Azərbaycanın İsraildə səfirlik açması İranda ciddi reaksiyalar yaradıb. İrandan belə fikirlər səsləndirilir ki, Azərbaycanın bu addımı Cənubi Qafqazda gərginliyin artmasına və uzun illər boyu regionda sabitliyin yaranmasına əngəl olacaq.
Maraqlıdır ki, Ermənistanın İsraildə səfirliyinin olmasını normal qarşılayan İran Azərbaycanın İsraildə səfirlik açmasını qətiyyən həzm etmək istəmir.
Azərbaycan dəfələrlə bəyan edib ki, imkan verməyəcək üçüncü tərəf Azərbaycan ərazisini İrana qarşı istifadə etsin. Bunu İranda da yaxşı bilirlər. Amma İranın Azərbaycana qarşı siyasəti heç zaman səmimi olmayıb. Müstəqilliyinin ilk günlərindən başlayaraq Tehran İrəvanla açıq hərtərəfli əlaqələr qurur, lakin eyni siyasəti Azərbaycana qarşı sərgiləməyib. Biz bunu uzun illərdir müşahidə edirik.
Azərbaycan son illərə qədər İrana qarşı şox səbrli davrandı. Lakin hər şey bir yerə qədər mümkündür. Bundan sonra Azərbaycanın İsraillə diplomatik əlaqə qurması və bu əlaqələrdən necə istifadə etməsi Azərbaycan-İsrail dövlətlərinin daxili işidir. Kiminsə buna qarşı çıxması onun özü üçün yaxşı nəticə verməyəcək.
Molla rejimi səfirliyimizə qarşı etdiyi terrorla Azərbaycanın İsraildəki Səfirliyinin fəaliyyətini əngəlləməyə, Azərbaycana öz aləmində əzələ nümayiş etdirməyə dair uğursuz həmlə etdi. İndi daha aydın olur ki, Londonda Səfirliyimizə qarşı olan hücumun arxasında da molla rejimi idi. Çünki həmin hücumu törədən qruplaşma İran fanatları olan qruplaşma ilə yaxın münasibətlərə malik idi.
Londondakı səfirliyimizə hücum edən “Mehdinin xidmətçiləri”nin İranın dini rəhbərliyi ilə ideoloji müharibədə olmasına dair məlumatlar yayılsa da, əslində onlar arasında ciddi əqidə yaxınlığının olduğu üzə çıxdı.
Bir daha bəlli olur ki, İran Azərbaycanın İsraillə olan diplomatik münasibətlərini genişləndirməsini həzm etmir və bunun qarşısını hətta ən qəddar üzullardan sayılan terrorla belə almağa çalışır.
Siyasi şərhçi Sahil Kərimli “Bakı-Xəbər”ə açıqlamasında bildirdi ki, əlbəttə, İranın Azərbaycana qarşı həyata keçirdiyi düşmənçilik siyasəti və bunun bariz nəticələri daha açıq şəkildə özünü büruzə verir: “Azərbaycanın Tehrandakı səfirliyində baş verən terror aksiyasının bir çox önəmli səbəbləri var. Əvvəla onu qeyd etmək lazımdır ki, İran uzun illərdir, Azərbaycan müstəqillik əldə etdikdən sonra Azərbaycana qarşı düşmənçilik siyasəti həyata keçirib. Azərbaycanın müstəqil olmasını heç cür həzm etmək istəməyib. Əsas məqsədlərdən biri, bu düşmənçiliyin arxasında duran başlıca səbəblərdən biri də İranın Azərbaycanda İslam dövləti yaratmaq istəkləri olub. Zaman-zaman, illər uzunu biz açıq və gizli şəkildə bu düşmənçiliyin şahidi olmuşuq. Azərbaycan dövlətinə qarşı müxtəlif zamanlarda İran tərəfindən təxribatlar həyata keçirilib. Bu son baş verən terror aktını da bir kulminasiya nöqtəsi adlandırmaq olardı. Burada digər əsas səbəblərdən biri də, təbii ki, Azərbaycanın müstəqil beynəlxalq xarici siyasət yürütməsidir. Azərbaycan bütün ölkələrlə dost və qardaşlıq münasibətləri qurur, öz münasibətlərini hətta müttəfiqlik səviyyəsinə qaldırır. Bu sırada biz İsraillə olan münasibəti də xüsusi vurğulamalıyıq. İsrail Azərbaycanla daim dostluq münasibətləri yaradıb, Azərbaycan da eyni zamanda paralel olaraq buna müsbət qarşılıq verib. Qarşılıqlı şəkildə bu münasibətlər həyata keçirilib. Bir müddət bundan əvvəl Azərbaycanın İsraildə səfirlik əçması bu münasibətləri daha da inkişaf etdirdi. Əlbətdə İran pozucu və təxribatçı siyasətini davam etdirərək, Azərbaycanın bu mövqeyini həzm edə bilmədi. Bir müddət sonra da aparılan qərəzli, düşmənçilik siyasətinin nəticəsini gördük. İran Ermənistana qucaq açdı, münasibətlərini daha da isti formaya keçirdi. Akopyanın da İrana səfəri oldu və onlar Tehranla İrəvanı qardaşlaşmış şəhər elan etdilər. Əlbəttə ki, bütün bunlar Azərbaycana qarşı hesablanmış siyasi gedişlər idi. Sonda da biz bu düşmənçilik siyasətinin terror aktı törədilməsi ilə davam etdiyini gördük. Bu düşmənçilik siyasətinin təməlində eyni zamanda Azərbaycanın 44 günlük vətən müharibəsində olan qələbəsi də dayanır. Azərbaycan bu gün öz enerji resursları ilə dünyanı fəth edir, Avropanın enerji təhlükəsizliyini təmin edir. Avropada, dünya səviyyəsində Azərbaycanın rəğbəti durmadan artır. İran da bunu həzm edə bilmir. Böyük qısqanclıqla yanaşır və Azərbaycana qarşı bu cür iyrənc addımlar atmaqda davam edir”.
Məhəmmədəli QƏRİBLİ
