Fransadan Azərbaycana yönəlik növbəti həyasızlıq. İndi də Fransa erməni lobbisi Əliyevin Avropa ilə geniş qaz strategiyasına qarşı hücumlarını genişləndirir. Düzdür, erməni lobbisi əzəldən Azərbaycanın neft strategiyasına qarşı olub. Ancaq son dövrlərdə bu istıqamətdə Azərbaycanın Avropada artan önəmi onları daha çox narahat edir.
Bu arada Fransa parlamenti deputatları Avropa İttifaqı-Azərbaycan əməkdaşlığını tənqid ediblər. Onlar Aİ ilə Azərbaycan arasında enerji əməkdaşlığının genişləndirilməsi planlarını “ermənilərin kürəyinə zərbə” adlandırıblar: “Aİ ilə Azərbaycan arasında qaz sazişi layihəsi ermənilərin kürəyinə zərbədir. Biz cəlladlarla sövdələşərək qurbanları qoruya bilmərik. Fransa adından Emmanuel Makron bu əxlaqsız razılaşmanı pisləməlidir. Avropa İttifaqına hörmətsizlik etməyi dayandırın! Bizə Azərbaycan qazı lazım deyil. Biz Aİ-də bərpa olunan enerji istehsal etməliyik. Biz erməni demokratiyasını dəstəkləməliyik”.
Görünən odur ki, erməni lobbisi çox narahatdır.
“Fransa deputatlarının timsalında bu cür pozucu çağırışları Avroittifaq ciddiyə almayacaq”
Sözügedən məsələni “Bakı-Xəbər”ə şərh edən politoloq Məhəmməd Əsədullazadə bununla bağlı bir sıra məqamlara toxundu: “Əvvəla, Avropa və Azərbaycan arasında enerji sahəsində əməkdaşlıq strateji əhəmiyyət daşıyır. Bu, ilk növbədə Avropa İttifaqının enerji təhlükəsizliyinə lazımdır. Erməni lobbisinin, onlardan bəslənən satın alınmış deputatların istəkləri elə bir önəm kəsb etmir. Ona görə ki, burada əsas Avropa İttifaqı özü maraqlıdır. Avroittifaq Rusiya ilə münasibətlər pisləşəndən sonra alternativ mənbələr hesabına birlik ölkələrini qazla təmin etmək istəyir. Alternativ mənbələr də çox məhduddur. Onlardan biri də Azərbaycandır. Ölkəmiz artıq 2020-ci ilin sonundan Avropa bazarına qaz ixrac edir. Ermənilərin buna mane olmaq cəhdləri regionda sülhə deyil, yeni müharibənin alovlandırılmasına xidmət edir. Erməni lobbisinə bağlı olan qruplar meqa layihənin reallaşmasını önləmək istəyirlər. Avropa İttifaqının rəsmiləri bunu yaxşı bilir. Ona görə də əminliklə deyirəm ki, Fransa deputatlarının timsalında bu cür pozucu çağrışları Avroittifaq ciddiyə almayacaq. Çünki Avropa regionunda enerji böhranı davam edir. Azərbaycan həm mavi yanacaq, həm də yaşıl enerjinin ixracını reallaşdıracaq. Bu xüsusda ermənilərin avantürası Avropa İttifaqının öz enerji maraqlarının üstündən keçməsinə əsas verə bilməz. Cənubi Qafqaz regionunda siyasi sabitliyin əldə edilməsində Brüssel də maraqlıdır. Ona görə ki, regional şərtlər bunu tələb edir. Və regionda siyasi sabitliyin əldə edilməsi məhz Avropa İttifaqının enerji maraqlarına cavab verir. Hesab edirəm ki, Avropa İttifaqı erməni avantürasına getməz və Azərbaycanla enerji sahəsində əlaqələr Brüsselin geostrateji maraqlarına xidmət edir”.
Vidadi ORDAHALLI
