İranın Ermənistandakı səfiri Abbas Bədəxşan Zohuri İran-Ermənistan münasibətlərinə həsr edilən tədbirdə hədələyici tonda fikirlər səsləndirib. Zohuri deyib ki, İran ona “problem yaratmağa” çalışan kiçik ölkələri cəzalandıra bilər.
Səfir eyni zamanda qeyd edib ki, Tehran Avropa İttifaqınin müşahidəçi missiyası adı altında Fransa jandarmlarının Ermənistan-Azərbaycan sərhədində yerləşdirilməsinin əleyhinə deyil. Onun fikrincə, qəbul edilən istənilən qərar və ya hərəkət məntiq çərçivəsindədir:
“Ermənistanın müdafiə naziri nəsə səsləndirməli olsaydı, bunu edərdi. Eyni şey İran rəsmilərinin açıqlamalarına da aiddir. Başqa dalğaların yaranmasına imkan verməmək üçün müdafiə idarələrinin rəhbərlərinin dediklərindən artıq danışmaq istəmirəm. Hərbi sahə ilə bağlı mətbuatda məlumatların yayılması Ermənistan və İranın maraqlarından irəli gəlmir. Tələsməyin, tarix hər şeyə toxunacaq”.
İranın Ermənistandakı səfirinin bu hədəsi kimə ünvanlana bilər?
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə bildirdi ki, İran səfirinin hədələdiyi ünvan bəllidir: “Bunu təxmin etmək o qədər də çatin deyil. İranın son günlər ciddi gərginlik yaşadığı ölkə Azərbaycandır. Bizim səfirliyimizə terror aktı törədiləndən sonra İranın daha bir məkrli planı ilə bağlı iddialar ortaya qoyuldu. Belə fikirlər səslənir ki, Türkiyədəki zəlzələnin yaratdığı şəraitdən istifadə edən İran və Ermənistan sərhədimizdə birgə təxribat yaratmaq istəyirlər. Təbiidir ki, belə məkrli planlarla onlar bizə heç nə edə bilməzlər. Azərbaycan da İranın bu addımlarına sərt etirazlar edir. Buna görə də, İranın səfiri bizi “kiçik ölkə” gözündə görüb, hədələmək istəyir.
Səfirin hədəsinin ünvanının Azərbaycan olduğunu başqa faktlar da təsdiq edir. Səfir həmçinin deyib ki, İran və Ermənistan Zəngəzur dəhlizinin əleyhinədir. İranlı diplomat bu sözlərilə dəhlizin açılmamasının Ermənistanın da maraqlarına zidd olduğunu iddia edib. Halbuki, Ermənistan baş naziri Nikol Paşinyan eyni gündə açıqlama verib ki, Azərbaycana uzanan nəqliyyat yollarından istifadənin əleyhinə deyil, sadəcə, bu dəhlizin statusu ətrafında fikir ayrılığı mövcuddur.
Səfir deyib ki, yaxın müddətdə Ermənistanın Təbrizdə konsulluğu açılmalıdır. Aydındır ki, məhz bu addım da Azərbaycanla olan ziddiyyətə görə atılır. Bir sözlə, səfirin çıxışındakı bütün fikirlər bizimlə bağlı olduğundan, onun hədəsinin də ünvanı bizik”.
Ekspertin sözlərinə görə, Azərbaycanın 1991-ci ildə dövlət müstəqilliyini bərpa etməsindən bəri yolu hamar olmayıb: “Ermənistanla uzun illər davam edən münaqişə öz yerində, bir yandan da İran ölkəmizə qarşı daim destruktiv mövqe, soyuq münasibət ortaya qoyub. Bu soyuqluğu doğuran əsas faktor isə İranın Azərbaycan dövlətinə qarşı əsassız iddialarıdır. Halbuki, məhz tarixi, dini və mədəni bağları olan iki ölkə qarşılıqlı hörmət və ehtirama əsaslanan münasibətlər qura bilərdi. Amma İran səmimi dostluq və mehriban qonşuluq siyasətini deyil, rəsmi Bakıya qarşı qısqanclıq, qərəz və bəzi hallarda açıq təxribat yolunu seçdi”
Görünən budur ki, İran təkcə Azərbaycan dövlətinə qarşı deyil, öz vətəndaşları olan azərbaycanlılara qarşı da qeyri-insani rəftar edir. İranda yaşayan ermənilərin və azərbaycanlıların vəziyyətinə diqqət yetirsək görərik ki, azsaylı ermənilər Tehranın hərtərəfli diqqət və qayğısı ilə əhatə olunublar, mədəniyyət mərkəzləri, məktəbləri, biznesləri, mediaları ən yüksək səviyyədə fəaliyyət göstərir. 35-40 milyon azərbaycanlının isə bir məktəbi, qəzeti belə yoxdur. Haqqını tələb edən azərbaycanlılar din düşməni, sionizmin tərəfdarı elan edilir, işgəncələrə, həbslərə məruz qalır. Sanki Azərbaycan dövlətinin heyfini fars rejimi soydaşlarımızdan çıxır. İran bilsin ki, belə hədələrlə bizi nəyəsə məcbur edə bilməyəcək.
Məhəmmədəli QƏRİBLİ
