Ermənistan Baş Prokurorluğu keçmiş müdafiə naziri, “Hayastan” fraksiyasının rəhbəri Seyran Ohanyan barədə cinayət işinə başlamaq üçün parlamentə müraciət edib. Müraciəti təqdim edən baş prokuror Anna Vardapetyan Ohanyanın müdafiə naziri olduğu vaxtlar 2 hərbi hissənin ərazisini və binalarını satmaqda ittiham edildiyini açıqlayıb.
Prokurorluq 2008-2009-cu illərdə Seyran Ohanyanın 1,2 və 0,9 hektar sahəsi olan torpaq sahələrinin Müdafiə Nazirliyinin ehtiyacının olmaması səbəbi ilə bazar qiymətindən dəfələrlə ucuz qiymətə satılması barədə qərar verdiyini bildirib. Bununla yanaşı, Seyran Ohanyana qarşı daha 2 ittiham üzrə cinayət işinin açılması üçün parlamentə müraciət edilib.
Hesab edilir ki, bütün bunlar, əslində, Ermənistanda hakimiyyətə qarşı çıxan qüvvələrin inzibati yolla neytrallaşdırılmasının növbəti təzahürüdür. Baş verənlərlə bağlı “armenianreport” portalı yazır: “Keçmiş xidmət gələcəkdə məsuliyyətdən azad etmir. Bu gün Ermənistanın keçmiş müdafiə naziri, “Hayastan” parlament fraksiyasının rəhbəri, general Seyran Ohanyan özü üçün bu ifadəni hiss etməlidir, onun barəsində deputat toxunulmazlığından məhrum edilməsi barədə vəsatət daxil olub. Xatırladaq ki, parlament Ohanyana qarşı cinayət təqibinin başlanmasına razılıq verilməsi üçün baş prokurordan bir andaca üç vəsatət alıb. Birinci vəsatətə görə, Ohanyan müdafiə naziri olarkən xüsusilə külli miqdarda (işin iki epizodu) mənimsəmələr törədib, həmçinin şəxsi və qrup mənafelərinə əsaslanaraq, məmurların rəsmi maraqlarına zidd hərəkətlər edib. Eləcə də o, səhlənkarlıq nəticəsində ağır nəticələrə səbəb olub (iki epizod). İkinci və üçüncü vəsatətlərə görə, Ohanyan öz xidməti vəzifələrini yerinə yetirməyib, bu isə səhlənkarlıq nəticəsində ağır nəticələrə səbəb olub, həmçinin o, mənimsəmə yolu ilə yenidən xüsusi külli miqdarda əmlak mənimsəyib. Təbii ki, bu cür ittihamlar Ermənistan cəmiyyətini heç də təəccübləndirmədi, çünki demək olar ki, hamının Seyran Ohanyanın rəhbərlik etdiyi dövrdə Ermənistan ordusunda xidmət etmiş qohumu, qonşusu və ya sadəcə tanışı var. Və xidmət edənlərin hər biri o illərdə xidmətin “cazibədarlığı” haqqında aclıqdan və alt paltarın çatışmazlığından tutmuş irimiqyaslı, hərtərəfli korrupsiyaya qədər çox şey deyə bilər. Keçmiş hakimiyyət vaxtı vəzifədə olan Ohanyanın və ordu generallarının necə varlandığını bilməməliyikmi? Ohanyanın Müdafiə Nazirliyinə rəhbərlik etdiyi dövrdə Ermənistan ordusu cəmiyyətə və ictimai nəzarətə tam qapalı olub, orduda tez-tez qeyri-döyüş şəraitində əsgərlərin ölümü ilə nəticələnən “dedovşina” və cinayətlərə görə heç kim cəzalandırılmayıb. Çünki müdafiə naziri bütün bunların törənməsində birbaşa iştirak edib.
Onun haqqında Baş Prokurorluğun vəsatətləri ilə bağlı Ohanyanın gətirdiyi bəhanələr daha gülüncdür. Özünüz mühakimə edin. Ohanyan belə bəhanələr gətirir: “Bu işlər çoxdan başlayıb, ancaq Geqarqunik kazarmasında yanan əsgərlərimizin səsini boğmaq, ictimaiyyətin diqqətini bundan yayındırmaq və ümumi qəzəb dalğasının qarşısını almaq üçün vəsatət indi verilib. “Hayastan” fraksiyası yaxın vaxtlarda bizim təşəbbüsümüzlə ordudakı real problemlərin müzakirəsində iştirak edəcək. Qoy bugünkü müdafiə naziri gəlib çox konkret suallara cavab versin. Desinlər ki, niyə kreslolarını qorumaq, polis dövləti qurmaq üçün pul xərcləyirlər, amma əsgərlərə elementar şərait yaratmırlar ki, kazarmalarımız yanmasın? Mən qalib ordunun generalıyam. Ordunu darmadağın edənlər məni heç nədə günahlandıra bilməzlər”. Ohanyanın bəraət qazandırdığı məqamlara nəzər salaq. Bəli, Geqarqunikdə diri-diri yanan 15 əsgərimizin ölümündə indiki hakimiyyət birbaşa məsuliyyət daşıyır. Baş nazir, müdafiə naziri, Baş Qərargah rəisi və “arxa siçovul” generalları da məsuliyyət daşıyırlar. Onlar hakimiyyətdə olduqları beş il ərzində heç olmasa ordunu müasir istilik və təhlükəsizlik sistemləri olan normal kazarmalarla təmin etməli idilər. Təəssüf ki, bu edilmədi və əsgərlərimiz hakimiyyətin və generalların cinayətkar ehtiyatsızlığının əvəzini canları ilə verdilər. Bəs insaf naminə, Seyran Ohanyan 9 ildə (Bir il Baş Qərargah rəhbərliyində, 8 il isə Müdafiə Nazirliyində) ordu üçün nə edib? Sənədlərdə fəxrlə kazarma adlandırılan tövlə otaqlarında əsgərlərimiz onun vaxtında yerləşdirilməyiblərmi? Yadınızdadır, Seyran Muşeqoviç, sizin zabitlər əsgərlərin valideynlərindən həyatlarını nizamlamaq üçün necə pul qoparırdılar? Ohanyan hazırkı naziri “əsgərlərə elementar şəraitlə təmin olunmadığı halda kreslosunu qorumaq və polis dövləti qurmaq üçün pul xərcləməkdə” ittiham edir. Bu isə cəmiyyətimizdə qəzəb doğurmaya bilməz - Ohanyan və onun generalları ordunu qarət etməklə necə varlandılar, bu, indiki müdafiə nazirinin heç ağlına da gələ bilməz. O ki qaldı “polis dövləti”nə. Bəli, indiki Ermənistan dünya üçün demokratiya nümunəsi deyil. Amma bu gün dünənlə, Köçəryan və Sarkisyanın dövründəki ilə müqayisə oluna bilməz. Bunu cəmiyyət özü də hiss edir. Ən azından, tənqidi yazılara görə hakimiyyət tərəfindən media təmsilçiləri döyülmür, onlara qarşı qondarma cinayət işi qaldırılmır. Polis dövləti Köçəryan və Sarkisyanın dövründə olub, Paşinyanın dövründə isə yox. Ohanyan qalib ordunun generalı olduğunu deyir. Amma unutmayaq ki, Sarkisyan 2016-cı ilin aprelində döyüş zamanı etdiyi səhv hesablamalara görə Ohanyanı işdən çıxarıb. Yəni o, Müdafiə Nazirliyini məğlubedilməz general halında tərk etməyib, məğlub biri kimi oranan uzaqlaşdırılıb. Axı, Seyran Muşeqoviç, bu gün biz polis dövlətində yaşamırıq, baxmayaraq ki, sən bunun əksini deyirsən. Əgər sənin heç bir günahın yoxdursa, onda nədən bu qədər qorxursan? Məhkəməyə gedin və günahsız olduğunuzu sübut edin. Yoxsa, günahlarınızın çoxluğundan qorxursunuz?”.
Nahid SALAYEV
