Erməni lobbisi dayanmaq bilmir. Konqresdəki ermənipərəst konqresmenlərdən növbəti həyasız təşəbbüs. Belə ki, Laçın yolundakı “blokada” ilə bağlı qətnamə layihəsi ABŞ Konqresinin Nümayəndələr Palatasına təqdim edilib. Qətnamədə Azərbaycanın məsuliyyətə cəlb edilməsinin zəruriliyi də vurğulanıb.
Qətnamə qəbul olunarsa, Nümayəndələr Palatası ABŞ prezidenti Co Baydenin administrasiyasına Dağlıq Qarabağda humanitar vəziyyətin pisləşməsinin qarşısını almaq üçün beş təklif təqdim edəcək. Bunlar aşağıdakılardan ibarətdir: ABŞ Azərbaycanın hərbi cinayətlərini araşdırmaq üçün beynəlxalq məhkəmələrə müraciət etmək; Laçın dəhlizində beynəlxalq müşahidəçilərin yerləşdirilməsi üçün danışıqlar aparmaq; ABŞ-ın Azərbaycana bütün hərbi yardımı dərhal dayandırmaq və Azadlığa Dəstək Aktının 907-ci maddəsinin tətbiqi; Dağlıq Qarabağın blokadasına və digər insan hüquqlarının pozulmasına görə məsuliyyət daşıyan Azərbaycan rəsmilərinə qarşı sanksiyalar tətbiq etmək; ABŞ-ın Dağlıq Qarabağ üçün davamlı humanitar yardım və uzunmüddətli inkişaf yardımı üzrə güclü proqramını inkişaf etdirmək.
Sənədin qəbulunu dəstəkləyənlərin sayı artıq həm respublikaçılar, həm də demokratlar olmaqla 65 nəfərə çatıb. Bu sənədin məqsədi Dağlıq Qarabağ və Ermənistanı birləşdirən yolun bağlanması üçün Bakıya təzyiq göstərməkdir.
“Mürəkkəb, qarmaqarışıq dönəmləri keçdiyimiz anlarda belə qətnamələrin qəbul olunması Azərbaycanı cətin vəziyyətə sala bilər”
Sözügedən məsələ ilə bağlı fikirlərini “Bakı-Xəbər”lə bölüşən AMİP-in sədr müavini Afsəddin Nəbiyevin fikrincə, erməni lobbisinin bu addımları, onları tanıdığımız üçün bizi heç də təəccübləndirmədi: “Hər zaman olduğu kimi, erməni lobbisinin Azərbaycana qarşı hay-həşiri, iftirası qarayaxma kompaniyası bitib tükənmir. Laçın yolu axı necə "blokadaya" salınıb ki, hər gün dünya mediasının gözü qarşısında onlarla minik və yük avtomobilləri bu yoldan maneəsiz hər iki tərəfə hərəkət edirlər. Bunun bir adı var, o da Azərbaycana qarşı erməni lobbisi tərəfindən aparılan böhtan kampaniyasıdır. Məsələnin həssas məqamı ondan ibarətdir ki, erməni lobbisinin diqtəsini hər zaman canfəşanlıqla yerinə yetirən Konqres və Senatın onlarla üzvü bu lobbinin dirijor "çubuğu" ilə hərəkət edir. Belə məqamlarda Azərbaycan diplomatiyasının və diaspor təşkilatlarının üzərinə böyük məsuliyyət düşür. 1992-ci ildə səfirliyimizin ABŞ-da olmadığı dövrdə Azərbaycana yönəlmiş mənfur 907-ci düzəlişi də unutmamalıyıq. Bu qətnamə nəticəsində Azərbaycan bütün yardımlardan kənarda qaldı. İşğala məruz qaldığımız halda yardımlar Ermənistana verildi. 1996-cı ilə kimi Azərbaycanın ABŞ yardımından kənarda qalmasına baxmayaraq, Amerika Ermənistana 612 milyon dollar, Gürcüstana 420 milyon dollar göndərdiyi halda, humanitar fəlakət icərisində olan Azərbaycana 80 milyon yardım ayırmışdı. Ayrıca, Birləşmiş Ştatlar 1997-ci ildən Qarabağa yardımlar ayırmaqdadır. Bu ədalətsizliklər hələ də davam edir. Bax, Amerikanın "ədalət tərəzisi" bu faktlardan ibarətdir. Erməni lobbisi günümüzdə daha da irəli gedərək Azərbaycana sanksiyalar tətbiq olunmasına çalışır. Buna imkan vermək olmaz. Diplomatlarımız, diaspor təşkilatlarımız səfərbər olmalı və bu addımların qarşını almalıdır. Mürəkkəb, qarmaqarışıq dönəmləri keçdiyimiz anlarda belə qətnamələrin qəbul olunması Azərbaycanı cətin vəziyyətə sala bilər. Buna heç bir halda imkan vermək olmaz”.
Vidadi ORDAHALLI
