Ermənistanın baş naziri Nikol Paşinyan parlamentdə çıxış edərkən bildirib ki, kommunikasiyaların açılmasına Azərbaycandan daha çox Ermənistanın ehtiyacı var: “Kommunikasiyaların açılmasına hamıdan çox Ermənistanın ehtiyacı var.
İrəvan Azərbaycanla dəmir yolu və avtomobil yollarını tez bir zamanda açmağa hazırdır. Regionda kommunikasiyaların, xüsusən də Azərbaycanla dəmir yolu və avtomobil əlaqələrinin açılması Ermənistanın Avrasiya İqtisadi İttifaqı ilə, təkcə onunla da yox, əmtəə dövriyyəsini əhəmiyyətli dərəcədə artıracaq. Ermənistan guya kommunikasiyaların açılmasına mane olur. Regional kommunikasiyaların açılmasında ən çox biz maraqlıyıq, çünki 30 ildir blokadadayıq. Həm Azərbaycanın, həm də Türkiyənin alternativ yolları var. Azərbaycan və Türkiyənin bu yollara Ermənistan qədər ehtiyacı yoxdur, ona görə də onlar bu yolların açılmasının qiymətini şişirtməyə çalışırlar. Yəni bizə daha baha satmaq istəyirlər”.
Maraqlıdır, doğrudanmı sözügedən yolların qiymətini qaldırmaqla bağlı cəhdlər var? Paşinyanın bununla bağlı iddiası nə dərəcədə reallığa söykənir? Ermənistanın nəyi var ki, yolla bağlı qiyməti qaldırsınlar?
“Paşinyanın yolun qiyməti ilə bağlı dedikləri heç bir reallığa söykənmir”
Məsələyə münasibət bildirən politoloq Tural İsmayılovun fikrincə, əslində Paşinyan uzun illərdir Azərbaycanın səsləndirdiyi reallığı etiraf etmiş oldu: “Əvvəla, biz dəfələrlə vurğulamışıq ki, regiondakı kommunikasiya layihələrinin gerçəkləşməsinə Azərbaycandan çox Ermənistanın ehtiyacı var. Sözügedən kommunikasiya xətləri açılmayacağı təqdirdə Ermənistanın dövlət olaraq düçar olduğu iqtisadi-siyasi gərginlik vəziyyəti heç vaxt düzəlməyəcək. Həmçinin, Paşinyan sonuncu açıqlamasında bizim səsləndirdiyimiz reallıqların ciddiliyini bir daha özü etiraf etmiş oldu. Eyni zamanda, Paşinyanın etirafı Ermənistan dövlətinin düşdüyü çıxılmaz vəziyyəti növbəti dəfə ifşa etmiş olur. Hazırda hakimiyyət komandasının Ermənistanı düşdüyü bəlalardan sığortalayacaq hansısa bir planı yoxdur. Ermənistanı xilas edə biləcək iqtisadi layihələri reallaşdıra bilmir. Bütün bunların fonunda Paşinyan acı etirafları səsləndirməyə başlayıb. Paşinyanın yolların qiymətinin şişirdilməsi ilə bağlı dediklərinin heç bir əsası yoxdur. O, bir tərədən deyir Azərbaycan və Türkiyənin Ermənistan qədər buna ehtiyacı yoxdur, bu biri tərəfdən deyir yolun qiyməti şişirdilir. Bu deyilənlər bir-biri ilə uzlaşmır. Ona görə də, yollarla bağlı deyilənlər xaricdəki erməni diasporasına ünvanlanmış saxta tezislərdir. Eyni zamanda, xaricdən maliyyə yardımları dilənilməsinə hesablanmış feyk informasiyadır. Bu minvalla xaricdən daha çox vəsait qoparmaq istəyirlər. Ona görə də Paşinyanın yolun qiyməti ilə bağlı dedikləri heç bir reallığa söykənmir. Azərbaycan hansısa bir formada kommunikasiya xətlərinin qiymətini qaldırmaqda maraqlı deyil. Üstəlik, hazırkı şəraitdə Ermənistanın elə bir maddi sərvəti də yoxdur. Bu ölkə iqtisadi baxımdan xarici güclərdən asılıdır. Belə olan təqdirdə, əlbəttə ki, bütün bunlar növbəti dəfə erməni xalqını aldatmaq cəhdidir. Həm də xaricdə məzlum, kasıb Ermənistan obrazını yaradaraq dilənçiliyi özündə ehtiva edir”.
Bir sözlə, ekspert hesab edir ki, Paşinyanın son açıqlaması onların nə dərəcədə misgin və rəzil durumda olduqlarını ortaya qoyur.
Vidadi ORDAHALLI
