İran-Azərbaycan münasibətlərinin gərginləşməsindən istifadə etməyə çalışan Ermənistan rəsmiləri dövriyyəyə daha bir “məlumat” buraxıblar.
Ermənistan xarici işlər nazirinin müavini Vahan Kostanyan, guya ötən ilin sentyabrında Azərbaycanın Ermənistana qarşı daha irihəcmli əməliyyat hazırladığını iddia edib. O bu iddiasını “kəşfiyyat məlumatları”na əsasən dilə gətirdiyini bildirib:
“Bakının “aqressiv planları” sentyabrın 13-14-də “başlatdığı” hərbi əməliyyatlardan qat-qat böyük idi. Ermənistanın cənub qonşusu İranın hərəkətləri və ritorikası bu vəziyyətin daha da pisləşməsinin qarşısını almağa kömək etdi. İran bu gün Ermənistanın mühüm tərəfdaşıdır. İran və Gürcüstanla sərhəd respublika üçün xarici dünyaya “təbii qapı” kimi mühüm əhəmiyyət kəsb edir”.
Bəllidir ki, Azərbaycan deyilən sentyabr hadisələrində yalnız erməni təxribatlarına layiqli cavab verib, heç kimə hücum etməyib. Hətta belə bir iddia ilə Ermənistanın BMT Təhlükəsizlik Şurasına etdiyi şikayətin də faydası olmadı. Ermənistan rəsmisinin açıqlamasında diqqət çəkən başqa bir vacib nüans var. İranla Ermənistanın Azərbaycan əleyhinə birgə gizli əməkdaşlığının olduğu rəsmən etiraf edilir.
Hərbi-siyasi ekspert Ramil Məmmədli “Bakı-Xəbər”ə bildirdi ki, İranın Ermənistanla 44 günlük müharibə zamanı və ondan sonra hərbi sahədə əməkdaşlığı barədə yeni-yeni faktlar ortaya çıxır: “Bəlli olub ki, İran hakimiyyət orqanları Ermənistana Türkiyə “Bayraktar”larını yerə endirməyə imkan verən radioelektron mübarizə vasitələri təklif edib. Bu barədə erməni hərbi ekspertləri məlumat verib.
İranın ölkəmizə qarşı apardığı düşmənçilik siyasətində ştrixlər çoxdur. Ötən ilin sonlarında İrandan Azərbaycanın Qarabağ bölgəsinə qanunsuz səfərlər edən 27 nəfər şəxslə bağlı rəsmi Tehran açıqlama vermir. Xatırladaq ki, noyabrın 24-ü və 30-da Qarabağ bölgəsinə 27 nəfər İran vətəndaşının gəlişi ilə bağlı mediada məlumatlar dərc edilmişdi və Azərbaycan XİN bununla bağlı açıqlama yaydı. Belə iddialar da səslənirdi ki, iranlı dəstələrin Qarabağa gəlişindən təxminən bir ay əvvəl - oktyabr ayının sonlarında molla rejimi gizli yolla Ermənistana İran istehsalı olan 600 ədəd raket göndərib. Özü də bu silahlar - 500 ədəd “Dehlaviyeh” və 100 ədəd “Almas” tipli tank əleyhinə idarəolunan raket kompleksi Ermənistana satılmayıb, İslam İnqilabı Keşikçiləri Korpusunun Qüds qüvvələri tərəfindən hədiyyə edilib. İranlı qruplar haqda məlumat yayılandan dərhal sonra belə bir ehtimal səslənmişdi ki, iranlılar Xankəndiyə hansısa İran istehsalı olan silah-sursatdan istifadə üçün yerli quldur dəstələrinə təlim keçmək məqsədilə gələ bilərlər. İslam İnqilabı Keşikçiləri Korpusunun Qüds qüvvələri tərəfindən hədiyyə edilmiş “Dehlaviyeh” və “Almas” tipli raket kompleksindən istifadəni öyrənmək üçün erməni hərbçilərə təlim keçmək tələb olunurdu. Məhz buna görə raket kompleksləri ünvana çatdırılandan bir ay sonra iranlı dəstələr bölgəyə göndərilib. Məlumata görə, bir qrup iranlı eyni missiya ilə Ermənistana da gedib, digər qrup isə hələ də Rusiya sülhməramlılarının müvəqqəti nəzarətində olan ərazidə qalmış hərbi birləşmələrə təlim üçün Qarabağa keçib.
Bu əməkdaşlığın daha bir detalını Ermənistan rəsmiləri təsdiq edib ki, sentyabr hadisələrində İran bizim ziyanımıza olan kəşfiyyat məlumatlarını Ermənistana ötürüb.
Qeyd edək ki, rəsmi Tehranın son davranışları - var gücü ilə Ermənistanı dəstəkləməsi, Zəngəzur dəhlizinin açılmasına qarşı tutduğu mövqe yaranmış mənzərəni tamamlayır. Tehran İrəvanla istənilən əməkdaşlığı alqışlayır.
Ermənistan və İran arasında iqtisadi, hərbi və kəşfiyyat sahələrində əməkdaşlığın artması Türkiyə, Azərbaycan, İsrail və Böyük Britaniyanın yaxınlığının əleyhinə yönəlib.
Zəngəzur ərazisində yerləşən Qafan şəhərində İran konsulluğunun açılması isə bu gizli əməkdaşlığın “leqallaşdırılması”na xidmət göstərir. Ermənistanla gizli əlaqələr məhz Qafanda oturacaq rejim təmsilçisi tərəfindən idarə ediləcək. Demək ki, İran özünün təxribatçı əməllərini bu yolla reallaşdırmaq fikrindədir”.
Məhəmmədəli QƏRİBLİ
