Oktyabrın 24-də Prezident İlham Əliyevin Gürcüstana işgüzar səfəri zamanı Gürcüstanın baş naziri İrakli Qaribaşvili ilə görüşündə bir daha təsdiq olundu ki, Azərbaycanla Gürcüstan bir-biri ilə çox yaxındır. Prezident İlham Əliyevin Gürcüstana səfər etməsi, habelə bu ölkənin Baş naziri Qaribaşvili ilə birgə “Qarabağ xanlığının irsi” sərgisində olması, bu sərginin məhz Mçxetidə keçirilməsi erməniləri bərk qıcıqlandırıb.
Baki-xeber.com xəbər verir ki, Azərbaycan və Gürcüstan arasında dinamik inkişaf edən münasibətlər Ermənistanda qorxuya səbəb olub. Məsələ ilə bağlı “armenianreport” portalı yazır: “Gürcülər düşünməsinlər ki, antierməni siyasəti onlara asan başa gələcək. Ermənistanın Gürcüstana təzyiq rıçaqları var. Gürcüstanla heç vaxt bəxtimiz gətirmədi. 1918-ci ildə gürcülər Ermənistana “hücum edərək” ermənilərin məskunlaşdığı Axalkalakini işğal ediblər. SSRİ dağılandan sonra gürcülər tez bir zamanda öz mövqelərini bildirib Azərbaycan və Türkiyənin tərəfini tutdular. Bu gün Gürcüstan iqtisadiyyatının bir çox sahələri azərbaycanlıların əlindədir. Gürcüstanın regionda Bakı və Ankaranın peykinə çevrildiyini söyləmək olar. Tiflis sözdə mehriban qonşuluqdan danışsa da, antierməni siyasət yeridir. 44 günlük müharibə zamanı gürcülər Rusiyadan gələn hərbi yüklərin Ermənistana keçməsinə icazə vermədilər... Gürcüstanın Ermənistana qarşı qeyri-dost münasibəti kontekstində Azərbaycan prezidentinin Tiflisə işgüzar səfəri də nəzərə alınmalıdır. Etiraf etmək lazımdır ki, gürcülər Əliyevi çox səmimi qarşıladılar. Bu başadüşüləndir - o, Gürcüstan iqtisadiyyatına böyük sərmayə qoyur (təxminən 3 milyard dollar), iqtisadiyyatın bir çox sahələri azərbaycanlıların əlindədir. Gürcüstanın baş naziri Əliyevi sevindirmək üçün az qala hər şeyi etdi. Qaribaşvili bildirdi ki, Gürcüstan Azərbaycan üçün ən vacib ölkələrdən və dostlardan biridir. Azərbaycan isə Gürcüstanın ən mühüm strateji tərəfdaşıdır. Əliyev və Qaribaşvili “Qarabağ xanlığının irsi” sərgisində oldular. Bununla da tərəfini seçən gürcülər özlərini sadəcə donuz kimi apardılar. Erməni tərəfi gürcü qonşuların bu cür nalayiq davranışından müəyyən nəticələr çıxaracaq. Gürcülər düşünməsinlər ki, antierməni siyasətlərinə görə belə asan qurtula bilərlər. Ermənistanın Gürcüstana təzyiq rıçaqları var, xüsusən də Cavaxetiya məsələsində. Bu bölgənin əhalisinin böyük əksəriyyətini Ermənistana meyl edən ermənilər təşkil edir. Onlar üçün gürcülərin boyunduruğu altında yaşamaq ildən-ilə çətinləşir. Üstəlik, Tiflis bölgə ilə heç maraqlanmır və hətta orada narazılıq yaradır. Ermənistanın Cavaxetiyanın bizə qaytarılması məsələsini gündəmə gətirməsinin vaxtı çatıb”.
"Ermənistan Gürcüstanda yaşayan ermənilərdən bir alət kimi istifadə etmək barədə düşünür"
Məsələyə şərh verən Azərbaycan Naminə Alyans Partiyasının sədri Abutalıb Səmədov "Bakı - Xəbər"ə bildirdi ki, Azərbaycan Prezidentinin Gürcüstana səfəri, onun bu səfər zamanı çox istiliklə, mehribanlıqla qarşılanması Ermənistanın ciddi narahatlığına səbəb olub: "Azərbaycan Prezidentinin Gürcüstan səfəri Ermənistanda çox böyük narahatlıqla qarşılanıb. Gürcüstan Baş nazirinin Azərbaycan Prezidentinə göstərdiyi diqqət, onun Azərbaycan barədə verdiyi bəyanat, Azərbaycanı Gürcüstanın ən əsas müttəfiqi elan etməsi erməniləri qıcıqlandırıb. Ermənistanın ayrı-ayrı siyasi xadimləri, politoloqları Gürcüstan əleyhinə bəyanatlar verirlər. Həmin erməni saytı da Gürcüstan əleyhinə çox kəskin məqalə yazıb və bu ölkəni Cavaxetiyanı Gürcüstana qarşı çıxaracaqları ilə hədələyib. Ermənilər Gürcüstanı Cavaxetyada ikinci Qarabağ oyunu, Qarabağ fitnəkarlığı çıxarmağa başlayacaqları ilə hədələyib. Erməni mətbuatı 44 günlük müharibədə də Gürcüstanın Azərbaycanı müdafiə etdiyini yazıb. Həqiqətən də belədir. Azərbaycan Prezidenti də müsahibələrinin birində açıq şəkildə dedi:"44 günlük müharibə dövründə bizim əsas vəzifəmiz qonşularımızın neytrallığını təmin etmək idi. Bəzi qonşularımız müəyyən səviyyədə, bəziləri isə yüksək səviyyədə neytrallıq nümayiş etdirdilər". Gürcüstan həmin günlərdə Azərbaycanın yanında olduğunu əməlləri ilə sübut etdi. Öz ərazisindən Ermənistana silah daşınmasına da imkan vermədi və Rusiyadan gələn silahlar uzun yol qət edib İran vasitəsilə Ermənistana çatdırıldı. Bu da, təbiidir ki,
aparılan silahların sayına da ciddi təsir göstərdi. Ermənilər bunu sözsüz ki, unutmayıblar. Ermənistan Gürcüstanda yaşayan ermənilərdən bir alət kimi istifadə etmək barədə düşünür. Amma təbiidir ki, bunu edə bilməzlər. Cavaxetyada yaşayan ermənilər də buna getməz, çünki son illər Qarabağ avantürasının ermənilərin başına nələr gətirdiyini yaxşı müşahidə etmək imkanları oldu".
A.Səmədovun sözlərinə görə, ayrı-ayrı fitnəkarlar çalışsalar da, Gürcüstanda yaşayan ermənilərini bu işə qoşmaq, öz firnəkarlıqlarına cəlb etmək mümkün olmayacaq.
"Ancaq Gürcüstan əleyhinə verilən bəyanatlar da göstərir ki, ermənilər Azərbaycanın regionda və keçmiş ittifaq məkanında nə qədər böyük nüfuz sahibi olduğunu görürlər və Azərbaycanın gücü qarşısında çarəsiz duruma düşdüklərini etiraf etmək məcburiyyətində qalırlar". A.Səmədov qeyd etdi ki, eyni vəziyyət Kollektiv Təhlükəsizlik Müqaviləsi Təşkilatında da yaşanır. Onun sözlərinə görə, ermənilər dəfələrlə deyiblər ki, biz həmin təşkilatın üzvüyük, ancaq bizim müttəfiqlərimizin böyük əksəriyyəti Azərbaycanın dostlarıdır. "Baxmayaraq ki, Azərbaycan Kollektiv Təhlükəsizlik Müqaviləsi Təşkilatının üzvü deyil. Bu vəziyyət Azərbaycan hakimiyyətinin apardığı son dərəcə ağıllı, müdrik, düzgün siyasətin nəticəsidir. Bu siyasət son illər Azərbaycana böyük uğurlar gətirib. Ancaq düşünürəm ki, böyük uğurlarımız qarşıdadır"-deyə A.Səmədov qeyd etdi.
İradə SARIYEVA
