İran hakimiyyəti zəlzələdən zərər çəkən azərbaycanlılara sahib çıxmır. Bu barədə “Azad İran” teleqram kanalında məlumat yayılıb. Zəlzələdən zərərçəkənlər şaxtalı havada küçədə qalıblar.
Qeyd edək ki, bu günlərdə Güney Azərbaycanın Xoy şəhərində 5,9 bal gücündə zəlzələ baş verib. Zəlzələ nəticəsində ən azı iki nəfər ölüb, daha 440 nəfər xəsarət alıb, çoxlu sayda evlər dağılıb.
Məlumata görə, molla rejimi zərərçəkənlərə kömək etmir və edilən yardımların da ünvanına çatdırılmasına imkan vermir. Zəlzələ nəticəsində evsiz qalan bir azərbaycanlı ana isə rejimə qarşı üsyan edib. O, hökumətə qarşı "Allahdan qorxun" kimi ifadələr səsləndirib.
“İran rejimi təbii fəlakətdən sui-istifadə edərək, gGüneydəki soydaşlarımızın daha ağır vəziyyətə düşməsi üçün əlindən gələni edir”
Molla rejiminin zəlzələdən zərər çəkən azərbaycanlılara sahib çıxmaması, onlara əziyyət verməsi barədə fikir bildirən siyasi şərhçi Azər Həsrət “Bakı-Xəbər”ə açıqlamasında qeyd etdi ki, fars molla rejimi Xoy və ətraf ərazilərdə zəlzələdən əziyyət çəkən soydaşlarımıza ediləcək yardımın qarşısını almağa çalışır. İran dövləti yardım etməli olduğu halda bunu etmir: “Hətta yayılan görüntülərdə də bunu açıq şəkildə görmək olur. Belə ki, dövlət rəsmiləri vətəndaşlarla guya görüşür, onların dərdinə şərik olur. Ancaq görüntülərə baxan zaman məlum olur ki, görüşə gedən şəxslərin əlləri boşdur və bu vəziyyətdən sadə əhali narazılıq, giley edir. Həmçinin, Xoy və ətraf ərazilərə göndərilən yardımlar soydaşlarımıza çatdırılmır. Hərbi geyimdə əli silahlı olan şəxslər yardımı sadə əhaliyə vermir. Dövlət adına hərəkət edən hərbi geyimli şəxslər soydaşlarımıza göndərilən yardımı vermir. Bu azmış kimi, Türkiyə Qızıl Aypara Cəmiyyəti zəlzələdən əziyyət çəkən soydaşlarımıza yardım göndərmək istədiyini bildirib. Təəssüf ki, İranı idarə edən fars molla rejimi rəsmən bu istəyi geri çevirdi. Məndə olan məlumata görə, Azərbaycan Respublikası da Xoydakı soydaşlarımıza humanitar yardım etmək istədiyini bildirib, lakin rəsmi Tehran bu istəyə də qarşı çıxıb. Bu isə o deməkdir ki, fars molla rejimi açıq şəkildə güney Azərbaycandakı soydaşlarımızın məhv edilməsində maraqlıdır. Bu istəklərini heç gizlətmirlər də. Zəlzələ təbii fəlakətdir. İran rejimi təbii fəlakətdən sui-istifadə edərək Güneydəki soydaşlarımızın daha ağır vəziyyətə düşməsi üçün əlindən gələni edir. Bu isə onu göstərir ki, İranı idarə edən fars molla rejimi ilə Güney azərbaycanlıların yolu artıq birdəfəlik ayrılmalıdır. Çünki İran rejimi soydaşlarımıza orda ögey münasibət bəsləyir, onları yad hesab edir, həmin insanların məhvinə çalışır”.
Günel CƏLİLOVA
