Fransa Azərbaycanla sərhədə qoşun yeridəcəyini rəsmən bəyan edib. Bunu Fransa Avropa Parlamentinin deputatı Natali Luazo deyib. O bildirib ki, Fransa Azərbaycan-Ermənistan sərhədində jandarmlar yerləşdirəcək: “Fransa Azərbaycan-Ermənistan sərhədinə Aİ missiyasının bir hissəsi kimi jandarmlar göndərəcək”.
Avropa Parlamentinin deputatının sözlərinə görə, o, Azərbaycanın “missiya ilə əməkdaşlıq edəcəyinə” ümid edir.
Luazo hesab edir ki, Avropa İttifaqı özünü münaqişədən çox uzun müddət uzaqlaşdırıb. İndi Aİ və ATƏT daha çox iş görməlidir.
Qeyd edək ki, Rusiyanın Azərbaycandakı səfiri M.Boçarnikov bu məlumatı təsdiqləyərək, bunun təhlükəli olduğunu vurğulayıb.
Bəllidir ki, Azərbaycan sərhədə yerləşdiriləcək ikinci missiyanın fəaliyyətinə razılıq verməyib. Belə olan təqdirdə, niyə adını müşahidəçi qoyub, əslində isə hərbi mahiyyət daşıyan hansısa missiya ilə əməkdaşlıq etməlidir?
Siyasi şərhçi Sahil Kərimli “Bakı-Xəbər”ə açıqlamasında bildirdi ki, məsələyə bir qədər fərqli aspektdən yanaşmaq lazımdır: “Fransa son aylarda, xüsusilə də Avropa İttifaqının Azərbaycanla Ermənistan arasında sülh müqaviləsinin imzalanması istiqamətində fəallığını hiss edərək, özünü bu məsələlərə daxil etməyə çalışdı. Bütün ciddi cəhdlərilə məsələləri manipulyasiya etməyə çalışdı və bölgədə öz nüfuzunu artırmaq üçün addımlar atmağa həvəsləndi. Fransanın Azərbaycan - Ermənistan münasibətlərinin normallaşdırılması prosesində heç bir yeri yoxdur, bundan sonra da olmayacaq. Fransa açıq - aşkar Ermənistanı dəstəkləyir. Bu əvvəllər, işğal dövründə də belə olub, sonrakı dövrlərdə də bunun şahidi olmuşuq. Belə birtərəfli, ədalətsiz mövqenin qarşısında Azərbaycan dövlətinin qətiyyətli, birmənalı mövqeyi budur ki, Fransa bu məsələlərdə ümumiyyətlə iştirak etməməlidir. O ki qaldı, Fransanın hansısa Avropa İttifaqı səviyyəsində bölgəyə müşahidəçilərinin göndərilməsi, jandarm qüvvələrinin daxil edilməsi məsələsinə, əlbəttə ki, bu məsələ də Azərbaycanın iradəsinə ziddir. Bölgəyə, xüsusilə də Azərbaycan-Ermənistan sərhədinə cəlb olunacaq hər hansı bir missiya birbaşa Azərbaycanla razılaşdırılmalıdır. Biz bunun əksini görürük. Azərbaycanın bu istiqamətdə heç bir razılığı olmayıb, Azərbaycanla heç bir danışıq aparılmayıb. Belə olduğu halda Fransanın bu addımı birbaşa olaraq hegemonluq, bölgəyə nüfuz etmə cəhdləri və Azərbaycanın iradəsinə zidd hərəkət anlamına gəlir. Bu qəbuledilməzdir. Azərbaycan dövləti dəfələrlə bəyan edib ki, bölgədə yaranmış yeni reallıqları Azərbaycan yaradıb və bölgədə yeganə söz sahibi də Azərbaycan olmalıdır. Bu əraziyə gətirilən istənilən qüvvələr, istər mülki, istər hərbiləşdirilmiş olsun, birbaşa Azərbaycanla razılaşdırılmalıdır. Mən hesab edirəm ki, bu məsələlər Fransanın manipulyasiyasıdır, növbəti dəfə sülh danışıqları prosesinin uzadılmasına hesablanıb. Bu isə bölgədə yeni münaqişə ocaqlarının yaranmasına gətirib çıxara bilər ki, Fransa özü də bunu istəyir, buna nail olmağa çalışır. Bu təhlükəli prosesdir, qarşısı qətiyyətlə alınmalıdır. Mən düşünürəm ki, bu bölgədə vəziyyət çox gərginləşəcək. Çünki baş verən zəlzələ ilə bağlı Türkiyənin başı özünə qarışıb. Bölgədə çox böyük qarışıqlıqlar yaranıb. İndi də deyirlər ki, İran Ermənistanla birləşib, Qubadlı və Laçın istiqamətində təxribatlara hazırlaşır. Onlar elə düşünürlər ki, indi Azərbaycan tək qalıb, Türkiyənin başı özünə qarışıb. Bu məsələləri fürsət bilirlər. Gərginlik artacaq. Allah köməyimiz olsun. İnşallah yaxşı olar”.
Məhəmmədəli QƏRİBLİ
