Rusiya mediası Azərbaycandan Ukraynaya güya silah tədarükü ilə bağlı məlumat yayıb. İddia olunur ki, Azərbaycanın 2022-ci ildə istehsal olunan 120 mm-lik 40M11 minaları Ukraynaya “satılıb”.
Rusiya mediası yazır ki, güya bundan əvvəl Ukrayna qüvvələrinin arsenalında Azərbaycan istehsalı olan 82 mm-lik 20N5 minaatanlarına dəfələrlə rast gəlinib.
Qeyd edək ki, Azərbaycanda fəaliyyət göstərən Demokratik Rifah Partiyasının sədri, iqtisadçı Qubad İbadoğlu da Azərbaycanın Ukraynaya silah satdığına dair paylaşım edib.
Bu dezinformasiyada yer alan iddialarla bağlı uyğun sahənin mütəxəsissləri nə düşünür?
Hərbi-siyasi ekspert Ramil Məmmədli “Bakı-Xəbər”ə açıqlamasında bildirdi ki,
Ukraynada müharibənin başladığı ilk gündən Azərbaycan Respublikasının mövqeyi açıq və konkret olub: “Biz hər iki ölkə - Rusiya və Ukrayna ilə dərin əlaqələrə malik olan dövlət kimi bu prosesdə yalnız humanitar yardım prosesində iştirak etmişik. Bu gün də Azərbaycanın Ukraynaya humanitar yardımı davam edir. Həmin yardım isə ağır vəziyyətdə olan mülki vətəndaşlara yönəlib. İndi isə keçək Azərbaycanın Ukraynaya hərbi sursatlarla yardım etməsinə dair yayılan məlumatlara.
Əvvəlcə onu deyim ki, müharibənin başladığı ilk gündən Azərbaycanın bəzi KİV-ləri, siyasətçi, politoloq və hərbi şərhçiləri, o cümlədən ictimai fəalları Rusiya və Ukraynanın (əsasən də Ukraynanın) informasiya toruna keçərək, hər iki tərəfin yaydığı məlumatları Quran ayəsi kimi ağına-bozuna baxmadan yayıblar. Nəzərə almayıblar ki, bununla savaşan tərəflərin informasiya müharibəsində vasitəyə çevriliblər.
Qubad İbadoğlunun “təsdiqini tapan” xəbər kimi yaydığı bu məlumat isə bir neçə aspektdən milli və dövlət maraqlarımıza zərbə vurur.
Birincisi, Azərbaycan birmənalı olaraq, istək və təkliflərə baxmayaraq, nə Rusiyaya, nə də Ukraynaya silah və sursat satmır. Bu, Azərbaycan dövlətinin siyasi iradəsidir ki, müharibə edən tərəflər də dövlətimizin bu qərarına hörmətlə yanaşırlar.
İkincisi, Azərbaycan məhsulunun Ukrayna ordusuna gedib çıxması da faciə deyil. Çünki ölkəmiz dünyanın onlarla dövlətinə müdafiə sənayesi məhsulu satır. Bunların içərisində silah və sursatlar da var. Yəni, məsələn, Afrikanın, Asiyanın hansısa ölkəsi 2 il əvvəl bizdən öz "son istifadəçi" sənədi ilə aldığı silah və sursatı Ukraynaya göndəribsə, burada Azərbaycanın heç bir mövqeyi ola bilməz.
Həm də bütün satınalmalar BMT-nin reysterində qeyd olunur.
Üçüncüsü isə, özünü siyasətçi, Azərbaycanın milli maraqlarını düşünən şəxs kimi təqdim edən Qubad İbadoğlu anlamalı idi ki, hətta bu fakt olsa belə, reklam edilməsinə ehtiyac yoxdur. Nəinki ehtiyac yoxdur, hətta bunu etmək olmaz. Sözüm Qubad İbadoğluna və onunla eyni mövqedə olan şəxslərədir: Bir az azərbaycançılığınız olsun. Məsələlərə şəxsi prizmadan baxdığınız bəsdir. Azacıq da olsa hadisələrə milli, dövlət və Azərbaycan maraqlarından yanaşma nümayiş etdirin”.
Rusiya mediasının qərəzinin səbəbini anlamaq olar. Çünki müharibə aparan tərəfdir. İstəyir ki, Azərbaycan Ukrayna ilə heç humanitar səviyyədə belə əməkdaşlıq etməsin. Bəs Qubad İbadoğlu niyə belə edir? Bir daha sübut olunur ki, bizim bəzi siyasilər qrant və digər amillər səbəbindən milli maraqlara zərbə vurmağı belə asanlıqla gözə ala bilirlər.
Məhəmmədəli QƏRİBLİ
