Xoyda baş verən zəlzələdən soydaşlarımızın çox böyük əzab-əziyyətlər çəkdikləri, acılar yaşadıqları, bu gün də eyni vəziyyətin içində olduqları məlumdur. Soydaşlarımız sözün həqiqi mənasında humanitar fəlakət içində qalıblar, yaşamağa yerləri, geyməyə isti paltarları, yeməyə bir qab xörəkləri yoxdur.
Molla rejimi təbii fəlakət qurbanlarına heç bir qayğı göstərmir, onların qeydinə qalmır, soydaşlarımız Allahın ümidinə qalıb. Bidliyiniz kimi, Azərbaycan və Türkiyə güneyli soydaşlarımıza yardım göstərmək istəyib, lakin molla rejimi buna imkan vermədi, həm bizim, həm də qardaş ölkənin yardımından imtina etdilər.
Azərbaycanın, Türkiyənin, xaricdə yaşayan soydaşlarımızın Xoyda zəlzələdən əziyyət çəkənlərə etmək istədikləri yardımı qəbul etmir, amma Ermənistandan yardım qəbul edirlər.
Azad İran Teleqram kanalı xəbər verir ki, Ermənistan Xoyda zəlzələdən zərər çəkmiş əhaliyə 42 ton yardım göndərib. Özü acından ölən işğalçı, terrorçu Ermənistanın Güney Azərbaycanın Xoy şəhərinə yardım etməsinə molla rejimi şərait yaradır. Bununla təxribata yol açır, soydaşlarımızı düşmənə möhtac etmək istəyirlər, bu isə soydaşlarımızı ciddi narahat edir.
“Üç-dörd dənə battaniyə şəkili yaydılar ki, guya Ermənistan 24 ton battaniyə göndərib”
Azərbaycan Milli Dirəniş Təşkilatının sözçüsü, hazırda Türkiyədə yaşayan Güney azərbaycanlı ictimai-siyasi fəal Məcid Cavadi Araz “Bakı-Xəbər”ə şərhində bildirdi ki, molla rejimi, həmişə olduğu kimi, yenə də məsələlərə insani baxımdan yox, öz siyasi mənfəətləri, çıxarları baxımından yanaşır. “Təbii ki, faşist, irqçi rejim olaraq, fars milliyətçiliyi təməlləri üzərində qurulan bir rejim olaraq fars etnik çıxarlarının üzərində hərəkət edib öz siyasi mənfəətlərini güdərək məsələlərə baxır. Təəssüf ki, biz bunu Xoy zəlzələsi zamanı da gördük, yaşadıq. Hətta Türkiyə zəlzələsində də müşahidə etdik və yaşayırıq. Xoy zəlzələsində, baxmayaraq ki, soydaşlarımız, azərbaycanlılar çox ağır şəraitlə üzləşdilər, qarda, çovğunda, soyuqda evsiz-eşiksiz, yeməksiz qaldılar. Bilircisi, molla hökuməti onların vəziyyətinə çox gec reaksiya verdi, onlara çox gec və yetərsiz yardım çatdırdı. Bütün bu zəlzələdən ziyan çəkən soydaşlarımızın vəziyyətindən bəhs edən çoxsaylı videolar var, deyirlər ki, Güney Azərbaycan türklərinin yardım kampaniyaları olmasaydı biz bəlkə də acından-sussuzluqdan, qarın altında qalıb soyuqdan öləcəkdik. Yəni ora Güney Azərbaycan şəhərlərindən-Urmiyadan, Təbrizdən, Zəncandan, Qəzvindən, Ərdəbildən, hər bir yandan yüzlərlə maşın yardım getdi. Bunu xalq özü təşkil etdi. Hətta İran rejiminin qüvvələri də o yardımların soydaşlarımıza çatdırılmasına bir çox yerdə əngəl törətməyə çalışdılar. Guya “düzənsizlik” olur və s. Bir tərəfdən soydaşlarımızın zəlzələdən əziyyət çəkənlərə yardımlar aparmasına əngəl törədir, o biri tərəfdən də özü onlara yardım göstərmir. İkincisi də, Tehran rejimi Azərbaycan və Türkiyənin yardım təkliflərini rədd etdi. Halbuki, Türkiyə zəlzələ bölgəsinə yarım saatlıq məsafədədir, ora Türkiyə ilə sərhəddir. Onda hələ Türkiyənin özündə zəlzələ olmamışdı. Türkiyə çox rahat və operativ şəkildə Xoya yardım çatdıra bilərdi, amma molla rejimi ona mane oldu, yardımını qəbul etmədi. Eyni şəkildə Quzey Azərbaycandan yardım gəlməsinə də maneçilik törətdi. Bundan sonra yalandan bir xəbər çıxardılar ki, guya Ermənistan Xoya yardım göndərib. Üç-dörd dənə battaniyə şəkli yaydılar ki, guya Ermənistan 24 ton battaniyə göndərib. Amma şəkildə 24 ton-filan görünmür, ortaya çıxan şəkildə üç-dörd dənə battaniyə var. Bəlli deyil ki, bu da hardan gəlib, kim gətirib, İranın özümü şəkil çəkib bunu yalandan deyir? Biz görmədik, bilmədik, sadəcə bir xəbər çıxdı. Bir də belə bir xəbər çıxdı ki, Rusiyanın da yardımını qəbul ediblər, o da Ermənistan üzərindən gələcək. Rusiyanın hazırda torpaq bağlantısı yoxdur, arada Gürcüstan var, Gürcüstanla da Rusiyanın münasibətləri bəllidir. Rusiya yardım gətirirsə niyə Quzey Azərbaycandan, Xəzər üzərindən gəlmir? Rusiya Ermənistana yardımlarını İran üzərindən göndərir. İndi nə oldu ki, Güney Azərbaycana Ermənistan üzərindən yardım göndərir? Bunlar məntiqli deyil.
Bu, molla rejiminin Azərbaycan türklərinin canı bahasına həyata keçirdiyi bir siyasi oyundur”.
Molla rejiminin Xoy zəlzələsi zamanı soydaşlarımıza qarşı qeyri-insani davranış sərgilədiyini deyən M.C.Araz qeyd etdi ki, millətimizin nümayəndələri bunu gördü, yazdı və yaydı. “İrandan indi Türkiyəyə 80 nəfərlik qrup gedib. Bu dəfə də mediada başlayıblar yazmağa ki, biz bunu necə fürsətə çevirə bilərik? Yazırlar ki, “Türkiyənin bu böyük ziyanı bizə bir fürsət oldu, biz bunu iqtisadi fürsətə çevirməliyik. Azərbaycanın yardımları da yaxşı yardımlar deyil, Azərbaycanın etdiyi yardımlar bir işə yaramır”. Molla rejimi Türkiyənin dərdlərini buraxıb Azərbaycanın Türkiyəyə etdiyi yardımların “yararsız” olduğunu iddia edir. Çox gülməlidir. Molla rejimi tamamilə insanlığa zidd, insanlığa uymayan, yaraşmayan bir davranış içərisindədir”.
Müsahibimz hesab edir ki, fars millətçilərinin də, molla dövlətinin də Quzey Azərbaycana və Türkiyəyə qeyri-insani, qeyri-səmimi münasibətini soydaşlarımız, millətimiz, mediamız, təşkilatlarımız yaxşı görür. Bunların tarixdə yaddaş olduğunu deyən M.C.Araz hesab edir ki, bunlar da, Birinci və İkinci Qarabağ savaşlarında molla rejiminin tutduğu mövqe də unudulmayacaq, tarixin yaddaşına yazılacaq, günün birində bu dəftərlər açılacaq.
İradə SARIYEVA
