İrandan Azərbaycana yönəlik təhdidlər müxtəlif formalarda özünü göstərməkdədir. Proseslərin gedişi göstərir ki, bununla bağlı hədələr azalmır və ara-sıra səslənir.
Bu arada İranın teleqram kanallarının yaydığı məlumata görə, “Hüseyniyyun” təşkilatının (İslami Müqavimət Hərəkatı) üzvləri, o üzvlər ki, molla rejimi tərəfindən himayə olunur, gizlədilir, Azərbaycanda bəzi tanınmış şəxsləri hədələyiblər. Jurnalistləri Əli Xamneini təhqir etməkdə ittiham edən radikal dini qruplaşma onların cəzalandırılacağı barədə xəbərdarlıq edib. Sözügedən qrup Azərbaycan hökumətindən buna görə üzr istəməsini və hər iki jurnalisti cəzalandırmasını tələb edib.
Yeri gəlmişkən onu da qeyd edək ki, bu hədələri səsləndirənlər Azərbaycanda müəyyən cinayətlər törətmiş və İrana sığınan adamlardır. Vaxtilə Prezident İlham Əliyev çıxışlarının birində qeyd edib ki, İran Azərbaycanda cinayət törədib qaçmış adamları himayə edir. Konkret Gəncə hadisələrində iştirak etmiş şəxslər ora sığınıb. Azərbaycan dəfələrlə konkret adlarla onları istəyib, amma İran vermir. İndi onlar “Hüseyniyyun” təşkilatında birləşib, Azərbaycan Prezidentinin mətbuat katibi Azər Qasımov və jurnalist Əflatun Amaşovu hədələyiblər.
“Heç nədən çəkinmədən mətbuat nümayəndələrini ölümlə hədələyirlər, Azərbaycandan qaçan terrorçulara sığınacaq verirlər”
Məsələyə münasibət buldirən AVCİYA-nın vitse-prezidenti, professor Məhərrəm Zülfüqarlının fikrincə, bütün bunlar bir daha onu göstərir ki, İran dövlət səviyyəsində terroru, terrorçuları himayə edir: “1979-ci ildə İranda hakimiyyətə gələn molla rejimi böhran keçirir. İranın öz daxilində də ziddiyətlər güclənib. Orada hakimiyyət daxilində bir neçə qruplaşma var. Onlar hərəsi öz mənafeyinə uyğun hərəkət edir. Dövlətin, millətin mövqeyi kənarda qalır. Adətən böhran keçirən rejimlər xalqın başını digər məsələlərə qatır. Bu minvalla qonşu dövlətləri terrorla təhdid edirlər. Xalqın diqqətini ölkə daxilindəki sosial problemlərdən yayındırmaq istəyirlər. Ölkədəki problemlərin kökünü rejimdə deyil, guya kənar qüvvələrdə axtarırlar. Tarix boyu belə olub və indi də İran rejimi bundan sui-istifadə edir. Təhqirə qalanda, onların qəzetləri, televiziyaları çox səviyyəsizdir. Bu da molla rejimini daha da biabır edir. “Hüseyniyyun” təşkilatının üzvlərinin Qasimov və Amaşova yönəlik təhdidləri bir daha onu göstərir ki, İran dövlət səviyyəsində terroru dəstəkləyir. Səfirliyimizə hücum bunun əyani göstəricisi idi. Məlum oldu ki, İran rejimi birbaşa o terrorun təşkilində maraqlı olub. Bunun qarşısını almaq üçün hansısa tədbir görməyib. Sonradan isə nağıllar danışmaqla terroru pərdələyib. Gör bunlar nə gündədilər ki, açıq formada terrorçuları təbliğ edirlər. Heç nədən çəkinmədən mətbuat nümayəndələrini ölümlə hədələyirlər. Azərbaycandan qaçan terrorçulara sığınacaq verirlər”.
Vidadi ORDAHALLI
