Ermənistan kütləvi informasiya vasitələrinin beynəlxalq təşkilatların bütün xəbərlərini təhrif edərək, hadisələrin mahiyyətini saxtalaşdıraraq özlərinə sərf edən şəkildə təqdim etdikləri məlumdur.
İndiyə qədər elə bir beynəlxalq sənəd olmayıb ki, ermənilər ora müdaxilə edib onun mahiuyyətini təhrif etməsinlər. Erməni mediasında gedən xəbərlə ilkin mənbədə gedən xəbərləri tutuşduranda dəhşətə gəlirsən ki, bunlar neçə də xəbər cinayətindən çəknmirlər.
Erməni mediası indi də Avropa Parlamentinin ötən ilin dekabrında qəbul etdiyi “Mədəniyyət üzrə yeni Avropa gündəliyinin və Aİ-nin beynəlxalq mədəni əlaqələr üzrə yeni strategiyasının həyata keçirilməsi” adlı qətnaməni gündəmə gətirib, onu yeni sənəd kimi təqdim edir. Bu azmış kimi, guya bu qətnamənin Azərbaycana qarşı qəbul edildiyini də utanmadan iddia edirlər.
Erməni mediası iddia edir ki, guya Avropa Parlamentinin qətnaməsində “Azərbaycanın “Arsaxda” erməni mədəni sərvətlərini məhv etmək siyasəti” pislənilib. Köhnə məlumatı yeni məlumat kimi təqdim etməklərindən əlavə, bu qərəzli qətnaməni bütövlükdə Azərbaycanən üzərinə çəkməyə çalışırlar. Belə rəy yaratmağa cəhd edirlər ki, bu beynəlxalq təşkilatın strategiyasını, yönünü, ölkələrə münasibətini ermənilər müəyyən edir. Əvvəla, Avropa Parlamenti belə ədalətlidirsə, bu qətnamədə Azərbaycanın adını çəkməli deyildi, ittihamı birbaşa Ermənistanın üzərinə yeritməli idi ki, siz Azərbaycanın bütün maddi-mədəni, tarixi irsini məhv etmisiniz, abidələrini, dini ocaqlarını, məzarlıqlarını dağıtmısınız, ekosid, genosid törətmisiniz. Amma təəssüf ki, biz bunu duymuruq.
“Avropa Parlamentində o təşəbbüsü irəli sürən, anti-Azərbaycan ifadələrinin qətnaməyə salınmasına yol açan deputatlar var”
Siyasi şərhçi Azər Həsrət “Bakı-Xəbər”ə erməni mətbuatının bu məlumatı niyə fevral ayında yaydığından təəccübləndiyini bildirdi. “Erməni mediasının bu məsələyə niyə məhz indi qayıtması təəccüblüdür. Bu xəbər fevralın əvvəlində yayımlanıb, sözügedən qətnamə isə ötən ilin dekabr ayının 14-də qəbul edilib. Üstəlik də, bu, erməni mediasının təqdim etdiyindən fərqli olaraq, sırf Azərbaycanla bağlı qətnamə deyil, bütövlükdə mədəni irslə bağlı çox geniş qətnamədir. Orda da bir cümlə ilə Azərbaycanın guya “Qarabağdakı erməni mirasını dağıtması ilə bağlı həyacan təbili çalınır”. Yəni ermənilər yatıb-yatıb bu köhnə xəbəri niyə yenidən gündəm ediblər? Açığı, bunu anlamıram. İkinci bir tərəfdən də, görünür gündəmə çıxarmağa mövzu tapa bilməyiblər. Yəni müəyyən qədər Azərbaycanın özünün aktivliyi nəticəsində anti-Azərbaycan hərəkatları səngiyib, üstəlik də Laçın yolundaklı “blokada” ilə bağlı iddiaları ilə bağlı istəklərinə nail ola bilmədilər. Əslində isə heç bir blokada yoxdur, aksiyaçıların istəyi də, tələbi də aydındır.
Ona görə də, yəqin başqa bir məsələ ilə mövqelərini möhkəmləndirməyə çalışırlar. Ona görə də, köhnə xəbəri “təzə xəbər” kimi öz oxucularına sırımağa çalışırlar. Bu bizi təəccübləndirmir. Erməni təbliğatında hər şey məqbuldur. Yəni onlarda köhnə, yeni, yalan, doğru deyə bir keyfiyyət seçimi yoxdur. Nə olsa, necə olsa təqdim etməyə hazırdırlar. Bundan istifadə də edirlər. Bu baxımdan, düşünürəm ki, ermənilər sadəcə olaraq ictimai rəyi çaşdırmaq, məşğul etmək üçün köhnə xəbəri ay yarım sonra “yeni xəbər” kimi ictimai rəyə sırımaq istəyirlər”.
A.Həsrət hesab edir ki, bu gün erməni mediasının Avropa Parlamentinin köhnə bir qətnaməsi ətrafında monipulyasiya etməsi heç nəyi onların xeyrinə dəyişən deyil. A.Həsrətin fikrincə, Azərbaycanın müvafiq qurumları hər halda “keçdi getdi” demədən bu cür məsələlərlə məşğul olmalıdır. “Yəni Avropa Parlamentində o təşəbbüsü irəli sürən, anti-Azərbaycan ifadələrinin qətnaməyə salınmasına yol açan deputatlar var, o deputatlarla, onların ölkələri ilə iş aparılmalıdır. Bu məsələdə bu tərəfdən də istifadə edilməlidir. Belə də götürəndə, bizi narahat edən bir məsələ deyil. Azərbaycan dəfələrlə bütün dünyaya “hər kəs istədiyi vaxt gəlib görə bilər ki, kim kimin mirasını dağıdıb və dağıdır” deyə müraciət edib. Yəni Qarabağ işğaldan azad edildikdən sonra Azərbaycana minlərlə ictimai-siyasi fəal, jurnalist, bloger, səyahətçi gəlib-gedib, görüb çəkib, göstəriblər. Bu baxımdan, əlbəttə, narahatlıq üçün ciddi əsas yoxdur. Amma erməni təbliğatıdır, hər halda biz də boş durmamalıyıq” - deyə siyasi şərhçi qeyd etdi.
İradə SARIYEVA
