“Fransanın Əlcəzair xalqına qarşı törətdiyi qətliam dünyanın heç vaxt unutmamalı olduğu bir hadisədir. Fransa Əlcəzair xalqına qarşı çox dəhşətli bir müharibə aparıb. Bu dəhşətli qətliam 1,5 milyon insanın ölümü ilə nəticələnib". Bu fikri Azərbaycan Respublikasının Prezidenti İlham Əliyev noyabrın 1-də Əlcəzairdə keçirilən Ərəb Dövlətləri Liqasının 31-ci Zirvə toplantısında çıxış edərkən deyib.
Prezidentin dediyi fakt tarixdən hamıya məlumdur, ancaq Fransa kimi ölkənin əzəməti fonunda bunu ifadə etməkdən hamı çəkinir. Xüsusilə də dövlət başçıları. Prezidentin bu fikirləri həm də yüksək bir cəsarət nümunəsi sayıla bilərmi?
Siyasi şərhçi Tofiq Abbasov “Bakı-Xəbər”ə açıqlamasında bildirdi ki, Azərbaycan Respublikasının Prezidenti İlham Əliyevin xarici platformalarda çıxışları daim dəqiq predmet ətrafında olur: “Bu məsələdə mücərrədlik ənənəsi demək olar ki, yox səviyyəsindədir. Prezident hər bir detalı zərgər dəqiqliyi ilə auditoriyaya çatdırır.
Hazırda dünya çapında güclü siyasi liderlərin çatışmazlığı hiss edilir. Bu, həm də dünya problemi səviyyəsində olan məsələdir. Buna görə də, çözümü olmayan məsələrin sayı durmadan artır. Çünki bir çox liderlər məsələri ört-basdır etməyə çalışır. Problemlərdın çıxış yolları tapmaq əvəzinə çalışırlar ki, ondan uzaqlaşsınlar. Təbiidir ki, bu, düzgün yanaşma sayıla bilməz. Qlobal səviyyədə xaosun əhatəsi genişləndikdə cəmiyyət dilemma qarşısında qalır: dünya müharibəsi başlayacaq, ya yox? Çünki böyük bir fəlakətin potensialı durmadan artır. Kiçik bir qığılcım kifayət edər ki, qlobal miqyasda dünya müharibəsi başlasın. Əksər böyük dövlətlərin hazırda nüvə potensialı var, onda proqnozlar heç də ürəkaçan olmayacaq.
Prezident İlham Əliyev bütün məsələləri öz adı ilə çağırır. Ona görə də, auditoriya anlayır ki, mahir bir siyasətçi kimi o, böhranların mahiyyətini düzgün təsnifatlandırırsa, deməli, həll yollarını da bilir.
Ona görə də, Prezident dəfələrlə qeyd etdi ki, BMT təhlükəsizlik şurasının 4 qətnaməsinin həlli yolunun reallaşması Azərbaycanın özü tərəfindən təmin olunur. Çünki, dünya birliyi, BMT, onun Təhlükəsizlik Şurası bu məsələlərdə həm riyakarlıq edirdi, həm də Azərbaycan dövlətinin, Azərbaycan xalqının ağrılı probleminə etinasız yanaşırdı. Biz çox deyirdik ki, milyona yaxın qaçqınımız, məcburi köçkünümüz var. Ermənistanın aqressiv siyasəti nəticəsində onlar təminatsız qalıblar. Ancaq, bizim bu harayımızı eşitsələr də, heç nə olmamış kimi reaksiyalar verilirdi hər zaman. Kütləvi şəkildə bizim haqqımızın pozulması artıq elə bir şərait yaratdı ki, dövlət başçısı həm ordumuzu gücləndirdi, həm iqtisadiyyatımızı dirçəltdi. Onun sayəsində biz hərbi potensiyalımızı gücləndirdik. Bütün problemlərin həllini öz üzərimizə götürərək, onların məntiqi nəticəsini ala bildik. Bu özü-özündə dünya çapında gözəl bir nümunədir. Bu da ondan irəli gəlir ki, dövlət başçısı, eyni zamanda Silahlı Qüvvələrimizin Ali Baş Komandanı baş verən proseslərlə bağlı onların temantikasını gözəl anlayır və bilir ki, ipucları nədən ibarətdir, hansını nə zaman gücləndirmək lazımdır ki, bu proseslərdə fəsadlar yox, həll yolları tapılsın. Hesab edirəm ki, Prezident Fransanın cinayətlərini bir daha yada salmaqla, insan unutqan olmadığını göstərdi. Bu, həmin o Fransadır ki, bu gün Azərbaycana demokratiya dərsi vermək istəyir, Ermənistanı müharibəyə başlamağa təhrik edir. Özü silah-sürsat vermək istəmir.
Amma, Hindistanı meydana atır ki, ermənilərə silah sürsat versin. Fransanın bu fəaliyyəti əsil cinayətkar fəaliyyətdir. Buna görə Fransacavab verməlidir. Prezident Makron elə bir qüdrətli ölkənin obrazlarına yaraşmır. Siyasi çəkisi, özünün davranışı, siyasi portreti, məsələlərə münasibəti ilə Fransa həqiqətən qüdrətli dövlətdir.
Bəli, 19-20 - ci əsrlərdə Fransanın çoxlu cinayətkar əməlləri də olub. Napaleon dövrü Misirə hücum çəkərək, həmin ölkənin bütün varidatını, mədəni abidələrini dağıdıblar. Əlcəzair özü də bu prosesdən incimişdi. Çünki, kitabələrini, abidələrini, bir çox qiymətli irsə aid məqamların hamısını qarət edib aparıblar. Belə addım mənəvi sütunu olan ölkəyə yaraşmır. Düzdür, bunu bütün Fransa xalqına şamil etmək olmaz”.
Məhəmmədəli QƏRİBLİ
