Mətbuatın yaydığı məlumata görə, “Türkiyə” qəzetinin yazarı Yılmaz Bilgin sensasion açıqlama ilə çıxış edib. O, məqaləsində “Qafqazda Ermənistan və Aralıq dənizində Yunanıstanı oyuncağa çevirmək istəyən Fransanın sözün əsl mənasında odla oynadığını” bildirib. “Makronun Qarabağı işğal planı var.
O, bölgəyə 2000 əsgər göndərmək istəyir. Qarabağa 15 bəndlik işğal planı hazırlayan Fransa Prezidenti Avropa Birliyi ölkələrindən dəstək istəyib. O, həmçinin, Nikol Paşinyana danışıqlar prosesini uzatmağı tapşırıb. Müəllif iddia edib ki, Makron “Azərbaycan-Türkiyə müttəfiqliyinin uğurlarının həm meydanda, həm də masada təkrarlanması Ərdoğana 2023 seçkilərində böyük bir imkan verəcək”, - deyib. KİV-də qeyd edilir ki, Yılmaz Bilgin iddiasının hardan qaynaqlandığı və “15 bəndlik işğal planı”nda nələrdən bəhs edildiyini açıqlamayıb.
“Makron Paşinyana təsir və təzyiq edir ki, Azərbaycanla Ermənistan arasında sülh müqaviləsinin imzalanması ləngisin, uzansın”
“Türkiyə” qəzeti yazarının təhlillərinə diqqət yetirsək görərik ki, Fransa prezidenti Emanuel Makronun əsas məqsədi Ermənistanın Baş naziri Nikol Paşinyana danışıqlar prosesini uzatmaq üçün təsir göstərməkdir. Makron Paşinyana açıq və örtülü şəkildə təsir edir ki, Azərbaycanla bağlanacaq sülh müqaviləsinin imzalanması prosesini mümkün qədər uzatsın. Göründüyü kimi, Fransa sülh müqaviləsininin imzalanmasına zərbə vurmaqda davam edir və çalışır ki, sülh müqaviləsinin qarşısında əngəllər yaratsın. Məsələyə şərh verən AMEA-nın Fəlsəfə və Sosiologiya İnstitutunun aparıcı elmi işçisi, fəlsəfə doktoru, BAO sədrinin müavini, siyasi şərhçi Faiq Ələkbərli hesab edir ki, E.Makron öz dövlətinin ermənipərəst siyasətini davam etdirməklə yanaşı, həm də sülhün yaranmasına qarşı olduğunu büruzə verir. F.Ələkbərli qeyd etdi ki, Fransanın həm Birinci Qarabağ müharibəsi dövründə, həm ötən 30 il ərzində, həm də İkinci Qarabağ müharibəsində və ondan sonra tutduğu mövqe bir-birindən fərqlənmir. Fransanın hər zaman Azərbaycan və Ermənistan arasında ayrıseçkilik etdiyini xatırladan siyasi ekspert təəssüflə bildirdi ki, buna baxmayaraq, Fransa uzun illər ATƏT-in Minsk qrupunun həmsədri oldu. F.Ələkbərlinin dediyinə görə, münaqişənin ədalətli həllində heç bir təşəbbüsü, addımı olmayan, ermənistanpərəst Fransanın həmsədr ölkələrdən biri olmasına o vaxt razılaşdıq. Bununla belə, F.Ələkbərli hesab edir ki, Rusiyanın və ABŞ-ın həmsədrliyindən sonra Fransanın həmsədrliyi qəbuledilməz idi, ən yaxşı halda onun yerində Almaniya olmalı idi. Amma ermənipərəst Fransanın həmsədr olması təsadüfi deyil. Son 30 ildə Fransa prezidentlərinin hamısınən Ermənistana ciddi dəstək verdiyini xatırladan F.Ələkbərli qeyd edir ki, bu sadəcə Makronun dövründə belə açıq şəkildə büruzə verilib. “Makronun Qarabağa 2000 əsgər göndərmək istəyinin olması ilə bağlı dəqiq heç nə demək mümkün deyil. Amma buna yaxın hansısa məsələləri düşündüyü bəllidir. Söhbət Makrondan getmir, bütövlükdə Fransa dövlətinin Ermənistanın məğlubiyyətini həzm edə bilmədiyi bəllidir. Bu məsələdə Fransanın İranla iş birliyinin olması da istisna olunmur. Çünki Fransa və İran, demək olar ki, Ermənistanın yanında yer alıblar. Yəni son 30 ildə də, indi də İranın mövqeyi bəllidir və biz axır dövrlər hər iki ölkənin Azərbaycana qarşı fəallaşdığını görürük. Bu gün bütün mümkün variantlardan istifadə edib Azərbaycanın qələbəsinə kölgə salmaq istəyirlər. Mənə elə gəlir ki, Fransa ilə yanaşı elə İran da danışıqların uzanmasına, hətta Ermənistanla Azərbaycan arasında yeni bir hərbin olmasına tərəfdardır. Hindistanın və Yunanıstanın burada məkrli niyyətləri var, onlar da yeni qarşıdurmanın çıxmasını körükləyir. Fransaya gəlincə, o, Ermənistana aşkar şəkildə dəstək göstərir, yeri gəlsə, onun bölgəyə hərbiçi göndərmək niyyəti də ola bilər”.
F.Ələkbərli hesab edir ki, “Türkiyə” qəzetinin yazarının belə bir yazı ilə çıxış etməsi əsassız deyil. O qeyd edir ki, Makronun Paşinyana təsiri açıq şəkildə müşahidə edilir. “Paşinyana Rusiya tərəfindən hansı təzyiqlər göstərildiyi məlumdur. Çünki bu təsir onun Ermənistanı Rusiyanın təsir dairəsindən çıxarmaq istəyinə qarşı yönəlib. Paşinyan da burada oyunlar oynayır ki, Rusiya ilə, yoxsa Fransanın və İranın əli ilə Ermənistanı xilas etmək olar. Bu gün Fransa açıq şəkildə həm Zəngəzur dəhlizinin açılmasına qarşıdır, həm də sülh müqaviəsinin imzalanmasını istəmir. Paşinyan da göründüyü kimi, gah deyir ki, Zəngəzur dəhlizi açılacaq, sülh müqaviləsi imzalanacaq, gah da əksini deyir. Makron Paşinyana təsir və təzyiq edir ki, Azərbaycanla Ermənistan arasında sülh müqaviləsinin imzalanması ləngisin, uzansın. Bütövlükdə, Fransa sülhə zərbə vurmaq yolunu tutub və İranı da bu mənfi prosesə cəlb edib. Mənə elə gəlir ki, Fransa özü edə bilmədiyini bu və ya digər şəkildı İranın əli ilə edir. İran gah sərhəddə qoşun toplayıb təlim keçir, gah Qafanda konsulluq açır, gah da müxtəlif addımlar atır. Hesab edirəm ki, Fransa və İran bu işin bir hissəsidir və sülh müqaviləsinin imzalanmasına mane olmaqla gələcəkdə yeni bir müharibənin başlanmasının əsasını qoymağa çalışırlar. Ermənistan silahlandırılır, hərbi yardım alır, sabah ona əsgəri yardım da verilə bilər. Bu da bir ehtimaldır”-deyə bildirən F.Ələkbərlinin fikrincə, bu istiqamətdə Azərbaycanın görəcəyi tədbir Türkiyə və digər türk dövlətləri ilə, Pakistanla münasibətləri daha da gücləndirmək, dərinləşdirməkdir…
İradə SARIYEVA
