Məlum olduğu kimi, Ermənistan, üzərinə öhdəlik götürməsinə baxmayaraq, Zəngəzur dəhlizinin açılması ilə bağlı indiyədək konkret addımlar atmayıb. Əksinə, bu yöndə daha da təxribatçı mövqedən çıxış edir.
Ermənistanın keçmiş baş naziri Qrant Baqratyan qeyd edir ki, Zəngəzur dəhlizi Azərbaycanın istədiyi şərtlər əsasında açılacaq: “Siz Azərbaycanın hansı yolla Zəngəzur dəhlizini açacağını soruşursunuz. Bu haqda üçtərəfli bəyannamənin 9-cu maddəsində yazılıb. Orada Azərbaycanın əsas hissəsi ilə Naxçıvanı birləşdirəcək yeni yolun tikilməli olduğu yazılıb. Üstəlik, yolu Ermənistan özü tikməlidir və sənəddə maneəsiz hərəkətdən bəhs edildiyini unutmayın. Azərbaycan Naxçıvana dəhliz tələb edir. Bu haqda üçtərəfli bəyanatda yazılıb. Azərbaycan, əlbəttə ki, Naxçıvana yolu açacaq. Amma Qarabağda üç-dörd ilə bir nəfər də olsun erməni qalmayacaq. Bu gün Qafan və Cermukda insanlar evlərini satır. Bu o deməkdir ki, Zəngəzurda da bir nəfər də olsun erməni qalmayacaq”.
Ancaq ermənilərin Qafan və Cermukdan çıxması, oradakı evləri satışa çıxarması daha çox müharibəyə hazırlaşmaq anlamına gəlir. Çünki yolların açılması həmin ərazilərin sosial inkişafına müsbət təsir göstərəcək. Ermənistanın belə bir niyyəti olsaydı, o zaman Qafan, Cermuk və digər sərhədə yaxın ərazilərdə yerləşən ermənilər evlərini satmazdılar. Bu baxımdan sözügedən proseslər qarşı tərəfin müharibəyə hazırlaşmağından xəbər verir.
“Hesab edirəm ki, belə bir təxribata gedərlərsə, bu onlara baha başa gələcək”
Məsələyə münasibət bildirən hərbi ekspert Ramil Məmmədlinin fikrincə, Ermənistan istənilən təxribata gedə bilər: “Biz nəzərə almalıyıq ki, 44 günlük Vətən müharibəsində Ermənistan ciddi məğlubiyyətə uğrasa da, orada müəyyən revanşist əhval-ruhiyyə qalmaqdadır. Bu təkcə oradakı revanşist müxalifətlə bağlı olan məsələ deyil. Paşinyanın komandasında da bu mövqedə olanlar var. Biz nəzərə almalıyıq ki, Ermənistan formal olaraq müstəqil dövlətdir. Xarici oyunçuların bu ölkəyə təsir imkanları böyükdür. Ermənistan birtərəfli şəkildə Avropa İttifaqı monitorinq missiyasını sərhədə gətirməklə, regionda geosiyasi qarşıdurmanı körükləyir. Çalışır ki, regionda marağı olan böyük güclər toqquşsun. Ötən ilin sentyabrında Ermənistan Azərbaycanla sərhəddə genişmiqyaslı təxribat törətdi. Buna cavab olaraq ordumuz düşmənə güclü zərbə endirib, sərhəddəki hakim yüksəklikləri nəzarətə götürdü. Ondan sonra Ermənistanda belə fikirlər var ki, güc yolu ilə əldən verilən yüksəkliklər geri alınmalıdır. Ermənistan tərəfi elə hesab edir ki, Aİ missiyasının çətiri altında istənilən təxribata gedə bilərlər. Sərhədə yaxın məntəqələrdən mülki insanları çıxarıb hücüma keçə bilərlər. Hesab edirəm ki, belə bir təxribata gedərlərsə, bu onlara baha başa gələcək. Ordumuzun düşmənə vurduğu zərbə ötən ilin sentyabrından da ağır olacaq. 2020-ci il müharibəsində olduğu kimi, bu dəfə də himayədarları erməniləri xilas edə bilməyəcəklər. Bu baxımdan Ermənistanın müharibəyə hazırlıq cəhdlərini perspektivsiz hesab edirəm. Çünki ötən 2 ildə Azərbaycan Silahlı Qüvvələri daha da güclənib. Yeni komando birlikləri yaradılıb və s. Ona görə də müharibəyə əl atsalar, bu onlar üçün intihar olacaq”.
Vidadi ORDAHALLI
