Belə görünür ki, Azərbaycan ATƏT-in işini əngəlləyə bilər. Azərbaycan Bakı ilə razılaşdırılmadan ATƏT Katibliyinin Ermənistana ehtiyacların qiymətləndirilməsi missiyası göndərmək qərarına cavab olaraq ATƏT-in 2023-cü il üçün büdcəsinin müzakirəsində iştirakını dayandırıb.
Azərbaycanın ATƏT-dəki nümayəndəliyinin bununla bağlı bəyanatında deyilir: “Sülhün əldə olunması məqsədlərinə nail olmaq, regionda etimadın yaradılmasına töhfə verməkdənsə, Azərbaycanla əməkdaşlıqdan imtina etmək və birtərəfli qaydada “ehtiyacların qiymətləndirilməsi” missiyasını əvvəlcədən müəyyən edilmiş məqsədlər və nəticələrlə göndərmək əks-effekt verəcək. Bu səfər oktyabrın 6-da Praqada Ermənistan və Azərbaycan liderlərinin Birləşmiş Millətlər Təşkilatının Nizamnaməsinə və 1991-ci il Alma-Ata Bəyannaməsinə sadiqliklərini təsdiqlədikləri yüksək səviyyəli sonuncu görüşdən sonra elan edilib. Azərbaycan əlavə etimad quruculuğu tədbiri kimi Avropa İttifaqının mülki missiyasının Ermənistan və Azərbaycan sərhədi boyunca Ermənistan ərazisinə keçməsinə etiraz etməyib. Bu hərəkət ATƏT-in regionda "vicdanlı vasitəçi” kimi rolunu daha da məhdudlaşdıracaq, Minsk Qrupunun fəaliyyətilə və digər ATƏT strukturları tərəfindən artıq ciddi şəkildə zədələnmiş bu təşkilata inamı daha da azaldacaq. Mövcud vəziyyət düzələnə və ATƏT-in sənədlərinə və qərarlarına uyğunluq bərpa olunana qədər Azərbaycan nümayəndəliyi gələn il üçün büdcə layihəsini nəzərdən keçirməyəcək”.
Məlumata görə, Azərbaycan təşkilatın büdcəsini təsdiqləməsə, bu, qurumun strukturlarının işinin iflic olmasına gətirib çıxara bilər.
“Bununla ATƏT regionda sülh prosesinə töhfə vermək əvəzinə, əksinə, sülh prosesini pozur”
Məsələyə münasibət bildirən Aydınlar Partiyasının sədri Qulamhüseyn Əlibəylinin fikrincə, ATƏT-in məlum birtərəfli qərarı konsensus prinsipinin pozulması deməkdir: “ATƏT “ehtiyacların qiymətləndirilməsi” missiyasını birtərəfli şəkildə Ermənistana göndərməklə, öz səlahiyyət həddini aşır. Çünki ATƏT rəhbərliyində bütün məsələlər tərəflər arasında konsensus əsasında həll etməlidir. Əvvəllər Azərbaycan ATƏT-ə bir neçə dəfə müraciət etdi ki, Qarabağa faktaraşdırıcı missiya göndərilsin. Ermənistan buna veto qoyduğu üçün uzun illər faktaraşdırıcı missiya göndərmədilər. O üzdən, Ermənistana “ehtiyacların qiymətləndirilməsi” missiyasının göndərilməsi Azərbaycanla razılaşdırılmalı idi. Bu olmadan qərarın bitərəfli qəbul edilməsi o deməkdir ki, ATƏT regionda sülh prosesinə töhfə vermək əvəzinə, əksinə, sülh prosesini pozur. Bununla əslində ermənilərin dediklərini təsdiq etmək üçün zəmin yaradır. Ona görə də Azərbaycanın məlum cavabı tamamilə haqlı və düzgündür. Çünki ATƏT konsensus prinsiplərinə saymazyana yanaşaraq tərəf mövqeyi tutur. Azərbaycanın atdığı adekvat addımlar gələcəkdə həqiqətən də ATƏT-in işini poza bilər”.
Bir sözlə, partiya sədri hesab edir ki, bütün bu baş verənlərə görə məsuliyyət ATƏT-in üzərinə düşür.
Vidadi ORDAHALLI
