Ermənistanın eks-prezidenti Robert Köçəryan növbəti dəfə yerli medianın gündəminə gəlib. Ermənistan parlamentinin keçmiş deputatı Arman Babacanyan verdiyi açıqlamalarda qeyd edib ki, ABŞ-da İrəvandan daşınmış nəhəng erməni kapitalı toplanıb.
Levon Ter-Petrosyan hakimiyyətinin son dövründə çalışmış rəsmilər, xüsusən də Robert Köçəryan və Serj Sarkisyanın 20 illik prezidentliyi zamanında işləmiş yüksək rütbəli məmurlar xaricə milyardlar daşıyıblar. Bunlar baş nazirlər, baş nazirin müavinləri, nazirlər, nazir müavinləri, deputatlar olublar ki, onlar da ABŞ, xüsusilə Cənubi Kaliforniya bölgəsində çirkli pullar gizlədiblər.
Çox maraqlıdır, Köçəryanı Putinlə şəxsi dostluq telləri bağlayır. Sarkisyan da Rusiyaya meylli siyasətçi sayılıb. Hətta onların hakimiyyətə gəlməsi və əldə etdikləri bir sıra müvvəqəti uğurlarda da Rusiyanın böyük rolu vı dıstəyi olub. Onda maraqlıdır, niyə Ermənistanın keçmiş siyasi elitası öz çirkli pullarını Rusiyada deyil, məhz ABŞ-da yerləşdirib?
Elçin Qurbanov: “Deməli, lazım gələndə ABŞ öz ölkəsinin qanunvericiliyindən irəli gələn tələbləri arxa plana atır və belə hallara göz yuma bilir”
İqtisadçı Elçin Qurbanov “Bakı-Xəbər”ə açıqlamasında bildirdi ki, nəinki Köçəryan, eləcə də Ermənistanın bütün keçmiş rəhbərliyi bu mövzuda ABŞ-a üz tutub: “Bunun bir sıra siyasi və iqtisadi səbəbləri var. ABŞ çirkli pulların yuyulması və cinayət yolu ilə əldə edilmiş vəsaitlərin leqallaşdırılması ilə mübarizə sahəsində mövcud beynəlxalq konvensiyaların əsas tərəfdaşı və təşəbbüskarıdır. Nədənsə, ABŞ-dakı erməni lobbisinin qucağına sığınan Ermənistanın sabiq rəhbərliyi bu cür cinayət sövdələşməsində dünyaya insan haqları və demokratiyadan dərs keçən ABŞ-a etibar edirlər. Söhbət, xüsusilə də Kaliforniyadan gedirsə, həmin ştat erməni diasporunun ən sıx məskunlaşdığı yerdir. Deməli, lazım gələndə ABŞ öz ölkəsinin qanunvericiliyindən irəli gələn tələbləri arxa plana atır və belə hallara göz yuma bilir. Çirkli pulların yuyulması ilə bağlı ən ənverişli ölkə Rusiya və onun regionları sayılır. Sadəcə, onlar üçün etibarlı deyil. Deməli, Ermənistanın keçmiş siyasi rəhbərləri Putinlə əməldə deyil, sözdə dost olublar. Bu, Putinə olan etibarsızlığın bir nümunəsidir. Həm də, ermənilər türk toplumunun çoxluq təşkil etdiyi Rusiyaya tam mənasında etibar edə bilmirlər. Əslində, ABŞ belə mövzuları tez araşdıra bilir. Hətta əmlaklar başqa adamın adına olsa belə, onun əsl sahibini müəyyənləşdirmək ABŞ üçün elə də çətin deyil. Erməni siyasıtçilərə belə “güzəştin” edilməsinin kökündə ABŞ-ın başqa marağı da dura bilər. Bu yolla Ermənistanda təsir gücünə malik siyasətçiləri Rusiyanın təsir darəsindən çıxarıb, öz orbitinə daxil etmək istəyir. Böyük həcmdə kapitalı hansısa ölkədə olan siyasilər birbaşa olmasa da, dolayısı ilə asılı olurlar”.
İqtisadçının sözlərinə görə, əksər hallarda Köçəryan, Sarkisyan kimi adamların oğurlayıb xarici ölkələrdə yerləşdirdikləri milyardları geri qaytarmaq həmin dövlətlərin yeni hökumətlərinə ya nəsib olmur, ya da çox çətin başa gəlir: “Buna cəhd edənlər cinayət, mülki və inzibati məhkəmə orqanları arasında qalırlar. Oğurluq sərvətin qaytarılması üçün dövlətlərin, ayrı-ayrı qurumların əməkdaşlığı tələb edilir. Bu isə bir çox hallarda mümkün olmur.
Əslində, BMT-nin Korrupsiya ilə mübarizə Konvensiyası bu sahədə əsas baza rolunu oynamalıdır. Amma əksər hallarda sərvətin geri qaytarılması prosesi müxtəlif maneələrlə müşayiət olunur”.
Məhəmmədəli QƏRİBLİ
