Tarixi saxtalaşdırma çox böyük cinayət olsa da, təəssüf ki, bir sıra hallarda bu ayrı-ayrı dövlətlərin başçıları səviyyəsində həyata keçirilir. Onların bəyanatlarını eşidəndə adama elə gəlir ki, bunlar ya tarixi bilmirlər, ya da ki, bilərəkdən onu təhrif edirlər.
İran İslam Respublikasının prezidenti İbrahim Rəisi də deyəsən ya tarixi bilmir, ya da qəsdən təhrifə yol verir. İran İslam Respublikasının prezidenti Ermənistanın baş naziri ilə birgə mətbuat konfransında bildirib qəribə bir bəynat verib. Rəisi deyib ki, Qafqaz regionu İran tarixi və sivilizasiyasının bir hissəsidir: “...Qafqaz regionu İranın tarixi və sivilizasiyasının bir hissəsidir. Biz Qafqaz regionuna həssas yanaşırıq. Regional məsələlərin həlli bu regionun rəsmilərinin əlində olmalıdır”.
İran prezidenti niyə belə deyib, məgər onun tarixdən xəbəri yoxdur? Qafqaz nə vaxt İran tarixinin və sivilizasiyasının bir hissəsi olub? İran bu tarixi saxtalaşdırma ilə nə demək istəyir?
“Mənimsəmək istədiyi tarix əslində türk tarixidir və İran adlı dövlət ilk dəfə 1936-cı ildə yaranıb”
Qafqaz Tarixi Mərkəzinin direktoru Rizvan Hüseynov “Bakı-Xəbər”ə şərhində bildirdi ki, son zamanlar biz İran İslam Respublikasının istər dini, istərsə də siyasi hakimiyyətinin nəinki əsl üzünü, hətta bu üzün dərinliklərini görürük: “İran özünü guya islamın və müsəlmanların qoruyucusu, müdafiəçisi kimi təqdim edir. Amma bir sıra regionlarda, istər yaxın Şərqdə, istərsə də bizim bölgədə son 30 ildə görürük ki, öz geosiyasi maraqlarına görə İran davamlı olaraq müsəlmanların düşmənləri tərəfindədir. Məsələn, Ermənistan Azərbaycan münaqişəsində davamlı olaraq İran Ermənistanın tərəfində olub. Son 30 ildə işğalın nəticələri də İranı qane edirdi və maraqlarına cavab verirdi. Ona görə də Ermənistana güclü təpki, təzyiq göstərmirdi. Əgər İran hesab edir ki, Qafqaz İranın hansısa bir sivilizasiya prosesinin, yaxud tarixinin bir parçasıdır, həmin İran unutmasın, özü ən azı min ildən çox türk sülalələrinin, türk mədəniyyətinin və türk dövlətlərinin bir parçası olub. Mənimsəmək istədiyi tarix əslində türk tarixidir və İran adlı dövlət ilk dəfə 1936-cı ildə yaranıb. Bu tarixdən əvvəl isə siyasi termin kimi İran istifadə olunmayıb. Ona görə də biz nəyin şahidi oluruq? Özü başqa bir mədəniyyətin parçası olan İran hər şeyi alt-üst edərək özünü mərkəzə qoyub, kimlərisə özünün parçası kimi təqdim etmək istəyir. Halbuki, dediyim kimi, min ildən də çox tam əksinə olub. Bu dövr türk dövlətlərinin yaranma və güclənmə dövrüdür və istər İran, istər Cənubi Qafqaz, istər yaxın Şərq, istər Anadolu, istər Aralıq dənizi, istər Şimali Afrika, istərsə də Misir ərazilərində böyük türk dövlətləri yaranıb. Bunu hamı bilir. İran ərazisi də həmin proseslərin mərkəzi olub, orada da əsas söz və hökm türk dövlətlərinin, türk hərbi aristokratiyasının əlində olub. Türk deyəndə burada əsasən Azərbaycan türklərinin əcdadlarını nəzərdə tuturuq”.
R.Hüseynov vurğuladı ki, bu dövlətlər Azərbaycan türklərinin böyük bir mirasıdır, Qafqaz xalqlarının siyasətinə, mədəniyyətinə, dünyaya baxışına böyük bir töhfə verib, bunu dananlar, bunu görməyənlər ermənilər, Ermənistan kimi yalançılığa, saxtakarlığa əl atırlar. “Bəlli olur ki, yalançı erməni tarix konsepsiyasının arxasında İran, Fransa kimi ölkələr durur. Ona görə də daim bu yalana dəstək verilir, onu qidalandırırlar. Burada faktiki olaraq İranın iç üzü nə ilə də açılır? Bu çətin dönəmdə İran bizim regionda öz maraqlarını qorumaq üçün hər bir vasitəyə əl atmağa çalışır. İranın bizim regionda son dayaq nöqtəsi Ermənistandır. Bizim regiona təsir göstərmək və stabilliyi pozmaq üçün yeganə alət Ermənistandır”.
Bu alətdən həm İranın, həm Fransanın, həm də başqa ölkələrin istifadə etdiyini deyən Qafqaz Mərkəzinin direktoru qeyd edir ki, hətta onlara Hindistan kimi ölkələr də birləşir və türk dünyasına qarşı çıxışlar edir. “Onlar Yeni Turan iqtisadiyyat və nəqliyyat layihələrinə qarşı birləşərək əsas hədəf olaraq Azərbaycanı seçirlər. Ona görə ki, Azərbaycan bu layihələrin sütunudur, döyünən ürəyidir. Burada sözsüz ki, Ermənistandan istifadə edərək bu planları pozmaq istəyirlər. Amma nəticə çox acınacaqlı olacaq. Xüsusən də Ermənistan üçün. O alət kimi istifadə olunacaq və atılacaq, ona bu gün havadarlıq edən İran və başqa ölkələr bəlli nöqtəyə kimi bu dəstəyi davam etdirəcəklər. Necə ki, Rusiya bəlli nöqtəyə kimi Ermənistana dəstək verdi, sonra da tək qoyub getdi və 2020-ci ildə baş verən müharibə də Ermənistan üçün böyük bir cəza oldu. İndi həmin Ermənistan özü üçün başqa havadar axtarır və Rusiya kimi nəhəng ölkə əgər bu işi görə bilmədisə, İran hara girir, yaxud başqa dövlətlər, Hindistan nə edə bilər? Sadəcə olaraq Ermənistandan istifadə etməyə cəhd edəcəklər, sonra onu tək şəkildə Azərbaycanın qarşında qoyacaqlar və Ermənistan dövləti, erməni xalqı şiddətli cəzaya məruz qalacaq. Bu acı aqibəti bu dəfə Ermənistana sırf İran yaşadacaq. Bu təxribat İranın əli ilə olacaq və amma heç bir qüvvə türk birliyini, Türkiyə, Azərbaycan, Orta Asiya dövlətlərinin və başqa partyorlarımızın birliyini sarsıda bilməz. Nə heyf ki, mayası türk dövlətlərindən yaranan, lakin bunu danan müasir İran dövləti bu oyunlarda ermənilərin və Fransanın tərəfini tutub. Nəticə olaraq mən bu məsələdə İran üçün müsbət nəsə görmürəm” - deyə R.Hüseynov vurğuladı.
Gördüyünüz kimi tarixi saxtalaşdırmada İran heç də Ermənistandan geri qalmır, daha dərin “dəryalarda” üzməyə meyl göstərir. Amma nəticədə bir daha təsdiqlənir ki, molla dövləti səhv yoldadır və bu addımları da ona heç bir müsbət dvident qazandıra bilməz.
İradə SARIYEVA
