“Müasirlik o deyil ki, dənizkənarı bulvarda, bağlarda, parklarda gələcək həyat yoldaşları ( hələ o da olsa...) ilə camaatın gözü qarşısında…”
Bu gün - 2 fevral Azərbaycanda Gənclər Günüdür. Xatırladaq ki, 1997-ci ildən 2 fevral tarixi ölkəmizdə Gənclər Günü kimi qeyd olunur. 2 fevral tarixinin Gənclər Günü elan olunması mərhum prezident Heydər Əliyevin adı ilə bağlıdır. Ulu öndərin hakimiyyətə ikinci dəfə qayıdışından sonra Azərbaycanda dövlət gənclər siyasətinin əsas qoyulub.
Azərbaycan gəncliyinin bugünkü vəziyyəti, problemləri, düşüncəsi və gələcəyə baxışı ilə bağlı yazıçı Xeyrəddin Qoca ilə həmsöhbət olduq.
- Xeyrəddin müəllim, 2 fevral Azərbaycanda Gənclər günüdür. Azərbaycan gəncinin hazırkı vəziyyəti sizi qane edirmi?
Azərbaycan gəncliyi haqqında fikirlərimi soruşursunuz. Azərbaycan gənci ilə bağlı müsbət və mənfi fikirlərim var. Müsbət azdır, mənfi çoxdur. Müsbət odur ki, gənclərimiz böyük qəhrəmanlıq göstərib, torpaqlarımızı geri aldılar. Biz onlara çox borcluyuq! Mədəni, tərbiyəli, vətənpərvər gənclərimiz var və bir neçə müsbət cəhətlərini də saymaq olar...
- Bəs mənfi cəhətləri nədir?
Mən daim fikir verirəm, çox sayda gənclərimiz zamanında bizim gördüyümüz gənclərə heç bənzəmirlər. Nə geyimlərində, nə danışıqlarında, nə ünsiyyətlərində, nə tapşırılan işləri lazımınca yerinə yetirməkdə, nə mədəniyyətdə, nə tərbiyədə! Yox, mən demək istəmirəm ki, onlar keçmişdəki kimi olmalıdırlar, müasirliklə ayaqlaşmamalıdırlar. Əsla! Amma müasirlik o deyil ki, saçlarını amerikansayağı qırxdırıb, iyrənc saqqal buraxıb molla, keşişə bənzəsinlər! Müasirlik o deyil ki, dilimizi bir kənara qoyub, bir-biri ilə başqa dillərdə danışsınlar! Müasirlik o deyil ki, televiziya efirlərində özlərini nalayiq aparsınlar, şit-şit hırıldayıb, gülsünlər! Müasirlik o deyil ki, dənizkənarı bulvarda, bağlarda, parklarda gələcək həyat yoldaşları ( hələ o da olsa...) ilə camaatın gözü qarşısında qucaqlaşıb öpüşsünlər! Müasirlik o deyil ki, bu gün evlənib, bir aydan sonra boşansınlar! Müasirlik o deyil ki, televiziya efirlərində özlərinə arvad, kişi axtarsınlar! Müasirlik o deyil ki, gündə bir şou düzəldib, insanların ətini töksünlər! Müasirlik o deyil ki, vəzifəyə gedən kimi rüşvət alsınlar, ağsaqqalı qarasaqqalı, ağbirçəyi saymasınlar! Müasirlik o deyil ki, orada-burada yekə-yekə danışıb, özlərini göstərsinlər! Müasirlik o deyil ki, başlarına papaq əvəzinə qara bir şey keçirsinlər ki, adamlar onlardan qorxsun! Müasirlik o deyil ki, böyüklərə cavab qaytarıb, aqressiv hərəkətlər nümayiş etdirsinlər! Oxumaq, savadlanmaq belələrinə yaddır! Onlar yüz faiz cahildirlər! Həyatın gəlişindən-gedişindən heç nə anlamırlar! Bu gün üçün yaşayıb, sabahı düşünməyənlərdir!
- Sizcə, müasir Azərbaycan gənci necə olmalıdır?
Gənclər haqqında çox yazmaq, çox danışmaq olar. Biz istəyirik ki, onlar təhsilli olsunlar, savadlı, dünyagörüşlü, mədəni olsunlar, böyük-kiçik yeri bulsinlər, vətənə, torpağa bağlı olsunlar. Lovğalıqdan, özlərini gözə soxmaqdan çəkinsinlər.
- Bu gün Azərbaycan gənclərinin nə kimi problemləri var?
Gənclərin problemləri həmişə olub və olacaq. Yaşamaq, oxuyub təhsil almaq, işə düzəlmək, ailə qurmaq, həyatda qalmaq... Bunlar gənclər üçün həmişə problemdir. Bu problemlərin çoxu da özlərindən qaynaqlanır. Yuxarıda saydığım nöqsanlarına, çatışmazlıqlarına görə!
- Azərbaycanın dövlətçiliyik məsələsində gənclərin rolunu necə qiymətləndirirsiz?
Biz istəyirik ki, gənclər bütün dünyada Azərbaycanı təmsil edə bilsinlər, xalqımızın, dövlətimizin şərəfini qorusunlar. Axı, gənclər bizim gələcəyimizdir!
- Danılmaz faktdır ki, bu gün sosial şəbəkə gənclərin həyatında mühüm rol oynayır. Amma sosial şəbəkənin xeyrindən çox ziyanı da var…
Sosial şəbəkələr şəxsən mənim üçün akademiyadır, universitetdir. İndiyə kimi heç yerdən, heç kimdən almadığım bilikləri oradan alıram, həyatda öyrənmədiklərimi ordan öyrənirəm. Lakin gənclərin çoxu sosial şəbəkələrin pis cəhətlərindən "faydalanır". Nalayiq vidiolara baxırlar, daha da tərbiyəsizləşirlər! A kişilər, adam da sosial şəbəkədən qız, oğlan axtarar? Sosial şəbəkədə tanış olanlar deyilmi gündə evlənib-boşananlar? Sosial şəbəkə, TV verilişləri evlənmək üçün deyil axı…
Günel CƏLİLOVA
