Prezident İlham Əliyev bunu artıq bəyan edib ki, biz ilk dəqiqələrdən, ilk saatlardan türkiyəli bacı və qardaşlarımızın yanında olmağımızla bərabər, bütün bu proseslərdə, o cümlədən bərpa-quruculuq işlərində də Türkiyənin yanında olacağıq”, - deyə Ceyhun Bayramov vurğulayıb.
