Tezliklə Rusiyadan Quzey Kıbrıs Türk Cümhuriyyətinə (KKTC) birbaşa uçuşların başlayacağı və Moskvanın 2022-ci ilin sonuna qədər Şimali Lefkoşada konsulluq açacağı bildirilib.
Türkiyə prezidenti Rəcəb Tayyib Ərdoğan Birləşmiş Millətlər Təşkilatının (BMT) 77-ci Baş Assambleyasında verdiyi açıqlamada ölkələri Quzey Kıbrıs Türk Cümhuriyyətini (KKTC) tanımağa çağırıb.
Rusiyanın “İzvestiya” qəzetinə danışan yüksək səviyyəli mənbələr Rusiyanın KKTC-yə birbaşa uçuşlar açacağını təsdiqləyib. Eyni mənbələr Moskvanın Şimali Lefkoşada konsulluq açmağa hazırlaşdığını da bildiriblər. Lakin mənbələr birbaşa uçuşları yalnız Rusiya özəl şirkətinin həyata keçirəcəyini və bunun Rusiya dövlətinin qərarı olmadığını bildirib: "Bu, Rusiya özəl aviaşirkətinin təşəbbüsüdür. Aviaşirkət birbaşa uçuşlar təşkil etməyi planlaşdırır. Lakin bu, KKTC-nin Rusiya tərəfindən diplomatik olaraq tanındığı anlamına gəlmir. Moskvanın KKTC ilə bağlı mövqeyi eyni qalacaq".
Mövzu ilə bağlı məlumatlarının olduğunu deyən mənbələr "Rusiya Federasiyası Kıbrısın şimalında konsulluq açmaq imkanını nəzərdən keçirir. Bu mövzuda da işlər aparılır. Çünki 10 mindən çox Rusiya vətəndaşı orada yaşayır və onlar üçün konsulluq xidmətləri mövcud deyil. 2022-ci ilin sonuna qədər açmağı planlaşdırdığımız bu konsulluq binası KKTC olması göstərilmədən "Şimali Lefkoşada Rusiya konsulluğu" adlandırılacaq", deyə bildirib.
Qeyd edildiyi kimi, tezliklə Rusiyadan Quzey Kıbrıs Türk Cümhuriyyətinə (KKTC) birbaşa uçuşların başlayacağı və Moskvanın 2022-ci ilin sonuna qədər Şimali Lefkoşada konsulluq açacağı bildirilib.
Qüzey Kıbrıs Türk Cumhuriyyətində Rusiyanın ofisi açılır və bu da o deməkdir ki, artıq o tanınmağa başlayır. Düzdür, deyirlər ki, tanınmaqdan söhbət getmir, sadəcə ofis açılır və s. Bununla belə, Azərbaycanın da Quzey Kıbrıs Türk Cümhuriyyətində ofis açmasına fürsət yaranmırmı?
“Azərbaycanın halal haqqıdır ki, dostuna, müttəfiqinə, qardaş dövlətə dəstək nümayiş etdirsin, bu müstəvidə istədiyi addımı atsın”
Siyasi və Hüquqi Strateji Araşdırmalar Mərkəzinin rəhbəri Xəyal Bəşirov “Bakı-Xəbər”ə şərhində bildirdi ki, Rusiyanın KKTC-də konsulluq açması ilə bağlı informasiyalar intensiv şəkildə yayılmağa başlayıb: “Rəsmi qaydada Rusiyanın KKTC-də konsulluğunun açılması ilə bağlı fikirlər səsləndirilməkdədir, mövqe bildirilməkdədir. Düşünürəm ki, dünyada artıq bir sıra proseslər başlayıb. Fikrimcə, Ukrayna münaqişəsinə, müharibəsinə görə artıq dünyada ayrı-ayrı dövlətlər, xüsusən də Şərq-Qərb qütbündə yerləşən dövlətlər bir-birinə qarşı müəyyən addımların atılması ilə fəqrlənməkdədirlər. O cümlədən də Ukrayana müharibəsinə görə bütün Qərb ölkələrinin mütləq əksəriyyətinin Rusiyaya qarşı birləşməsi bu ölkəni müəyyən addımlar atmağa vadar edir. O cümlədən də, bu məsələdə müəyyən qədər neytral mövqe tutan, eyni zamanda prosesin sülh və danışıqlar yolunda həllinə üstünlük verən, NATO dövləti, NATO ölkələrinin, Qərb dövlətlərinin və ABŞ-ın müttəfiqi olmasına baxmayaraq, Ukrayna məsələsində tamamilə fərqli mövqe tutan Türkiyə dövlətinin mövqeyi Rusiya tərəfindən müəyyən mənada dəstəklənməkdədir. Çünki baş verən bir sıra prosesləri, eləcə də Rusiyaya qarşı siyasi-iqtisadi sanksiyaları dəstəkləməyən, o cümlədən də Ukraynanın silahlandırılması məsələsində neytral mövqe tutan Türkiyənin bu addımları Rusiyanın da rəğbətini qazanıb. Fikrimcə, bu heç də Türkiyənin Ukrayna məsələsində Rusiyanın mövqeyini dəstəkləməsi deyil...”
X.Bəşirovun sözlərinə görə, Türkiyə və Rusiya arasında mövcud olan münasibətlər nəticəsində artıq Rusiya KKTC-də nümayəndəliyin, konsulluğun açılması ilə bağlı addım atmağı düşünür. O hesab edir ki, istənilən dövlət beynəlxalq aləmdə atacağı addımları ölçüb-biçməli, götür-qoy etməlidir, öz dövlətçilik və milli maraqlarına zidd olmayan addımlar atmağa üstünlük verməlidir. “Azərbaycana gəldikdə, təbii olaraq bilirik ki, Azərbaycan müstəqil siyasət yürüdür. Azərbaycanın yürütdüyü siyasət əsasən daim Azərbaycan xalqının, dövlətinin, dövlətçiliyinin maraqlarından irəli gələn maraqlarla bağlıdır. Mövzu ilə bağlı düşünürəm ki, həm İkinci Qarabağ müharibəsinə qədər baş verən proseslərdə, həm müharibənin reallaşdırılmasında, ondan sonra siyasi və diplomatik müstəvidə, informasiya cəbhəsində atdığı addımlarla nəyi necə və nə vaxt edəcəyini ən yaxşı bilən Prezident İlham Əliyevin bu məsələdə də addım atmasını gözləmək lazımdır. Çünki bu rəsmi şəkildə, dövlət səviyyəsində atılacaq bir addımdır. Bu hansısa vətəndaşın, ekspertin mövqeyindən asılı olmayan bir şəkildə atılacaq addım olduğuna görə, düşünürəm ki, bu, dövlət, dövlətin ən ali rəhbərliyi səviyyəsində atılacaq addımlardan biridir. Bu səbəbdən də bu məsələdə fərqli fikir səsləndirmək doğru olmazdı. Amma hər bir halda düşünürəm ki, İkinci Qarabağ müharibəsində və ondan sonrakı proseslərdə daim Azərbaycanın mövqeyinə dəstək nümayiş etdirən, müharibə dövründə bizə siyasi-diplomatik, mənəvi dəstəyini bir an olsun belə əsirgəməyən Türkiyə dövlətinin maraqlarına uyğun addımların atılması, təbii ki, Azərbaycan dövlətinin də, Azərbaycan xalqının da maraqlarına uyğundur. Çünki bu gün Azərbaycan dövlətinin də Türkiyə dövləti kimi dünyada və regionda günü-gündən nüfuzu artmaqdadır. Bu gün Azərbaycan dövləti Ukrayna müharibəsinə görə enerji böhranı ilə üz-üzə qalan Avropanın enerji xəritəsinin formalaşdırılmasında, o cümlədən də enerji təhlükəsizliyinin təmin edilməsində ciddi rolu olan və rolu günü-gündən artmaqda olan bir dövlətdir. Təbii ki, dünya dövlətləri, o cümlədən də Avropa ölkələri bu məsələdə Azərbaycanın mövqeyini, nüfuzunu qəbul edirlər. Prezident İlham Əliyevin keçirdiyi son görüşlər də bir daha bundan xəbər verir...”
X.Bəşirov hesab edir ki, bu gün Türkiyə ilə açıq şəkildə düşmənçilik siyasəti yürüdən, o cümlədən də bir müddət bundan əvvəl baş nazir səviyyəsində İrəvandan Azərbaycana qarşı bir sıra əsassız bəyanatlar verən və Ermənistanı dəstəklədiyini bildirən Yunanıstan dövlətinə Türkiyə ilə konfrontasiyaya getdiyi KKTC məsələsində qardaş ölkəyə dəstək vermək Azərbaycanın təbii haqqıdır: “Azərbaycanın halal haqqıdır ki, dostuna, müttəfiqinə, qardaş dövlətə dəstək nümayiş etdirsin, bu müstəvidə istədiyi addımı atsın. Bu bizim müstəqil siyasətimizdən irəli gələn addımlarla bağlıdır...Bu istiqamətdə Azərbaycan dövlətinin addım atmasına heç bir şey mane ola bilməz. Əgər bu qənaətə gəlinəcəksə, Azərbaycanın da analoji addım atması onun suveren hüququdur...”
X.Bəşirovun qeyd etdiyinə görə, İkinci Qarabağ müharibəsində və ondan sonra baş verən prpseslərdə Prezident İlham Əliyev daim belə fikirlər səsləndirib ki, Azərbaycanın haqlı mövqeyinə dəstək nümayiş etdirən və həmin o prosesdə ölkəmizin yanında olan istənilən dövlət bizə dost, bu məsələdə Azərbaycana qarşı olan dövlətlər isə, təbii ki, bizə dost olmayan dövlətlərdir. “İkinci Qarabağ müharibəsində və ondan sonrakı proseslərdə Yunanıstan daim Azərbaycana əsk qütbdə mövqe tutub, yer alıb. Fikrimcə, bu məsələdə Azərbaycanın dövlətçilik və milli maraqlarına zidd addım atılırsa, Azərbaycan da eyni cavabı vermək haqqında malikdir. Bu prizmadan yanaşsaq, təbii ki, bir tərəfdən Azərbaycanın milli maraqlarına, dövlətçilik maraqlarına, işğal dövründə ölkəmizin haqlı mövqeyinə dəstək olmayan, əksinə, təcavüzkar Ermənistanı dəstəkləyən Yunanıstanın Türkiyəyə qarşı da düşmən münasibət bəsləməsi sözügedən məsələnin reallaşması ehtimallarını mümkün qədər artırır. Fikrimcə, Azərbaycanın prinsipial və qətiyyətli iradəsinə uyğun olacaqsa, dövlətimizin bu addımı atmasına heç bir dövlət, qüvvə, təşkilat mane ola bilməz...Təbii, hər bir məsələnin reallaşmasının öz zamanı və müəyyən şərtləri var”-deyə X.Bəşirov vurğuladı...
Leyla QARAXANLI
