Erməni yalanlarının miqyası heç bir çərçivəyə sığmır. Ermənistan Xarici İşlər Nazirliyinin (XİN) sözçüsü Vaan Hunanyan bəyanat verib ki, guya son vaxtlar Azərbaycan BMT strukturlarına qarşı terror və təzyiq metodu seçib ki, qurum Azərbaycanla bağlı heç bir qərar qəbul edə bilməsin.
Erməni rəsmisi bununla bağlı “arqumentlərini” belə əsaslandırmağa çalışıb: “Azərbaycan BMT-nin insan hüquqlarına dair fundamental sənədlərinin üzvü olmaqla onları kobud şəkildə pozur, BMT orqanları tərəfindən ona verilən göstərişləri nəzərə almır. BMT-nin mandat sahibləri (xüsusi məruzəçilər və müstəqil ekspertlər) kimi insan hüquqlarının təmin edilməsinə nəzarət edən vacib orqanları ilə əməkdaşlıq etmir. Azərbaycan son vaxtlar BMT strukturlarını insan hüquqlarının kobud şəkildə pozulması barədə danışmamağa məcbur etmək üçün onlara qarşı hədə-qorxu və təzyiqlərdən istifadə edib. Üstəlik, hətta BMT-nin əvvəllər verdiyi bəyanatları yenidən redaktə edib. Bütün bunların Laçın dəhlizinin bağlanması, Dağlıq Qarabağ əhalisinin mühasirədə saxlanması ilə bağlı bəyanatlar kontekstində şahidi oluruq”.
Bu dərəcədə yalan olar? Azərbaycan BMT təmsilçilərini hədələsəydi, onlar bunu hansısa formada deyərdilər. Olmayan bir hadisəni uydurmaqda məqsəd nədir?
“İmkanlarımız çərçivəsində səylərimizi artırmalıyıq və erməni yalanlarını ifşa etməliyik”
Məsələyə münasibət bildirən Aydınlar Partiyasının sədr müavini Qorxmaz İbrahimlinin fikrincə, hansı statusda olmalarından asılı olmayaraq, ermənilərin barəmizdə səsləndirdiyi yalanlardan təəccüblənmək lazım deyil: “İstər rəsmi şəxs olsun, isdərsə də qeyri-rəsmi şəxs olsun. Onlar hər zaman Azərbaycanla bağlı ağlagəlməz yalanlarla çıxış edirlər. Bu baxımdan Ermənistan XİN rəsmisi V.Hunanyanın səsləndirdiyi fikirlər iftiradır. Kimlərisə terrorizə etmək Ermənistana xas olan xüsusiyyətdir. Belə məsələlərin Azərbaycanla heç bir bağlılığı yoxdur. Ona görə də biz heç vaxt erməni təbliğatının arxasınca düşməməliyik. Öz doğru bildiklərimizi ardınca davam etdirməliyik. Ermənistanın nə deməsindən asılı olmayaraq, Azərbaycan öz sərhədlərini bağlamalıdır. Öz gömrük sistemini tətbiq etməlidir. Biz bütün bunları sistemli şəkildə həyata keçirib Qarabağa tam nəzarəti bərpa etməliyik. Ermənistanı məcbur etməliyik ki, öz öhdəliklərinə əməl etsinlər. Bəli, Laçın yolunda keçirilən aksiya ilə əlaqədar erməni tərəfi böyük şou təşkil edib. Hər tərəfə car çəkirlər ki, guya Azərbaycan Qarabağdakı etnik erməniləri blokadaya alıb. Bunların heç birinə əhəmiyyət vermədən Azərbaycan öz təzyiqlərini artırmalıdır. Yaxşı olardı ki, vaxtında özümüzün informasiya siyasətimizi doğru quraydıq. Ancaq olanımız budur. O üzdən, imkanlarımız çərçivəsində səylərimizi artırmalıyıq və erməni yalanlarını ifşa etməliyik. Azərbaycan etnik təmizləmə siyasəti aparmır. 25 il əvvəl deyirdilər ki, Azərbaycanda 30 min erməni yaşayır. Çox güman, onların sayı artıb. Qarabağda da 40 min nəfərədək erməni var. Kim Azərbaycan qanunlarını qəbul edib vətəndaşımız olmaq istəyirsə buyursun. Kim istəmirsə yol açıqdır”.
Vidadi ORDAHALLI
