“Biz görürük ki, üçüncü ölkələr, hətta bəzən bizim üçün gözlənilməz olan üçüncü dövlətlər yol məsələsində (Zəngəzur dəhlizi) Azərbaycanı dəstəkləyirlər”. Bunu Ermənistanın xarici işlər naziri Ararat Mirzoyan mətbuat üçün keçirilən brifinqdə deyib.
Mirzoyan bununla etiraf edib ki, bir sıra məsələlərdə, əsasən də Zəngəzur dəhlizi məsələlərdə xarici ölkələr Azərbaycanın mövqeyini dəstəkləyir. O qeyd edib ki, 10 noyabr bəyanatında və digər sənədlərdə nəqliyyat və iqtisadi infrastrukturların açılmasının vacibliyi vurğulanır: “Bu sənədlərdə Naxçıvanla Azərbaycanın əsas hissəsi arasında nəqliyyat əlaqələrinin yaradılması da qeyd olunur. Biz dəfələrlə bildirmişik ki, Azərbaycanın sərnişin daşımaları və yük daşımaları üçün yollar açılmalı, açılan infrastruktur ölkələrin suverenliyi altında qalmalıdır. Biz bunu təsdiqləməyə hazırıq. Naxçıvandan Azərbaycanın əsas hissəsinə gedən yoldan üçüncü ölkə vətəndaşları da keçə bilərlər. İnanırıq ki, bu məsələdə daha müasir həll yolları ola bilər. Amma əsas tələb odur ki, yol bizim suverenliyimizdə qalsın və qanunvericiliyimizə uyğun fəaliyyət göstərsin”.
Görünən odur ki, Ermənistan tərəfi yol məsələsində nə qədər fərqli davranmağa çalışsa da, bir sıra ölkələr Azərbaycanın mövqeyini dəstəkləyir.
“Belə baxış Ermənistan cəmiyyətini, ictimai rəyi indidən Zəngəzur dəhlizi reallığına hazırlamaq kimi də anlaşıla bilər”
Məsələyə münasibət bildirən İdarəçilik Akademiyasının müəllimi, sosioloq Hüseyn İbrahimovun sözlərinə görə, Mirzoyanın məlum etirafı bundan əvvəl Nikol Paşinyanın açıqlaması ilə oxşardır: “Məsələ ondadır ki, təxminən bir ay əvvəl Ermənistan baş naziri bu səpkidə etirafla çıxış etdi. Açıq eyham vurdu ki, bir sıra ölkələr Zəngəzur dəhlizi məsələsində Azərbaycanın mövqeyini dəstəkləyir. O cümlədən bildirdi ki, dünya dövlətləri Qarabağı Azərbaycandan kənarda təsəvvür etmirlər. Mirzoyanın etirafı o anlama gəlir ki, Ermənistan bir sıra reallıqları dəyişməyin mümkün olmadığının fərqindədir. Bu cür etiraflar Azərbaycanın haqlı olduğu kimi də səslənə bilər. İkinci bir tərəfdən bu, Ermənistan cəmiyyətini, ictimai rəyi indidən Zəngəzur dəhlizi reallığına hazırlamaq kimi də anlaşıla bilər. Hesab edirəm ki, ümumən bütün bunlar Azərbaycanın mənafeyinə uyğundur. Baxmayaraq ki, Ermənistan hakimiyyəti hələ də Zəngəzur dəhlizinin reallaşmasına müqavimət göstərir. Ancaq hesab edirəm ki, bu həmişə belə olmayacaq. Əvvəl-axır Ermənistan geri addım atacaq. Çünki Zəngəzur dəhlizinin açılması təkcə Azərbaycanın xeyrinə deyil. Bu, regionun və eləcə də Ermənistanın xeyrinə olacaq. Nəzərə almaq lazımdır ki, Ermənistan uzun illər özünü bir sıra layihələrdən təcrid edib. Nəticədə onlar bundan itiriblər. Zamanında beynəlxalq təşkilatlar, böyük güclər Ermənistanın işğalçılıq siyasətinə göz yummasaydılar, məsələ bu dərəcədə uzanmazdı. Ancaq indi həm situasiya dəyişib, həm də bir sıra reallıqlar. Ermənistan rəhbərliyi görür ki, Ermənistanın gələcək inkişafı region dövlətləri ilə inteqrasiyadan keçir. O üzdən, Zəngəzur dəhlizinin açılması qaçılmazdır. İstənilən halda, Azərbaycan böyük siyasi iradə göstərərək öz məqsədlərinə çatacaq. Ancaq yaxşı olardı ki, ikitərəfli qarşılıqlı əməkdaşlıq şəraitində bu reallaşsın. Çünki bu, həm də sosial bir layihədir”.
Ekspert onu da əlavə etdi ki, Ermənistan uzun illər yeritdiyi təcrid siyasətindən əl çəkməlidir.
Vidadi ORDAHALLI
