Ermənistan xarici işlər naziri Ararat Mirzoyan Almaniya xarici işlər naziri ilə görüşdən sonra keçirilən mətbuat konfransında deyib ki, Azərbaycanla sülh müqaviləsinin imzalanması ilə bağlı danışıqlar davam edir və Ermənistan bu danışıqlarda fəal iştirak edir:
“Biz regionumuzda sabit və davamlı sülhün qurulması üçün fəal səylərimizi davam etdirmək niyyətindəyik. Dekabr ayına Azərbaycan və Rusiya xarici işlər nazirlərinin növbəti görüşü nəzərdə tutulmuşdu. Bu dəfə Moskvada baş tutmalı idi. Lakin bu vəziyyətə baxmayaraq, biz sülh müqaviləsi ilə bağlı yeni təkliflərimizi Azərbaycan tərəfinə verdik. Bir neçə gün əvvəl Azərbaycandan cavab və təkliflər almışıq. Bu davam edən prosesdir və biz mətn üzərində işləməyə, təkliflər mübadiləsinə və müzakirələri davam etdirməyə davam edirik”.
Göründüyü kimi, Ermənistan rəsmisi sülh danışıqları ilə bağlı əvvəlki kimi imitasiyaya yol verir. Sanki belə təəssurat yaratmağa çalışırlar ki, güya sülh sazişinin üzərində Ermənistan qədər işləyən ikinci ölkə yoxdur. Əslində isə prosesi pozan elə Ermənistanın özüdür.
Politoloq Yeganə Hacıyeva “Bakı-Xəbər”ə açıqlamasında bildirdi ki, Ermənistan üçtərəfli sazişi imzalayandan sonra onun fəaliyyətinin başlıca istiqaməti razılaşmanı pozmağa yönəlib: “Xüsisilə də sərhədlərin dəqiqləşdirilməsi məsələsini açıq şəkildə sabotaj etdi. Bir müddət əvvəl bu cür məsələlərlə bağlı Ermənistanın mövqeyini bir qədər sərt xəttin tərəfdarı olan Təhlükəsizlik Şurasının katibi ifadə edirdi. İndi isə bu işi güya nisbətən loyal olan Mirzoyana həvalə ediblər. Mirzoyan da sülh danışıqları ilə bağlı Ermənistan adından manipulyasiya edir. Azərbaycan tərəfi rəsmən bəyan etdi ki, Ermənistan həmin təklifi 15 gün əvvəl alıb, ancaq indiyə qədər ona cavab verməyib. Bir daha təsdiqlənir ki, Ermənistan sırf manipulyasiya ilə məşğuldur, özünün pozuculuğunu ört-basdır etmək üçün bizi destruktivlikdə ittiham edir. Belə təkliflər yalnız iki ölkə arasında deyil, həm də vasitəçilik edən üçüncü tərəflə razılaşdırılır. Həmin üçüncü tərəf çox vaxt erməni maraqları kontekstindən çıxış edir. Ermənistan bu üsulla yeni diplomatik hücum strategiyası müəyyənləşdirib. Ancaq beynəlxalq dairələr kimin pozuculuq etdiyini hamıdan yaxşı bilir. Təəssüf ki, bu mütləq həqiqəti yalnız duymaq istəyənlər görə bilir, əksəriyyət isə özünü görməzliyə vurur”.
Qeyd edək ki, Azərbaycan Respublikası Xarici İşlər Nazirliyinin Mətbuat xidməti idarəsinin rəisi Ayxan Hacızadə Almaniyada səfərdə olan Ermənistan xarici işlər naziri Ararat Mirzoyanın, guya Azərbaycanın danışıqlar prosesinə maneçilik törətdiyi, buna baxmayaraq, Ermənistanın sülh prosesinə sadiq olduğu və bir neçə gün əvvəl Azərbaycan tərəfindən təqdim edilmiş sülh sazişi üzrə təklifləri nəzərdən keçirməsi ilə bağlı bəyanatına münasibət bildirib. Onun sözlərinə görə, Ermənistan xarici işlər naziri Ararat Mirzoyanın istinad etdiyi təkliflər bir neçə gün deyil, 15 gün bundan əvvəl Azərbaycan tərəfindən təqdim edilib
“Bununla yanaşı, Ermənistan xarici işlər nazirinin bu bəyanatından göründüyü kimi, Ermənistan tərəfi sülh sazişi üzrə danışıqlar prosesi barədə yenidən manipulyasiyaya yol verir və özünü konstruktiv tərəf kimi təqdim etməklə, beynəlxalq ictimaiyyəti çaşdırmaq məqsədi daşıyır…”
Görünən budur ki, Rusiya Azərbaycanla Ermənistan arasında sülh danışıqlarında vasitəçilik təşəbbüsünü yenidən ələ alır. İrəvan isə son aylar kimin vasitəçiliyi ilə masaya oturacağını müəyyənləşdirə bilmir. Gah Emmanuel Makronun, gah Şarl Mişelin ətəyindən yapışmaq istəsə də, bu təşəbbüslər uğursuz olur. Azərbaycan dialoqa istənilən vasitəçi ölkə ilə həmişə hazırdır, o şərtlə ki, bu, tərəf tutmaq və ya imitasiya xarakteri daşımasın.
Rusiyanın xarici işlər naziri Sergey Lavrovun Azərbaycanın xarici işlər naziri Ceyhun Bayramovla son telefon danışığının əsas mövzusu da iki ölkə arasında təmasların bərpa edilməsinə yönəlmişdi.
Məhəmmədəli QƏRİBLİ
