Ermənistanda demoqrafik vəziyyətin bərbad olduğu məlumdur. Bu insanlar yalnız Ermənistandan köçüb getməklə kifayətlənmirlər, eyni zamanda vətəndaşlıqdan rəsmən imtina edirlər. Son iki ildə 5 min nəfərə yaxın şəxs Ermənistan vətəndaşlığından çıxaraq başqa ölkələrin vətəndaşlığını qəbul edib.
Ermənistan Pasport və Viza İdarəsinin rəisi, polkovnik Ara Mkrtçyan erməni mediasına Ermənistan vətəndaşlığından imtina edənlərin sayını açıqlayıb. “Son doqquz ayda 2 min 794 nəfər vətəndaş Ermənistan vətəndaşlığından imtina edib. Ötən il də demək olar ki, eyni mənzərə var idi: 2 min 515 nəfər ölkə vətəndaşlığından imtina etmişdi”.
Ekspertlər hesab edirlər ki, bu qədər insanın Ermənistan vətəndaşlığını daşımaqdan imtina etməsinin bir neçə səbəbi var. Ekspertlərə görə, bunun bir səbəbi ölkədəki aclıq, yoxsulluq, sosial-iqtisadi tənəzzüldürsə, başqa bir səbəbi ölkədəki revanşizmdir. Ekspertlərin sözlərinə görə, Ermənistanın məğlub dövlət olması və hələ də işğalçılıq meyllərindən əl çəkməməsi bir sıra vətəndaşları bu addımı atmağa vadar edir. Yəni onlar artıq məğlub dövlətin vətəndaşları kimi yaşamaq istəmirlər.
“Bu əslində Ermənistanın nasist xislətli siyasi hakimiyyətinin liderlərinə qarşı etiraz aksiyasıdır”
“Polisə Dəstək” İctimai Birliyinin rəhbəri, tanınmış hüquqşünas Şəmsəddin Əliyev bizimlə söhbətində bildirdi ki, vətəndaş olmaq insanlar üçün böyük məsuliyyətlər yaradır və onlardan dövlətə sədaqət və sair tələb olunur. “Ümumilikdə, bütün ölkələrin konstitusiyasında, eyni ilə də bizim 1995-ci ildə qəbul olunmuş konstitusiyamızda da göstərilir ki, vətəndaşlıq dövlətə mənsub olmaqdır, onunla siyasi-iqtisadi bağlılıq təşkil etməkdir. Bu şərtlər olmasa vətəndaş kimi qəbul oluna bilməz. Çünki bu şərtlərdən sonra həm vətəndaşın, həm də dövlətin üzərinə müəyyən hüquq və vəzifələr düşür.
Bu baxımdan Ermənistanda vətəndaşlıqdan imtinanın kütləvi hal alması təəccüblü deyil. Ermənistan vətəndaşları dövlətə mənsub olsalar da, amma onlar arasında sosial, hüquqi, iqtisadi və siyasi əlaqələrin halqaları tamamilə qırılıb. Bu mənada, onların vətəndaşlıqdan bu şəkildə imtina etməsi gözlənilən idi. Çünki dövlət vətəndaş qarşısında üzərinə götürdüyü öhdəlikləri yetirə bilmir və onların hüquq və azadlıqlarını, təhlükəsizliklərini qorumur, sosial rifah halını yüksəltməyi düşünmür. Vətəndaşlar da Ermənistan dövlətinə mənsubluqlarını qəbul etmirlər, bu səbəbdən də vətəndaşlıqdan kütləvi imtina edirlər”.
Ş.Əliyev hesab edir ki, vətəndaşlıqdan kütləvi imtinanın özəyində dayanan amillərdən biri də son zamanlar Ermənistanın həyata keçirdiyi sərhəd təxribatlarıdır: “Ermənistan tərəfin sərhəd təxribatlarından əl çəkməməsi, o cümlədən də Azərbaycanla sülh danışıqlarını bəhanələrlə uzatması, sülh müqaviləsi imzalamaqdan imtina etməsi valideynlərdə narahatlıq yaradır və onlar artıq öz övladlarının mənasız bir döyüşdə həlak olmasını istəmirlər. Onlar vətəndaşlıqdan imtina etməklə həm də bir növ öz övladlarının Azərbaycana qarşı döyüşməsinin qarşısını almaq istəyirlər. Başqa çarələri də yoxdur. Bu əslində Ermənistanın nasist xislətli siyasi hakimiyyətinin liderlərinə qarşı etiraz aksiyasıdır. Onlar bunu anlamalıdır. Azərbaycan Prezidentinin dəfələrlə qeyd etdiyi kimi, əgər Qarabağda yaşayan ermənilər Azərbaycan vətəndaşlığını qəbul edərlərsə, təbii olaraq onların təhlükəsizliyi, hüquq və azadlıqları təmin ediləcək, Azərbaycan dövləti konstitutsiyada ehtiva edilən özünün ali məqsədini bu vətəndaşlara da şamil edəcək. Yəni onların layiqli həyat səviyyəsini təmin edəcək, hüquq və azadlıqlarının həyata keçirilməsi üçün zəmanət verəcək. Bu məqsəd dəfələrlə Azərbaycanın dövlət başçısı tərəfindən bəyan edilib. Ermənilərin Azərbaycan vətəndaşlığına qəbul olunması məsələsinə gələcəkdə sadə üsulla baxıla bilər”.
İradə SARIYEVA
