Hazırda ermənilər bütün dünya boyu təbliğat aparırlar ki, güya Azərbaycan Laçın yolunu bağlamaqla Xankəndidəki ermənilərə genosid hazırlayır. Belə qələmə verirlər ki, güya biz belə vəziyyət yaratmaqla, həm də Xankəndi və ətraf rayonlarda yaşayan erməniləri oradan deportasiya etdirmək istəyirik.
Təbiidir ki, bütün bunlar yalandır və növbəti erməni məkirinin tərkib hissəsidir. Cünki Azərbaycan heç bir yolu bağlamayıb, yalnız ərazilərimizdə törədilən ekoloji cinayətlərə etiraz edir. Xankəndiyə gedən humanitar yüklər, xəstələri daşıyan avtomobillərə heç bir maneçilik yoxdur. Təəssüflər olsun ki, bizim bəzi KİV-lərimiz, güya “qəhrəmanlıq” edirlər kimi, güya Xankəndinin tam boşaldığı, oradakı ermənilərin şəhəri tərk etdiyi haqda mənşəyi bilinməyən məlumatlar yayırlar. Hansısa şəkilləri nümayiş etdirməklə, Xankəndidə əhalinin az olduğuna dair rəy formalaşdırmaq istəyirmiş kimi davranırlar. Bəli, Xankəndidə heç də ermənilərin iddia etdiyi sayda, yəni 120 min erməni yoxdur. Ancaq bu hec də o anlama gəlmir ki, şəhər tam boşdur. Təbiidir ki, oradakı sıxlıq, Azərbaycanın digər rayonlarında olduğu kimi, Bakı ilə müqayisəolunmaz həddədir. Ancaq bu heç də o anlama gəlmir ki, biz hansısa bir video və fotonun fonunda fəxarətlə şəhərin bizim təzyiqimizlə boşaldığını iddia edək. Əslində bəzi KİV-lərimizin bu yöndə apardığı təbliğat dövlətimizin yürütdüyü siyasətlə ziddiyyət təşkil edir. Niyəsini izah edək. Əvvəla, biz dövlət olaraq heç vaxt deməmişik ki, məqsədimiz Qarabağdan dinc erməniləri tam təmizləməkdir. Prezident İlham Əliyev çıxışlarında deyir ki, Qarabağda yaşayan ermənilər bizim vətəndaşlarımızdır və onların taleyini, onların gələcək həyatını hər hansı bir ölkə ilə, o cümlədən Ermənistanla müzakirə etmək fikrində deyilik. Göründüyü kimi, ölkə başçısı bizim vətəndaşımız olan ermənilərlə bağlı mövzunu Ermənistanla belə müzakirəyə lüzüm görmür. Bu, həm də o anlama gəlir ki, biz sözün bütün mənalarında vətəndaşlığımızı qəbul edəcək ermənilərə sahib çıxacağıq. Bəli, məhz sahib çıxacağıq, onları Qarabağdan qovmağı düşünmürük. Hansısa erməni separatçılığa meyl edib vətəndaşlığımızı qəbul etmək istəməyəcəksə, onlara qapı açıqdır.
Erməni ictimai xadim, Qarabağ Erməniləri Hərəkatının rəhbəri Artur Ağacanov müsahibəsində bildirib ki, əksər hallarda Ermənistan sakinləri Azərbaycanla münasibətləri yaxşılaşdırmaq, qonşu Azərbaycan xalqı ilə sülh şəraitində yaşamaq istəyirlər. Onun sözlərinə görə, məhz Azərbaycan kimi qonşu ilə dost olmaq, iqtisadi əməkdaşlığı inkişaf etdirmək olar və olmalıdır. O bildirib ki, bu, Qarabağ erməniləri üçün də olduqca faydalıdır.
Biz anlayırıq ki, Qarabağ erməniləri ilə birbaşa təmasa mane olan amillər var. Çünki orada silahlı erməni tör-töküntüsü qalıb, Araik Aryunutyan separatçı rejimi var. Yalnız onlar bölgədən çıxarılmalı, dinc erməni sakinləri Azərbaycanın üçrəngli bayrağı altında yaşamağı qəbul etməlidirlər. Azərbaycan Prezidenti mövqeyini açıq şəkildə söyləyib ki, erməni əsilli vətəndaşlarımızın sülh içində yaşamasına təminat veririk. Sadəcə, nə qədər ki, qondarma rejim mövcuddur, bu mümkün olmayacaq.
Ermənistan üçtərəfli sənəddəki 4-cü bəndi icra etməyə məcbur olacaq. Artıq Ermənistan Silahlı Qüvvələri öz hərbi texnikasını Qarabağdan çıxarır, ora daha hərbçi göndərməyəcək. Yerdə qalır separatçı rejimlə haqq-hesabı çürütmək və bunu da Azərbaycan Ordusu hər an həyata keçirməyə hazırdır. Sadəcə, bu həddə qədər biz xəbərdarlıq edirik ki, məsələ dinc yolla həll olunsun. Əgər eşitməyəcəklərsə, güc yolu ilə problemə son qoymaq hüququmuzu özümüzdə saxlayırıq. Ona görə hələlik onlarla birbaşa təmas real görünmür. Ancaq bu o demək deyil ki, bizim KİV-lər erməni mediasında gedən siyasi mahiyyət kəsb edən və ermənilərin xeyrinə olan materialları yalnız hərfi tərcümə etməklə, heç bir şərh vermədən Azərbaycan oxucusuna təqdim etməlidir. İndiki məqamda Xankəndidən erməniləri tam “qaçırmışıq” kimi məlumatları həvəslə tirajlayan media nümunələrinin canfəşanlığı isə erməni təbliğatına verilən dəstəkdən başqa nəsə deyil. Bunu kimlərsə bilməyərəkdən, təcrübəsizlikdən edirsə, yanlışını düzəltsin!
Məhəmmədəlİ QƏRİBLİ
