44 günlük Vətən müharibəsi zamanı İran əsl simasını bir daha göstərdi. Ordumuzun Ermənistan üzərində qələbəsindən sonra İran qəbul olunmuş bütün qaydaları pozdu. Hətta vəziyyət o həddə çatdı ki, İran İslam Respublikasında diplomatların toxunulmazlığının, eləcə də diplomatik binaların təhlükəsizliyinin təmin edilməsi ilə bağlı Diplomatik Əlaqələr haqqında Vyana Konvensiyasının maddələri kobud şəkildə pozuldu.
Ölkənin paytaxtında - Tehran şəhərində Azərbaycan səfirliyinə silahlı hücum edildi. Xain terror nəticəsində faciə baş verdi.
Terror yuvası olan İranın fars-molla rejimi, bir qayda olaraq, düşmənçilik apardığı siyasi hakimiyyətlərə qarşı “narazı kütlə” hazırlamağa çalışır. Bura təkcə dini fanatiklər deyil, həm də narazılığı təşkil etmək üçün digər alətlər daxil edilir. Nə qədər təəccüblü olsa da, özünü “İslam Dövləti” adlandıran molla rejimi LGTB, radikal feminist qruplarla da sıx əməkdaşlığa, işbirliyinə malikdir.
Məlumata görə, Azərbaycanda olan LGBT-çilərin fəaliyyətini İran maliyyələşdirir. Bunu etməkdə məqsədləri də Azərbaycan cəmiyyətində narazılıq yaratmaqdır.
“İran elə bir vəziyyətdədir ki, nəinki terror təşkilatları, LGBT, hətta digər təhlükəli birlik və ya təşkilatlarla işbirliyi edir”
Millət vəkili Aydın Mirzəzadə “Bakı-Xəbər”ə açıqlamasında qeyd etdi ki, İran rejiminin müəyyən dairələri Azərbaycanı daxili işlərinə qarışmaq, iranpərəst qüvvələri fəallaşdırmaqda maraqlıdır: “Zamanla təhlükəsizlik orqanlarımız tərəfindən casus şəbəkəsi ifşa edilib. İran tərəfindən maliyyələşən qrupların aşkar olunması ilə bağlı məlumatlar yayılır. İranın bunu etməkdə məqsədi Azərbaycanda siyasi rejimi dəyişmək, ölkəmizi İranın əlaltısına çevirməkdir. Həmçinin, fars-molla rejimi Azərbaycanı İran siyasətinə uyğun siyasət yeritməyə çalışır. Son zamanlar bu istəyini daha çox sosial şəbəkə üzərindən gerçəkləşdirmək istəyir. Tik-Tok platforması üzərindən iranpərəst qüvvələr molla rejiminin fəaliyyətini təqdir edir, səfirliyimizə edilən terror hücumuna özlərincə bəraət qazandırmaq istəyirlər”.
Millət vəkili onu da əlavə etdi ki, 44 il ərzində İran beynəlxalq arenada nüfuzlu ölkəyə çevrilə bilməyib. Dünya ölkələri İranın necə bir ölkə olduğunu atıq yaxşı bilir: “İran elə bir vəziyyətdədir ki, nəinki terror təşkilatları, LGBT, hətta digər təhlükəli birlik və ya təşkilatlarla işbirliyi edir. Məlumata görə, Azərbaycanda olan LBGT-çiləri də məhz İran maliyyələşdirir, onlarla əməkdaşlıq edir. Ümumiyyətlə, İran rejiminin bu cür təşkilatlarla əməkdaşlıq etməsi dəfələrlə sübut olunub. Bu ölkənin missiyası sülh, əminamanlıq deyil, terror, dağıtmaq, pis fikirlər yaymaqdır”.
Həmsöhbətimizin sözlərinə görə, İrandakı Azərbaycan səfirliyinə edilən terror hücumu indiyə qədər aparılan anti-Azərbaycan kampaniyasının pik həddidir: “İran bu hadisədən nəticə çıxarmalıdır, Azərbaycan kimi bir qonşunu itirdiyinin fərqinə varmalıdır. İranın Azərbaycana qarşı bu münasibəti onu göstərir ki, o öz qonşuları ilə yaxşı münasibətlər qurmaq istəyində deyil. Mühafizə xidmətinin rəisinin qətlə yetirilməsi heç bir normaya sığmayan məsələdir. Bu, ümumilikdə Azərbaycana qarşı edilən davranışdır”.
Günel CƏLİLOVA
