Xarici İşlər Nazirliyinin (XİN) mətbuat katibi Ayxan Hacızadə Azərbaycanın İran İslam Respublikasındakı Səfirliyinə qarşı törədilmiş terror aktının təfərrüatları barədə keçirilən brifinqdə deyib ki, İrandakı Azərbaycan Səfirliyinin küçəyə baxan kameraları vaxtı 24 dəqiqə erkən göstərir.
O qeyd edib ki, səfirliyin xaricindəki və içərəsindəki kameraların vaxtında 24 dəqiqə fərq var.
Məlumat üçün qeyd edək ki, 27 yanvar 2023-cü il tarixində Bakı vaxtı ilə səhər saat 8:30 radələrində Azərbaycan Respublikasının İran İslam Respublikasındakı Səfirliyinə terror hücumu olub. Hücum edən şəxs avtomat silahla mühafizə postunu yararaq, mühafizə xidmətinin rəisini qətlə yetirib. Səfirliyin iki nəfər mühafizə əməkdaşı da hücumun qarşısını alarkən yaralanıb. Hazırda hadisənin istintaqı aparılır.
Səfirliyə hücumla bağlı terrorun yeni məqamları ortaya çıxmaqla, bir sıra suallar yaranır. Necə olur ki, səfirliklə bağlı müşahidə kameraları 24 dəqiqəlik gecikmə ilə çəkiliş aparıb? Bunun baş verməsi kənar müdaxilədən qaynaqlana bilərmi?
“Nəzərə alsaq ki, bu müdaxilə planlı və peşəkar şəkildə olub, bunu önləmək və ya bundan xəbər tutmaq çətindir”
Məsələyə münasibət bildirən Aydınlar Partiyasının sədri, hüquqşünas Qulamhüseyn Əlibəylinin fikrincə, müşahidə kameraları arasında 24 dəqiqəlik fərqin olması təsadüfü deyil və bu onu göstərir ki, qabağcadan kameralara kənardan müdaxilə olub: “Hazırda informasiya texnologiyaları elədir ki, istənilən müşahidə kamerasına, hətta küçədəki işıqfora kənardan müdaxilə etmək mümkündür. Ona görə də səfirliyimizin müşahidə kameralarına kənardan elektron müdaxilənin olması tamamilə mümkündür. Çünki bütün bunlar kiber hücumun tərkib hissəsider. Ona görə də hesab edirəm ki, səfirliyimizdəki terror aktı təsadüfi deyil. Müşahidə kameralarına müdaxilə ilə məlum terror arasında əlaqə var. Məsələ ondadır ki, İran hakimiyyət orqanları tərəfindən bu planlaşdırıldığı üçün müvafiq qurumlar da özləri birbaşa kameralara müdaxilə ediblər. Səfirlikdə terror aktını törədən şəxsin fərdi şəkildə bunu etdiyini mümkün hesab etmirəm. Bunu qabaqcadan İran xüsusi xidmət orqanlarının etdiyini düşünürəm. Qurumlar bunu qabaqcadan hazırlayıb və daha sonra məlum müdaxiləni həyata keçiriblər. Kənardan elektron vasitələrlə müdaxilə edib müşahidə kameralarının saatını geri çəkmək mümkündür. Nəzərə alsaq ki, bu müdaxilə planlı və peşəkar şəkildə olub, bunu önləmək və ya bundan xəbər tutmaq çətindir. Xüsusən də başqa ölkənin ərazisində. İstintaqın gedişində bu və digər məqamlar üzə çıxa bilərdi. Ancaq təəssüflər olsun ki, istintaqın gedişi məhz İran hakimiyyət orqanlarının nəzarətində olduğu üçün bu barədə dəqiq məlumat almağımız çətin olacaq. Çünki İran maraqlı deyil ki, terror təfərrüatlı şəkildə araşdırılsın. Bunu sifariş verənlər ortaya çıxsın. Buna baxmayaraq, Azərbaycan tərəfi xüsusilə təkid etməlidir ki, istintaqın gedişində, istintaq hərəkətlərində iştirak etsin. İstintaqın aparılmasında Azərbaycanın müvafiq qurumları iştirak etsin”.
Partiya sədri hesab edir ki, Azərbaycan buna nail ola bilsə, bəlkə o zaman həqiqətlər ortaya çıxar.
Vidadi ORDAHALLI
