Zəngəzur dəhlizi Avropa Parlamentində (AP) qızğın müzakirələrə səbəb olub. AP-nin Xarici Əlaqələr Komitəsinin üzvləri Avropa İttifaqının xarici Əlaqələr və Təhlükəsizlik Xidmətinin nümayəndəsi Jan-Markos Skupadan Brüsselin Zəngəzur dəhlizinə münasibətinin necə olduğunu soruşub.
Jan-Markos Skupa birbaşa cavab verməkdən yayınıb: “Dəhliz məsələsinə münasibət bildirmək bizim işimiz deyil. Biz sülh sazişinin imzalanması üçün tərəflər arasında dialoqun təşviqinə çalışırıq”.
Bu cavab erməni lobbisinin üzvləri olan parlamentariləri qane etməyib. Aİ-nin nümayəndəsi Bela Nesterovanın hansı dəhlizdən söhbət getdiyini bilmədiyi haqda sözləri onları daha da qəzəbləndirib. Bu gərginlik AP-nin Azərbaycan və Ermənistanla bağlı yeni hesabat layihələrinin müzakirəsi zamanı yaşanıb. Azərbaycanla bağlı sənəddə qeyd olunur ki, Bakı Aİ-nin strateji tərəfdaşıdır, yanacaq tədarükünün artırılması vədini verib və bu, yeni bazarların tapılması baxımından əhəmiyyətlidir: “Azərbaycan Avropa İttifaqının strateji tərəfdaşı olaraq qalır, biz iqtisadi əməkdaşlığımızı daha da təkmilləşdirəcək hərtərəfli saziş imzalamağa yaxınıq. İyul ayında Azərbaycanla imzalanmış memorandum bizə enerji resurslarımızı şaxələndirməyə və yanacağın qiymətini aşağı salmağa imkan verir”.
Göründüyü kimi, Avroparlamentdə Zəngəzur dəhlizi ilə bağlı müzakirələr gedib. Nəzərə almalıyıq ki, hələ bu müzakirə gələn ilin yanvar ayında davam etdiriləcək. Çünki Azərbaycan və Ermənistan üzrə hesabat məruzələri var. Həmin hesabat məruzələrinin müzakirəsi yanvar ayında olacaq. Təəssüf doğuran məqam odur ki, Avroparlamentdə Zəngəzur dəhlizi ilə bağlı müzakirələrdə konkret olaraq mövqe ortaya qoyulmayıb. Belə yanaşma Zəngəzur dəhlizi ilə bağlı çox pis haldır. Zəngəzur dəhlizi ilə bağlı konkret bir mövqeyin nümayiş olunmaması yaxşı hal deyil. Nəzərə almaq lazımdır ki, Avropa İttifaqı Şurasının prezidenti Şarl Mişel dəhlizlə bağlı səylər göstərir. Başqa bir tərəfdən, əldə olunmuş razılaşmalarda dəhlizlə bağlı məqamlar var. Əgər Avropa İttifaqı Azərbaycanla Ermənistan arasında sülh sazişinin imzalanmasına xüsusi diqqət göstərirsə, onda necə ola bilər ki, Zəngəzur dəhlizi barədə konkret bir mövqe ortaya qoymasınlar? Bəzi Avroparlament təmsilçiləri deyir ki, bizim işimiz iki ölkə arasında sülh sazişinin əldə edilməsinə nail olmaqdır. Belə məsələləri tərəflərin özü həll etməlidir. Axı Zəngəzur dəhlizi məsələsi həll olunmadan sülh sazişi necə əldə oluna bilər?
“Təəssüflər olsun ki, Avropa İttifaqı dəhlizlə bağlı qəti mövqe ortaya qoymur”
Məsələyə münasibət bildirən “İki sahil” qəzetinin baş redaktoru Vüqar Rəhimzadənin fikrincə, Avropa Parlamentinin Zəngəzur dəhlizi ilə bağlı belə yanaşma sərgiləməsi doğru deyil: “Belə yanaşma təəssüf doğurur. Çünki dəhlizin açılması sülh müqaviləsi ilə sıx bağlıdır. Dəhlizlə bağlı Ermənistanın prinsipial razılığı olmadan iki ölkə arasında sülh sazişinin imzalanması real deyil. Sülh sazişinin tərkib hissələrindən biri də Zəngəzur dəhlizinin açılmasıdır. Yəni bütün bu məsələlər bir-biri ilə sıx bağlıdır. Üstəlik, Zəngəzur dəhlizinin açılması həm də Avropanın maraqlarına xidmət edir. Söhbət ondan gedir ki, bu, Çindən və digər Asiya ölkələrindən Avropaya yüklərin daha tez çatdırılması deməkdir. İqtisadiyyatda, ticarət əlaqələrində vaxt amili çox önəmli faktordur. Ancaq təəssüflər olsun ki, Avropa İttifaqı Zəngəzur dəhlizi ilə bağlı qəti mövqe ortaya qoymur”.
V.Rəhimzadə onu da qeyd etdi ki, Avroittifaqın dəhlizlə bağlı biganəliyi ümumi işə zərər vurur.
Vidadi ORDAHALLI
