Fevralın 6-da sübh tezdən qardaş Türkiyədən gələn acı xəbər Azərbaycan xalqının, dövlətinin dərin hüznünə, kədərinə səbəb oldu. Qardaş ölkədə baş verən dəhşətli zəlzələ nəticəsində çoxlu sayda insan tələfatının olması ölkəmizi də yasa bürüdü.
Xalqımız sevinci sevincimiz, kədəri kədərimiz olan qardaşlarımıza bu çətin günlərdə mənəvi dayaq olmaq üçün dəstək paylaşımları edir, duaları ilə Türkiyənin yanında olduğunu bildirir.
Eynilə 44 günlük Vətən müharibəsi zamanı türk qardaşlarımızın Azərbaycana haqq davasında mənəvi dəstək durduğu kimi. İstər xoş günlərdə, istərsə də çətin məqamlarda Azərbaycan daim qardaş Türkiyənin, Türkiyə isə Azərbaycanın yanında olur. Bu sarsılmaz birliyin qüdrətinə 44 günlük şanlı Vətən müharibəsində bütün dünya bir daha şahid oldu. Tarixi torpaqlarımızın işğalçılardan azad edilməsi üçün qalxdığımız Vətən savaşında qardaş ölkə Türkiyə haqq işimizi müdafiə edərək, Qarabağın azadlığa qovuşdurulmasında Azərbaycana həm mənəvi, həm də siyasi dəstək oldu.
Azərbaycan-Türkiyə tarixi qardaş xalqlar, qardaş dövlətlər tarixidir və biz bu tarixə nəzər salanda görürük ki, hər iki dövlət ən çətin, ən dar, ən məşəqqətli gündə belə bir-birinin yanında olub, bir-birinə dəstək nümayiş etdiriblər. Bu gün qardaş Türkiyədə baş verən zəlzələ və onun yaratdığı fəsadlar Azərbaycanda ciddi təəssüf və hədsiz həyəcana səbəb olub. Yaşından, kimliyindən, tutduğu vəzifədən asılı olmayaraq hər kəs qardaş ölkədə baş verən zəlzələyə təəssüfləndiyini bildirir. Hətta məktəblilər belə öz təəssüf hisslərini müxtəlif formada ictimaiyyətə çatdırmağa çalışır. Belə ki, məktəblilər onlara aid sosial şəbəkənin hekayə bölümündə “Keçmiş olsun Türkiyə” fotolarını qoyur. Bu isə o deməkdir ki, məktəblilər, azyaşlılar qardaş ölkədə baş verən təbii fəlakəti öz ürəklərində hiss edir və vatsapın hekayə bölümünə “Keçmiş olsun Türkiyə” ifadəsini yazmaqla onlara mənəvi dəstək olduqlarını bildirirlər.
Məlumdur ki, Azərbaycanla Türkiyə hər zaman bir-birinin yanında olub. Hər iki ölkəni tarixi, milli, dini və mədəni köklər bir-birinə bağlayır. Bugünkü münasibətlərimiz də böyük öndər Mustafa Kamal Atatürkün dediyi “Azərbaycanın kədəri - kədərimiz, sevinci - sevincimizdir” və ümummilli lider Heydər Əliyevin “Biz bir millət, iki dövlətik” fəlsəfəsinə əsaslanır. Tarixi köklərə, qardaşlığa əsaslanan Azərbaycan-Türkiyə əlaqələri bütün sahələrdə, o cümlədən siyasi, iqtisadi-ticarət, humanitar, hərbi və digər sahələrdə bu gün ən yüksək zirvədədir. Hər iki ölkə beynəlxalq müstəvidə də bir-birini birmənalı olaraq dəstəkləyir. Xalqlarımızın eyni soykökünə, dilə, dinə, mədəniyyətə və bir çox digər qarşılıqlı bağlara malik olması bu iki ölkəni həmişə bir-birinə doğma edib, sevincimiz də, kədərimiz də bir olub.
Belə bir vəziyyətdə Azərbaycanın Türkiyənin yanında olması qardaşlığa söykənir. Azərbaycan Türkiyəni bu çətin zamanında ondan qardaş əlini əsirgəməyib. Xatırladaq ki, 2021-ci ildə Türkiyədə baş verən meşə yanğınları zamanı Azərbaycan qardaş Türkiyənin yanında oldu. Yanğının söndürülməsi və daha geniş miqyas almasına imkan verilməməsi məqsədilə Türkiyəyə yardım dəstələri göndərmişdi.
Türkiyədə baş verən zəlzələ ilə bağlı görüntüləri izləyəndə insanın ürəyi parçalanır. Xüsusilə də uşaqların daşın, betonunda arasında qaldığını düşünəndə insanın qanı donur. Təbii ki, bu görüntüləri bizlə yanaşı, uşaqlar da, məktəblilər də izləyir. Onlar televiziyalarda yayımlanan xəbərlərdə, sosial şəbəkə vasitəsilə zəlzələnin necə fəlakətə səbəb olduğunu görürlər. Məktəblilərin bir qismi öz geyimlərini Türkiyəyə zəlzələdən əziyyət çəkənlərə göndərir, bəziləri isə öz dəstəyini sosial şəbəkənin hekayə bölümündə “Keçmiş olsun Türkiyə” fotolarını qoymaqla hadisəyə biganə qalmadıqlarlarını göstərirlər. İstənilən halda, göstərilən hər bir dəstək önəmlidir.
Günel CƏLİLOVA
