İran və Ermənistan - iki terrorçu dövlətin qardaşlığı bütün sahələr üzrə davam edir. Hətta vəziyyət o həddə çatıb ki, Ermənistan banklarında sanksiyalar altında olan İranın “çirkli pulları”nın yuyulması açıq etiraf edilir.
Bununla yanaşı, İranın Ermənistana Azərbaycana qarşı tank əleyhinə raket sistemləri, “şəhid dron”ları verməsi faktı da üzə çıxıb.
İran və Ermənistan faktiki olaraq hər 2 sanksiya dönəmində maliyyə əməliyyatlarında xüsusi fəallıq nümayiş etdirib. ABŞ-ın sanksiyalarının birinci mərhələsində, M.Əhmədinejadın hakimiyyəti dövründə banklar erməni biznes qrupları ilə sıx əlaqələrdə olub. Dünyanın ən nüfuzlu media orqanları qeyd edir ki, İran bank sanksiyalarından yan keçmək üçün Ermənistana üz tutub.
İran hələ 2010-cu ildən qeyri-leqal pul vəsaitlərini yerləşdirmək üçün Ermənistanda bank fəaliyyətini genişləndirməyə çalışıb.
İranın bu addımları ölkəmizə qarşı açıq düşmənçilik kimi izah edilə bilərmi?
Hərbi-siyasi ekspert Emin Həsənli “Bakı-Xəbər”ə bildirdi ki, İran hər zaman Ermənistanı dəstəkləyib: “Biz birinci Qarabağ müharibəsi dönəmində də bunu görmüşük. Sonrakı zamanda da İran blokada şəraitinə salınan Ermənistan üçün əsl nəfəslik rolunu oynadı. Sərhədini Ermənistanın üzünə açıq qoydu və ona necə lazımdır dəstək verdi. İndi də Ermənistana yeni silahlar verir. Təəssüflər olsun ki, təqdim etdiyi silahın birinin adı da “şəhid”dir. Ermənistan hara, şəhid hara? İranla Ermənistan arasında çirkli pulların yuyulması, narkotik vasitələrin tranziti əməliyyatları həyata keçirilir. Onlar arasında həm də qanunsuz silah dövriyyəsi həyata keçirilir. Zamanında Azərbaycanın işğal altında olan torpaqlarından bu məqsəd üçün geniş istifadə edirdilər. İran İkinci Qarabağ müharibəsindən sonra Ermənistanla əməkdaşlığı daha da genişləndirib. İran rəsmilərinin Ermənistana qardaş səfərləri reallaşır. Zəngəzur dəhlizi ilə bağlı İran konkret olaraq pozucu mövqe tutur. Bizi təhdid etmək məqsədilə Araz boyu hərbi təlimlər həyata keçirdi. Axırda da səfirliyimizdə terror hadisəsi törətdi. Ancaq bunların heç bir faydası olan deyil. Çünki sonda qalib biz olacağıq. Çox təəssüflər olsun ki, İranın çirkli pullarının Ermənistan bankları vasitəsilə yuyulmasına ABŞ və Qərb loyal yanaşır.
ABŞ mediasındakı iddialara görə, İran iqtisadiyyatını Ermənistan və İraq bankları ayaqda saxlayır. Tehran bir çox pul transferində xüsusilə İrəvan mərkəzi banklarından istifadə edir.
İran ona qarşı sürülən nüvə proqramı səbəbilə beynəlxalq işləri Ermənistan və İraq banklarınından istifadə edərək həyata keçirir. İşğal dönəmində də Ermənistan Qərbi əmin edirdi ki, onun bank sektoru ciddi nəzarət altındadır və İran erməni bankları üzərindən pulların yuyulmasını həyata keçirə bilməz. Lakin ABŞ rəsmi şəxslərinin sözlərinə görə, İranın Ermənistan tərəfdən işğal edilmiş Dağlıq Qarabağdakı erməni banklarına sərbəst çıxışı var, oradan İran vəsaitləri özünün nüvə və raket proqramlarının genişləndirilməsi, habelə Yaxın Şərqdəki terrorçu təşkilatların maliyyələşdirilməsi üçün istifadə edib. Hazırda bu imkanların çoxu İranın əlindən çıxması səbəbindən belə aqressiya ortaya qoyur”.
Məhəmmədəli QƏRİBLİ
