Apardığımız müşahidələr onu deməyə əsas verir ki, Azərbaycanın qazandığı zəfərdən sonrakı son iki il ərzində Azərbaycan dövlətinin düşmənlə müharibə siyasətinin və təbliğat strategiyasının əleyhinə çıxanlar arasında öz vətəndaşlarımız da az deyil.
Ölkənin içərisində və xaricində olan bəzi radikal qüvvələr bu dəfə olduqca biabırçı mövqe sərgiləyirlər. 2 il əvvəl “Azərbaycan hərbi əməliyyatları niyə dayandırdı?” bağırtısıyla efirlərdə hay-həşir salan, Ordumuzun irəliləməsini tələb edən bu adamlar hazırda tam fərqli mövqe ortaya qoyurlar. Sentyabrda erməni təxribatına cavab olaraq keçirdiyimiz əməliyyatı həmin radikallar, güya bizim Ermənistanın ərazisinə soxulmağımız kimi dəyərləndirir. Hətta deyirlər ki, bu addım bizi dünyada təcavüzkar kimi tanıdır, imicimizə böyük zərbə vurur. Ən qəribəsi budur ki, həmin adamlar 30 il erməni işğalına, təcavüzünə etiraz etməyən, indi isə açıq şəkildə Ermənistanın əlindən tutan Fransa və onun prezidenti Makronla eyni tezisi bölüşürlər.
Maraqlıdır, onda niyə “beynəlxalq təzyiqlər” bunların yadına düşmürdü?
Məgər bütün baş verənlər əsas verir ki, bu radikallar gedib erməni lobbisinin təbliğat maşınıyla birləşib, ölkəmizin, Ordumuzun əleyhinə kampaniya aparsın? Onların beynəlxalq təşkilatlara təqdim etdiyi tezisləri ölkənin içərisindən təsdiqləyib təkrarlamaqla bizə təzyiqlər üçün əlavə zəmin hazırlasınlar?
Müstəqil siyasətçi Bünyamin Qəmbərli “Bakı-Xəbər”ə açıqlamasında bildirdi ki, bu mövqedə olanların hərəkətinin müxalifliyə heç bir dəxli yoxdur: “Böyük Atatürk deyirdi ki, nə mutlu türkəm deyənə. Yəni bir insanın etnik baxımdan, ərazi və siyasi baxımlardan hansı millətə, dövlətə, siyasi quruma aid olması əsas deyil. Bir insanın düşüncə baxımından nəyə bağlı olması əsasdır. Bu insanlar etnik baxımdan Azərbaycan türkü, yaxud Azərbaycanda yaşayan hər hansı bir xalqa məxsus ola bilər. Amma onlar düşüncə baxımından Azərbaycana aid deyillər. Birinci səbəb odur ki, həmin yerlər müxtəlif dövrlərdə basqı, qorxu və aldatma ilə Ermənistana verilən ərazilərdir və tarixi Azərbaycan əraziləridir. İkinci səbəbə gəldikdə isə, bu gün sərhədlər nə xəritə üzərində, nə də yer üzərində dəqiqləşməyib. Belə bir halda bu insanlar hansı haqla deyirlər ki, Azərbaycan Ermənistan ərazisinə girib? Mən inanıram ki, bizim əsgərlərimizin durduğu yerdən müəyyən qədər irəlidə Azərbaycan sərhədləri formalaşacaq. Çünki demarkasiya və delimitasiya gedəndə aydın olacaq ki, biz torpaqlarımızdan çox uzaqdayıq. Əgər bu sərhədlər dəqiqləşməyibsə, bu gün Azərbaycan əsgərinin durduğu ərazini biz öz ərazimiz hesab ediriksə, belə bir halda əsgərlərimizin durduğu ərazini Ermənistan ərazisi elan edənin düşüncə, mədəniyyət və maraq baxımından Azərbaycana zərrə qədər aidiyyəti yoxdur. Bunlar Fransaya xidmat edir. Türkiyədə məşhur bir söz var: “fransız olmaq”. Fransızdırlar desək, daha düzgün olar. Yəni millətindən, dövlətindən, mədəniyyətindən xəbərsiz insanlara “fransız olmaq” deyirlər. Kimliyindən asılı olmayaraq, Azərbaycanı hər hansı təcavüzdə, işğalda ittiham etməyin bir adı var: Azərbaycana açıq düşmənçilik. Bunun nə müxalifliyə, nə Azərbaycançılığa dəxli var. Sadəcə olaraq, bu adamlar başqasının adı ilə, başqalarının dili ilə Azərbaycana öz nifrətlərini, qəzəblərini bildirirlər. Hələ Azərbaycan əsgəri müəyyən qədər irəli getməlidir ki, Azərbaycan sərhədlərində dursun”.
Məhəmmədəli QƏRİBLİ
