Məlum olduğu kimi, Azərbaycan mediasının bəzi nümunələri diplomatik mənbələrə istinadla Ermənistanın İranla birlikdə Azərbaycana qarşı təxribat hücumu hazırladığı haqda məlumat yayıb.
Məlumatda qeyd edilir ki, SEPAH-ın etnik azərbaycanlılardan ibarət qrupu artıq Sünikə (Qərbi Zəngəzur) yerləşdirilib və Ermənistan Müdafiə Nazirliyinin kəşfiyyat idarəsi və Milli Təhlükəsizlik Xidməti ilə hazırlıq işləri aparır. Əməliyyata SEPAH generalı rəhbərlik edir. Azərbaycan əsgərlərinin formasında olan SEPAH-ın azərbaycanlı qrupu Ermənistanda hücum həyata keçirir, erməniləri öldürməsi imitasiya edilir, azərbaycanca danışırlar və videolar çəkirlər, “buna cavab olaraq” SEPAH-ın əsas qüvvələri Laçın və Qubadlı istiqamətində hücuma keçir və s.
Bu məlumat tirajlandıqdan sonra Ermənistanın Müdafiə Nazirliyi rəsmi açıqlama yayaraq, informasiyanı təkzib edib. Müdafiə Nazirliyinin mətbuat katibi və Milli Təhlükəsizlik Xidməti direktorunun müşaviri eyni vaxtda və dərhal mediaya açıqlamalarında məlumatı “reallığa uyğun olmayan yalan” adlandırıb. Media Müdafiə Nazirliyinin mətbuat xidmətinin sözçüsünün Aram Torosyan olduğunu sonradan qeyd edib, ancaq Milli Təhlükəsizlik Xidməti direktorunun müşavirinin adını gizli saxlayıb – buna baxmayaraq, açıqlamanı ikisinin adından tirajlayıblar.
Azərbaycan mediasında yayılan bu məlumatı hakim partiya deputatları, politoloqlar, media ilə yanaşı, hətta müxalifətdən olan millət vəkilləri də təkzibə girişib.
“Şərəf duyuram” fraksiyasının deputatı, hakimiyyətə qarşı kəskin mövqeyi ilə seçilən Tiqran Abramyan da məlumatı qətiyyətlə təkzib edib.
İran və Ermənistanın Azərbaycanla sərhəddə gizli şəkildə təxribata hazırlaşdığı haqda Azərbaycan mediası məlumat yayırsa, bunu Ermənistan müxalifətinin təkzib etməsi çox maraqlı görünür.
İran və Ermənistan belə mövqedədir. Bəs Rusiya belə planlara münasibədə hansı mövqedə olacaq? İranla Ermənistanın bu oyunu Rusiyanın mənafelərinə cavab verirmi?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, Rusiya Ermənistanı hər zaman İranla bırabər dəstəkləyib: “Çünki Ermənistanı yaradan da, silahlandıran da məhz Rusiyadır. İran da İkinci Qarabağ müharibəsindən sonra Ermənistana dəstəyini açıq bildirir. Son 30 ildə bu dəstəyi gizli şəkildə edirdisə, indi açıq şəkildə edir. Qarşılıqlı rəsmi səfərlər intensiv hal alıb, İran mollaları Ermənistana açıq dəstək bəyanatları səsləndirir. Ermənistana ən müasir silahlar verir və verəcəyini bəyan edir. Bir sözlə, Rusiya və İran Ermənistanla eyni cəbhədə yer alır. Paşinyan da Qərbin layihəsidir. O, Rusiya və KTMT əleyhinə çıxışlar edir. Hətta qurumun hərbi təlimlərinin Ermənistan ərazisində olmasına etiraz etdi. Ardınca onun tərəfdarları Rusiya ordusunun Ermənistandan çıxarılması tələbi ilə aksiya keçirdi. Paşinyan eyni anda həm Qərblə, həm də Rusiya ilə əməkdaşlıq edir. Gec-tez bu məsələ tam aydınlaşacaq. Rusiya və İranın Cənubi Qafqazadı maraqları tam məlumdur. İran bizim güclü olmağımızı qəti istəmir. Buna nail olmaq üçün bütün addımları atır”.
Ekspertin sözlərinə görə, Rusiya, İran və Ermənistan birgə addımlar atdığlna görə, ağıla gələn ilk fikir bu olur ki, bu işlərin içində Moskva da var: “Bəzən isə elə vəziyyət yaranır ki, illərlə müttəfiq olan ölkələr sonra düşmən olur. Bu, onların marağından irəli gəlir. Ermənistan kim güclüdürsə onun yanında olur. Çalışır ki, hər fürsətdən istifadə etsin. Yəni hazırda Rusiyanın başının qarışıq olduğunu görüb, onun iradəsindən kənar olan addımlara da gedə bilər. İranla Ermənistanın bu təxribatı Rusiyanın iradəsindən kənar hazırlaması da mümkündür. Rusiya isə regiondakı nizamlamada qarantorluq edirsə, onun iradəsindən xaric heç bir plana dəstək verməz. Çünki Ermənistanın son addımları Rusiyanın maraqları ilə uzlaşmır. Ermənistan Rusiyanın sıxışdırılaraq regiondan uzaqlaşdırılması, bölgəyə yeni güclərin gətirilməsinə çalışır ki, bu da Rusiyanın marağına ziddir”.
Məhəmmədəli QƏRİBLİ
