MEDİA Agentliyinin icracı direktoru Əhməd İsmayılov Mətbuat Şurasının toplantısında deyib ki, redaksiyalarda bir sıra ştatlarda fəaliyyət göstərənlər də Media Reyestrində qeydiyyata alınacaq.
O bildirib ki, bununla bağlı MEDİA Agentliyi Əmək və Əhalinin Sosial Müdafiəsi Nazirliyində görüş keçirib, məsələ həllini tapıb:
"Bu hal "Media haqqında" qanundakı problemdən yox, media qurumlarının redaksiyada vəzifələri düzgün qeyd etməməsindən irəli gəlir. Çünki həmin redaksiyalarda texniki şöbələr də var ki, oranın əməkdaşları jurnalist deyil. Media Reyestrində bu şəxslərin vəzifəsi şöbə müdiri kimi göstərilib. Həmin şöbə müdiri ipoteka krediti götürmək üçün hər hansısa bir banka müraciət edəndə, bank işçisi onun kim olduğunu bilmir və problem yaranır. Biz bununla bağlı əmək və əhalinin sosial müdafiəsi naziri Sahil Babayevə müraciət etdik. Nazir və onun komandası bizə yol göstərdi və problemi aradan qaldırdıq. Artıq redaktorlar, şöbə müdirləri də jurnalist kimi qeydiyyata alınacaq”.
Yayılan bu məlumatla bağlı baş redaktorların reaksiyasını öyrəndik.
Rəfail Becanov: “...onların sosial imtiyazlardan istifadə etmək hüquqlarını özündə ehtiva edəcək və mən bunu müsbət dəyərləndirirəm”
Cebhe.info saytının baş redaktoru Rəfail Becanov qəzetimizə açıqlamasında bildirdi ki, jurnalistlərin Media Reyestrindən keçməsi ilə bağlı lazımsız bir kampaniya başladılıb: “Bu kampaniyanın məqsədi prosesi gözdən salmaq, bunu cəmiyyətin gözündə etibarsız ideyaya çevirməkdən ibarətdir. Əslində Media Reyestri, hər zaman deyildiyi kimi, qanunvericiliyin də tələbində var ki, jurnalist təyin etmir, yaxud da jurnalistin jurnalistliyini təsdiq etmir. Sadəcə olaraq jurnalistlərin müəyyən sosial imtiyazlara malik olmasinı özündə ehtiva etdirən bir bazadır. Hesab edirəm ki, bundan bu şəkildə narahat olmağın xüsusi səbəbləri var. Bu səbəblər də, təbii ki, prosesi gözdən salmaq, prosesin əleyhinə fəaliyyət göstərmək və prosesi etimadsızlaşdırmaqdır. O cümlədən də media subyektlərinin qeydiyyatı məsələsinə gəldikdə, media subyektləri naməlum siyahıya, naməlum saya malik olmamalıdır. Hər halda bəlli bir bazası olmalıdır və bu şəkildə də həyata keçirilməlidir. Bunların hamısını birləşdirib, bir hücum təşkil etmək, xüsusilə qanunun qəbul olunmasından və təsdiqlənməsindən bir il sonra Media Reyestri ilə bağlı sənədlərin, təqdimatların hazırlanıb cəmiyyətə təqdim olunduğu müddətdən uzun müddət keçəndən sonra bunları etmək xüsusi maraqlı dairələrin sifarişinə bənzəyir. Jurnalistlərin, redaktorların, istərsə də şöbə müdirlərinin Reyestrə düşməsi də təbii bir haldır. Bu hal onların da sosial imtiyazlardan istifadə etmək hüquqlarını özündə ehtiva edəcək və mən bunu müsbət dəyərləndirirəm”.
Hacıbəy Heydərli: “Yaxın zamanda Azərbaycan mətbuatı saflaşdırılacaq və mətbuata yeni nəfəs gətiriləcək”
Azxeber.com saytının baş redaktoru Hacıbəy Heydərli “Bakı-Xəbər”ə bildirdi ki, bu məsələ jurnalistlər tərəfindən birmənalı qarşılanmayan bir anlaşılmazlıq idi: “Jurnalistlərin ağıllarında bununla bağlı xeyli suallar vardı. Media İnkişaf Agentliyinin rəhbəri Əhməd İsmayılov dünən bununla bağlı qərarını açıqladı. Qərar verilib ki, artıq şöbə müdirləri, redaktorlar da jurnalist kimi media reysterinə alınacaqlar. Əslində çox düzgün və yerində verilmiş bir qərardı. Çünki son vaxtlar görürük ki, Media Reyestri ətrafında yersiz müzakirələr aparılır. Bu məsələləri siyasiləşdirmə cəhdləri var. Orda olan kiçik nüansları belə qabardaraq cəmiyyətə səhv şəkildə təqdim etmək istəyən qüvvələr mövcuddur. Belə olan bir məqamda uzun illər jurnalistika sahəsində dövlətə və dövlətçiliyə bağlı olan şəxsləri də məhz bu xırda nüanslar vasitəsilə öz tərəflərinə çəkmək istəyirdilər. Amma artıq bununla bağlı qərar da verildi. Şöbə müdirləri, qəzetlərdə digər sahələrdə çalışan redaktorlar Media Reyestrində jurnalist kimi qeydə alınacaq. Bu çox düzgün qərardı. Mən bildiyim qədəri ilə, Əmək və Əhalinin Sosial Müdafiəsi Nazirliyi ilə Media İnkişaf Agentliyinin rəhbərlərinin görüşündən sonra verilmiş bir qərardır. Artıq razılığa gəlinib. Düşünürəm ki, jurnalistləri düşündürən digər məsələlər də tez bir zamanda həllini tapacaq və Media Reyestri ümumilikdə Azərbaycan mətbuatına, Azərbaycan jurnalistikasına yeni çağ gətirə biləcək. Təbii ki, istənilən yenilik cəmiyyətlərdə normal qarşılanmır. Media Reyestri ətrafında olan söz-söhbətlər təbiidir. Amma iradə olarsa, peşəkar jurnalistlər bu məsələdə Agentliyə dəstək olarsa, yaxın zamanda Azərbaycan mətbuatı saflaşdırılacaq və mətbuata yeni nəfəs gətiriləcək”.
Məhəmmədəli QƏRİBLİ
