Müasir dövrdə demək olar ki, hər kəs sosial şəbəkədən yararlanır. Şəbəkədən istifadə müsbət və ya mənfi yönümlü ola bilər. Şəbəkənin inkişafı informasiya bolluğuna və əlçatımlılığına, ünsiyyət prosesinin daha optimal və rahat olmasına şərait yaradır.
Son 10 illər ərzində onlayn sosial şəbəkələr isə həyatın ayrılmaz parçasına çevirilib. Bununla yanaşı sosial şəbəkələr insanların fiziki təhlükəsizliyinə, informasiya təhlükəsizliyinə təhdid formalaşdıra bilər.
Sosial media bizi dostlar, ailə, iş yoldaşları və hətta digər kənar insanlarla bağlayır. Sosial mediada yayımladığınız məlumatlar bizim təhlükəsizliyimizə təhdid yarada bilər.
Danılmaz faktdır ki, son zamanlar Tik Tok sosial şəbəkəsinin istifadəçilərinin sayı artıb. Platformanın əsas narahatedici xüsusiyyəti dezinformasiyanın yayılmasını asanlaşdırmasıdır. İstifadəçiyə oxşar kontent təqdim edildiyi üçün yalan məlumatla bağlı videolar daha sürətlə yayılır. Eyni zamanda “TikTok”dan xəbər mənbəyi kimi istifadə edən şəxslərin sayı da günü-gündən artır. Azərbaycanda da xəbər mənbəyi olaraq “TikTok”dan istifadə edənlərin sayı heç də az deyil.
Qeyd etdiyimiz kimi, adıçəkilən platformada ölkə üçün narahatedici məlumatlar, videolar, ordu ilə bağlı yanlış məlumatlar yayılır. Bu səbəbdən də dəfələrlə Tik Tok sosial şəbəkəsinin Azərbaycanda bloklanması təklif olunub.
Sentyabrın 12-də gecə saatlarında Ermənistan silahlı qüvvələrinin Daşkəsən, Kəlbəcər və Laçın istiqamətlərində törətdikləri genişmiqyaslı təxribatla bağlı qeyd edilən platformada həqiqəti əks etdirməyən məlumatlar yayıldı. Həmçinin, Tik Tok-da müharibə ilı bağlı insanları təlaşdıran məlumatlar yayılırdı ki, bu da düzgün deyil.
Niyazi Məmmədov: “Ajiotaj yaradılacaq nüanslar varsa, məhdudiyyətlər tətbiq edilməlidir, bu yerində verilmiş qərardır”
İnformasiya və Kommunikasiya texnologiyaları üzrə ekspert Niyazi Məmmədov qeyd etdi ki, "TikTok" üzərindən ermənilər dezinformasiya yaymağa çalışırlar, bu səbəbdən də sosial şəbəkənin fəaliyyətinin müvəqqəti dayandırılması başa düşüləndir: “Ajiotaj yaradılacaq nüanslar varsa, məhdudiyyətlər tətbiq edilməlidir, bu yerində verilmiş qərardır. "TikTok" Azərbaycanda kifayət qədər məşhurlaşıb və daha çox kütləyə çatdığı üçün qarşı tərəfin də bu sosial şəbəkə üzərindən hansısa təxribatlar yarada biləcək məlumatları paylaşma ehtimalı var. Bu səbəbdən də həmin sosial şəbəkəyə müddətli məhdudiyyətin tətbiq olunması qəbulediləndir".
Həmsöhbətimiz onu da əlavə etdi ki, ölkəmizdə "tiktok"a daxil olanların 73.1 faizi18-24 yaşlı gənclərdir: “Yəni, Azərbaycan gəncliyinin ən çox istifadə etdiyi sosial şəbəkə "tiktok"dur. "Facebook" ictimai-siyasi şəxslərin, "İnstagram" isə daha çox orta yaş təbəqəsinin toplaşdığı məkandır. "Tiktok"un təhlükəli tərəfi isə burada əxlaqsızlığın, feyk xəbərlərin, zərərli vərdişlərin, "oğru aləmi"nin təbliğ olunmasıdır. Son zamanlar ölkədə nə baş verirsə, mənbəyi bu sosial şəbəkədən qaynaqlanır. Məsələn: Canlı yayım açıb narkotiki təbliğ edənlər, həyat yoldaşının əxlaqsız videosunu çəkənlər, qazi qardaşlarımızı qızışdırıb, "baxış" sayı yığanlar, xarici ölkələrdə baş verən iğtişaşları Azərbaycanda imiş kimi göstərənlər, "oğru aləmi" qəhrəmanlarına həsr edilən mahnıları, videoları yayanlar hamısı "tiktok"dadır. Bu səbəbdən adıçəkilən platformanın ölkəmizdə bağlanması təqdirəlayiqdir”.
Osman Gündüz: “İndiki şəraitdə bunu düzgün və lazımlı addım kimi dəyərləndirmək olar”
“Multimedia” İnformasiya Sistemləri Texnologiyaları Mərkəzinin direktoru Osman Gündüz qeyd etdi ki, “TikTok” bundan öncə də uşaqlara və yeniyetmələrə kifayət qədər zərərli informasiyalar verən bir sosial şəbəkə idi: “DTX-nın verdiyini açıqlama indi əvvəlki risklərə yenilərinin də əlavə olunduğunu göstərir. Hazırda bu sosial şəbəkədə Ermənistan-Azərbaycan sərhədində vəziyyətin gərginləşməsi ilə bağlı çaşqınlıq yaradacaq, düşmən üçün faydalı ola biləcək məlumatlar da yer alıb. “TikTok” istifadəçilərinin əksəriyyəti yeniyetmələr, uşaqlardır. Onlar da bəzən fərqinə varmadan, məlumatsızlıqdan bizim təhlükəsizliyimizə zərər verə biləcək paylaşımlar edirlər. DTX mövcud riskləri dəyərləndirərək aidiyyəti dövlət qurumları qarşısında belə bir vəsatət qaldırıb. Hesab edirəm ki, indiki şəraitdə bunu düzgün və lazımlı addım kimi dəyərləndirmək olar”.
Günel CƏLİLOVA
