Ermənistanda hakim “Mülki müqavilə” partiyasının qurultayı keçirilib. Qurultayda Qarabağ probleminin həlli ilə bağlı yeni konsepsiya təsdiq edilib.
Konsepsiyada sözügedən məsələ ilə bağlı bir sıra diqqəti çəkən məqamlar öz əksini tapıb: “Türkiyə və Azərbaycanla qeyri-sabit münasibətlər “Ermənistanın təhlükəsizliyinə daimi təhdid mənbəyidir və bu, aradan qaldırılmalıdır. Biz əminik ki, Ermənistanın və Dağlıq Qarabağın təhlükəsizliyini təmin etməyin yolu regionun bütün ölkələri, ilk növbədə Türkiyə, Azərbaycan, İran və Gürcüstanla birgəyaşayış formulunu hazırlamaqdan keçir. Ermənistan öz qonşuları üçün təhlükə mənbəyi hesab edilməməlidir, onun qonşuları isə Ermənistan üçün təhlükə mənbəyi olmamalıdır. Dağlıq Qarabağ probleminə gəlincə, partiya onun həlli üçün yeni konsepsiya qəbul edir. Əgər əvvəllər Qarabağın statusu onların hüquq və təhlükəsizliyini təmin edən prioritet hesab olunurdusa, indi ermənilərin təhlükəsizliyi və hüquqları prioritet hesab edilir və status bu təminatlar sistemindən çıxarılır”.
Sülhün bərqərar olması partiyanın 2026-cı ilə qədər olan dövr üçün 3 prioritetindən biri açıqlanıb. Burada diqqəti çəkən məqam odur ki, yeni konsepsiyada 4 dövlətlə mütləq sülh nəzərdə tutulur. Bütün bunlarda Ermənistanın hakim partiyası, hakimiyyəti nə dərəcədə səmimidir?
“Qarabağ ermənilərinin təhlükəsizliyinin təminatı ilə bağlı məsələləri hər hansı 3-cü tərəfin...”
Sözügedən məsələni “Bakı-Xəbər”ə şərh edən politoloq Elşən Manafov bununla bağlı bir sıra məqamlara toxundu: “Ermənistanda iqtidar partiyasının Qarabağ probleminin həlli ilə bağlı məsələyə münasibətdə qəbul etdiyi yeni konsepsiya forma və məzmun baxımından əvvəlki konsepsiya ilə müqayisədə fərqli təsir bağışlayır. Mahiyyət etibari ilə isə bu konsepsiyanın özu belə Azərbaycanın daxili işlərinə müdaxilə kimi qiymətləndirilməlidir. Beynəlxalq hüququn norma və prinsipləri baxımından bu yolverilməzdir. Qarabağ erməniləri milli mənsubiyyətlərinə görə respublikanın digər azsayli xalqları ilə müqayisədə hər hansı əlahiddə status daşıya bilməzlər. Hüquqi və demokratik dövlət olaraq Azərbaycan Respublikası onların da bütün hüquq və azadlıqlarının qarantıdır. Lakin dövlət-vətəndaş münasibətlərində dövlət qarşısında olan öhdəliklər digər azsaylı xalqların vətəndaşlarına şamil edildiyi kimi, erməni əsilli vətəndaşlara da aid olmalıdır. Qarabağ ermənilərinin təhlükəsizliyinin təminatı ilə bağlı məsələləri hər hansı 3-cü tərəfin iştirakı ilə bağlı daim gündəmdə saxlamaq doğru deyil. Bunu danışıqların müzakirə predmetinə çevirmək dövlətimizi daim regional və beynəlxalq güclərin pressinqi altında saxlamağa xidmət edəcək. Buna da Azərbaycan hakimiyyəti və xalqı heç cür razılıq verə bilməz. Azərbaycan 32 illik müstəqilliyi dövründə digər dövlətlərlə münasibətlərində etibarlı tərəfdaş olmaqla yanaşı, öz üzərinə götürdüyü öhdəliklərə dürüstlüklə əməl edən dövlətdir. Multikulturalizm dövlət siyasətinin həmişə ana xəttini təşkil edib. Bu mənada ermənilərin təhlukəsizliyi ilə bağlı məsələləri qabardaraq stəkanda fırtına yaratmaq istəyi, Qarabağ kartını Azərbaycan dövlətçiliyinin “əyninə biçmək” istəyi erməni millətçilərinin və onların siyasətinə havadarlıq edən bəlli dairələrin çoxdankı arzularıdır. Azərbaycan dövləti və onun başçısının mövqeyi qəti və birmənalıdır. Qarabağ Azərbaycanın ayrılmaz hissəsidir. Burada dövlətin suverenliyi və ərazi bütövlüyü təmin olunmalıdır. Qarabağ erməniləri, onların problemlərinin həlli Azərbaycanın yurisdiksiyasına aiddir. Azərbaycan BMT TŞ-nin münaqişə ilə bağlı 4 məlum qətnaməsinin icrasına təkbaşına nail oldugu kimi, Qarabağ ermənilərinin də təhlükəsizliyi ilə bağlı problemləri təkbaşına həll etməyə qadirdir. Ermənistan bütün qonşularla normal münasibətlər istəyirsə, ərazi iddialarından əl çəkməlidir”.
Vidadi ORDAHALLI
