Avropa Parlamenti də daxil olmaqla, beynəlxalq qurumların əksəriyyəti sanki Ermənistanın, ermənilərin maraqlarını təmin etmək, onların xeyrinə qərar çıxarmaq üçün fəaliyyət göstərirlər. Bütün hallarda yaranan təəssürat budur. Avropa Parlamenti adlanan qurumun müəyyən deputatları, 2023-cü ilin yeni başlamasına baxmayaraq, Azərbaycana qarşı qərəzli mövqelərini sərgiləməyə başlayıblar. Erməni mediası iki gündən bir xəbər yayır ki, Avropa Parlamenti “Azərbaycanın əleyhinə qətnamə qəbul edib”. Bu da adamda belə rəy formalaşdırır ki, bu qurumun ayrı-ayrı ölkələri təmsil edən deputatlarının yeganə vəzifəsi Ermənistan tərəfindən təqdim edilən absurd, heç bir əsası olmayan müraciətlərə “siyasi qiymət” verməkdir. Belə olmasaydı, erməni mediası Avropa Parlamentinin adından verilən dürlü-dürlü “qətnamələri” tirajlamazdı.
Hər kəsə aydındır ki, Avropa Parlamenti ermənipərəst qüvvələrin işğalı altındadır, belə olmasaydı saxta, riyakar, ikiüzlü siyasətin şahidi olmazdıq. Bu həmin Avropa Parlamentidir ki, Ermənistan Azərbaycanın ərazi bütövlüyünü pozarkən, torpaqlarımızı işğal edərkən səsini belə çıxarmadı, yenə də ermənipərəst mövqeyini göstərdi. Bu gün də o yoldadır.
Erməni mediası yenə də “Avropa Parlamenti Azərbaycanı qoşunlarını Ermənistan ərazisindən çıxarmağa çağırıb” kimi absurd məlumatlar yaymaqdadır.
Qeyd edilir ki, Xarici Əlaqələr Komitəsinin hazırladığı və Aİ-nin Ermənistanla münasibətləri ilə bağlı cümə axşamı hesabat qəbul edilib. Erməni mediasının təqdim etdiyi məlumatdan açıq görsənir ki, yeni hesabatda da Avropa Parlamentinin deputatları Azərbaycana qarşı əsassız tələblər irəli sürüb. Avropa Parlamentinin Ermənistanla bağlı qəbul etdiyi hesabatda Azərbaycana qarşı qərəzli fikirlər qeyd olunub ki, guya 2022-ci ilin sentyabrında Azərbaycan Ermənistana “geniş miqyasda hərbi hücum edib”, bunlar onu “pisləyirlər”. “Bu isə əvvəlki sülh səylərini pozur və Azərbaycan qüvvələrinin Ermənistanın suveren ərazisini işğal etməsi ilə nəticələnir” kimi absurd ifadələrin yer aldığı kağız parçasında Azərbaycanla bağlı həqiqətəuyğun olmayan iddialara yer verilib. Azərbaycanı “təcavüzkarlıqda” ittiham edən deputatlar özlərinin daim təcavüzkarın - Ermənistanın yanında dayandıqlarını unudurlar. Hesabatda Azərbaycan hakimiyyətini “Ermənistan ərazisinin bütün ərazilərindən qoşunlarını çıxarmağa” çağıran Avropa Parlamentinin bu deputatları bəs niyə bir dəfə Qarabağdan, Azərbaycanın süveren ərazilərindən Ermənistanın qanunsuz silahlı dəstələrinin çıxarılmasını, separatçıların zərərsizləşdirilməsini tələb etmir? Təşkilat obyektiv, qərəzsiz olduğunu göstərmək istəyirsə bu tələbi irəli sürsün. Bunlar elə danışırlar ki, guya sülhə Azərbaycan “ziyan” vurur, Ermənistan isə sülhün yaranması üçün “dəridən-qabıqdan çıxır”. Qarabağda yaşayan ermənilərin hüquqlarının və təhlükəsizliyinin “qorunmamasından” da “narahat olan” parlamentarilər həm Ermənistanın suveren ərazilərinin, həm də sepratçıların qeydinə qalırlar. Heç bir əsas olmadan erməni fitnəsinə uyub bu kimi mənasız, çəkisiz, dəyərsiz iddialarda bulunurlar. Bu hesabatın bütövlükdə Ermənistanla bağlı qəbul edildiyi deyilir, əlbəttə, ənənələrinə sadiq qalıb burada Azərbaycana qarşı da iddialarını səsləndirməyi yaddan çıxarmayıblar.
Özü də yazırlar ki, guya bu hesabatın lehinə 55 nəfər səs verib, əleyhinə çıxan olmayıb, 5 nəfət bitərəf qalıb. Deyəsən, bu hesabat elə məhəlli səviyyədə 50-55 ermənipərəstin iştirakı ilə qəbul edilib.
“Bu parlamentdəki siyasətçilərin hədsiz acgözlüyü erməni lobbisinin rahat bir formada onları tora düşürməsinə səbəb olur”
Mövzuya şərh verən politoloq Tural İsmayılov baki-xeber.com-a bildirdi ki, Avropa Parlamentinin ermənipərəst mövqeyi bizim üçün təəccüblü deyil. “Bütövlükdə nəzərə almaq lazımdır ki, guya dünyaya ən demoktatik siyasi institutlardan biri kimi təqdim edilən Avropa Parlamenti özlüyündə çirkli pulların, korrupsiyanın, həmçinin lobbiçi dairələrin əlində oyuncağa çevrilən məkan halına gəlib. Avropa Parlamenti ətrafında baş verən rüşvət və korrupsiya hadisələri, eyni zamanda erməni lobbisinin bu gün bu parlamentə təsir göstərmək üçün siyasətçiləri ələ alması həqiqətdir, reallığı əks etdirir. Avropa Parlamentinin ermənipərəst mövqeyinin dəfələrlə şahidi olmuşuq. Bundan əvvəl də bu təşkilatın qəbul etdiyi “bəyanatlarda”, hazırladığı “hesabatlarda” hər zaman ölkəmiz əleyhinə həqarət və reallığı əks etdirməyən məlumatlar yayılıb. Hesab edirəm ki, Avropa Parlamentinin Ermənistanla bağlı hesabatında məhz Azərbaycanın hədəfə alınması, ölkəmiz barədə absurd iddialar səsləndirilməsi bu qurumun riyakarlığını bir daha ortaya qoymuş oldu. Hesabatın Azərbaycana aid etdikləri hissəsi tamamilə qərəzlidir, əsassızdır, ermənipərəst mövqeyi ifadə edir. Bu parlamentdəki siyasətçilərin hədsiz acgözlüyü erməni lobbisinin rahat bir formada onları tora düşürməsinə səbəb olur”.
Politoloqun sözlərinə görə, nəzərə almaq lazımdır ki, yüzlərlə ekofəalın iki aydır Laçın yolunda ekoloji məsələlərlə bağlı səsləndirdiyi fikirləri görməzdən gələn Avropa Parlamentinin bu gün hansısa Xankəndi və ətrafındakı separatçıların çağırışları ilə hərəkətlər etməsi bütövlükdə Qərb siyasi institutlarına olan etimadı tamamilə yoxa çıxarır. “Bu da lobbiçilik maraqlarının beynəlxalq hüquqdan daha üstün sırada dayandığı ilə bağlı ictimai rəyi gücləndirir”-deyə T.İsmayılov qeyd etdi.
İradə SARIYEVA
