Məlum olduğu kimi, bu günlərdə Rusiya xarici işlər naziri Sergey Lavrov verdiyi müsahibədə Ermənistan tərəfindən Azərbaycanın 7 rayonunun işğal edildiyini qeyd etdi. Onun fikirlərinə rəsmi İrəvan konkret münasibət bildirməkdən çəkinir.
Bu arada Ermənistan parlamentinin sədri Alen Simonyan bunu belə dəyərləndirib ki, guya Lavrovun səsləndirdiyi fikirlərdə yeni bir şey yoxdu və Rusiya hər zaman belə mövqedən çıxış edib: “Rusiya Federasiyasının xarici işlər naziri Sergey Lavrovun Qarabağ problemi ilə bağlı bəyanatına reaksiya verməyə lüzum görmürəm. Və nə reaksiya vermək lazımdır? Düşünürəm ki, hər şey aydındır, bu, indi müdaxilə etməyə ehtiyac olmayan bir prosesdir. Ümumiyyətlə, bizim üçün yeni heç nə səslənmədi. Biz necə reaksiya verək, bəyan edək ki, hər şey həmişə dediyimiz kimidir və bizi ittiham etdilər, dedilər hər şey səhvdir?”.
Simonyan deyir ki, Lavrov yeni bir söz deməyib. Maraqlıdır, Rusiya Lavrova qədər haçan açıq deyib ki, Ermənistan ətraf rayonları işğal edib?
“Bununla Simonyan Lavrovun dediklərinə əlavə hər hansı reaksiya verə bilməyəcəyini etiraf etməli olub”
Sözügedən məsələ ilə bağlı fikirlərini “Bakı-Xəbər”lə bölüşən “SƏS” Media Qrupunun rəhbəri, politoloq Bəhruz Quliyevin fikrincə, əslində bununla Alen Simonyan Lavrovun dediklərinə əlavə hər hansı reaksiya verə bilməyəcəyini etiraf etməli olub: “Əvvəlcədən xatırladım ki, Qarabağın işğal olunması faktını ilk öncə Rusiyanın prezidenti Vladimir Putin hələ 2020-ci ildə baş verən 44 günlük müharibə zamanı keçirdiyi mətbuat konfransında “Qarabağ Azərbaycanın ayrılmaz hissəsidir” bəyanatı ilə bildirib. Düzdür, o açıq şəkildə deməmişdi ki, Ermənistan Qarabağı və ətraf yeddi rayonu işğala məruz qoyub və s. Lakin fakt budur ki, Putin Qarabağın Azərbaycanın tərkib hissəsi olduğunu açıq şəkildə vurğulayaraq, həm də onun ətrafının erməni işğalına məruz qaldığına eyham vurmuşdu. Artıq bu gün Rusiyanın XİN başçısı Sergey Lavrovun da başqa cür, ayrı səpgidə bəyanat səsləndirməsi mümkün ola bilməzdi. Söz yox, o bu dəfə daha açıq və qəti qaydada bəyan etdi ki, Ermənistan Qarabağı və yeddi ətraf rayonu işğal edib. Əslində, Ermənistan parlamentinin sədri Alen Simonyanın Lavrovun sözügedən bəyanatında yeni bir şeyin olmadığını deməsi də dolayısı ilə etirafa daha çox bənzəyir. Daha dəqiq desək, Ermənistanın mövcud siyasi rəhbərliyi də Qarabağın, habelə ətraf yeddi rayonun Azərbaycanın əzəli torpaqları olduğunu deməyə məcburdu. Onlar bu faktı inkar etmək gücündə və qabiliyyətində də deyil. Həqiqətən də gəlin düşünək və nəticə çıxaraq ki, Simonyan Lavrovun bəyanatına necə əks reaksiya verə bilər. Yenidən Paşinyanın təbirincə “Qarabağ Ermənistandır və nöqtə”mi deyilməlidir? Əgər belə olsa hadisələrin Ermənistana necə baha başa gələcəyini də təsəvvürümüzdə canlandıra bilərik. Fakt budur ki, Azərbaycan Ermənistana vaxt verib ki, mövcud məsələ tezliklə həll edilsin. Yəni Ermənistanın Qarabağdakı qanunsuz silahlıları oradan çıxarılsın, təbii sərvətlərin talanmasına son qoyulsun və s. Biz Prezident İlham Əliyevin ölkə televiziyalarına verdiyi yanvar müsahibəsində səsləndirdiyi bəyanatını da xatırlamalıyıq. Dövlət başçısı xüsusilə vurğuladı ki, 2023-cü il Ermənistanın nəticəyə gəlməsi üçün son ildir. Bakının bundan artıq gözləməyə nə vaxtı, nə də ki, səbri çatacaq. Onlara kifayət qədər vaxt da verilib, zaman da təqdim olunub. Ona görə də Lavrov hansı bəyanatı verir, Simonyan buna necə reaksiya verməlidir - artıq bunların heç birinin əhəmiyyəti yoxdur. Qarabağ, eləcə də onun ətraf rayonları Azərbaycandır. Bütün dünya birliyi də bu əraziləri Azərbaycanın tərkib hissəsi olaraq tanıyır”.
Politoloq onu da qeyd etdi ki, artıq siyasi mühit və yaranan situasiya faktiki olaraq Ermənistanı dalana söykəyib və bu reallığı rəsmi İrəvan da dərk edir: “Əbəs deyil ki, artıq Ermənistan hakimiyyətində “qurtuluş naminə ayrılıq” motivi üzərində fikirlər səslənir. Yəni Ermənistan Qarabağdan imtina etməklə öz xilasını əldə edir. Bu vasitə ilə regional siyasi-iqtisadi mühitə qatılır. İrəvanın başqa yolu da yoxdur. Bu baxımdan, Alen Simonyan Lavrovun dediklərinə əlavə hər hansı reaksiya verə bilməyəcəyini etiraf etməli olub”.
Vidadi ORDAHALLI
