Sərhəddə baş verən məlum insident Ermənistan üçün şok effekti yaratmaqla yanaşı, bu ölkənin diplomatiya sfersında da Azərbaycana ciddi şəkildə məğlub olmasının konkret təsdiq oldu.
Xatırladaq ki, məlum hadisədən sonra Ermənistanın baş naziri Nikol Paşiyanın Rusiya, ABŞ və Fransa rəsmiləri ilə hadisəyə dair telefon danışığı olub. O, BMT Təhlükəsizlik Şurasına və Kollektiv Təhlükəsizlik Müqaviləsi Təşkilatına da müraciət edib. Amma istədiyi cavabı almayıb. Erməni ekspert Aşot Safaryan bunun heç də təsadüf olmadığını qeyd edir: “Azərbaycan genişmiqyaslı siyasət yürüdür. Məhz Azərbaycan bu yaxınlarda Avropaya qaz tədarükünü 30%-ə qədər artırmağa söz vermiş Avropa İttifaqının ən etibarlı və əsas tərəfdaşıdır. Qarşıdan gələn qış və Rusiya ilə getdikcə daha radikal ziddiyyətlər fonunda onu sadəcə olaraq “köhnə dünya”nın xilaskarına çevirir. Azərbaycan Avropada səxavətli ölkə kimi uzunmüddətli xeyriyyəçi kimi bir sıra tarixi və mədəniyyət abidələrinin qorunması və bərpasında iştirak edib. Azərbaycanın vitse-prezidenti Mehriban Əliyeva YUNESKO-nun səfiri kimi bu təşkilatın parlaq nümunəsi və simvoludur. O, eyni zamanda Fransanın Fəxri Legion ordeni ilə təltif edilib.İndi belə bir ölkə ağır artilleriya və dronlarla Ermənistanı “ütüləyirsə”, onun qarşısını kim ala bilər? Avropa bu gün özünə sadəcə bir sadə sual verməlidir. Və mümkün qədər dürüst cavab verməyə çalışmalıdır. Azərbaycan kimdir?. Bizim qanımız Avropa üçün həmişə Abşeron neftindən ucuz olub, xüsusən də Britaniyanın bir meqakorporasiyası üçün”. Digər erməni media mənbələrində də ölkənin diplomatiya sahəsində Azərbaycana məğlubiyyəti eiraf edilir: “Etiraf edək ki, hadisədən dərhal sonra Ermənistan lazımi yerə üz tutub, müraciət etdi. Amma gördüyünüz kimi, biz heç kimə lazım deyilik və heç kim Azərbaycanı həqiqətən qınamır. Biz bu dünyada təkik. Nə Rusiya, nə Fransa, nə də ABŞ bizim dostumuzdur. Bunu beynimizə həkk edib gen və ana südü ilə övladlarımıza ötürməyin vaxtıdır”. Ermənistanın KTMT ümidlərinin əbəs olduğunu Qazaxıstanın xarici işlər naziri, baş nazirin müavini Muxtar Tleuberdi də təsdiq edib: “Azərbaycanla Ermənistan arasında delimitasiya olmadığı üçün sərhəd pozuntusundan bəhs etmək çətindir”. “Qazaxıstan Ermənistana öz sülhməramlılarını göndərəcəkmi?” sualına cavabında nazir deyib: “Yox. Hələ gündəlikdə belə bir məsələ yoxdur”. O, sentyabrın 13-də KTMT-yə üzv dövlətlərin Azərbaycan-Ermənistan sərhədində vəziyyəti müzakirə etmək üçün növbədənkənar iclasının keçirildiyini xatırladıb. Nazir əlavə edib ki, hazırda əsas məsələ Azərbaycanla Ermənistan arasında sərhədlərin delimitasiya və demarkasiyası üzrə birgə komissiyanın işinin bərpasıdır: “Ümumiyyələ, Azərbaycanla Ermənistan arasında delimitasiya və demarkasiya olunmadığı üçün sərhəd pozuntusundan bəhs etmək çətindir. Qazaxıstan sərhədin müəyyənləşdirilməsi üzrə təcrübəsini bölüşməyə hazırdır. Biz Rusiya istisna olmaqla bütün qonşu dövlətlərlə sərhədlərimizi müəyyənləşdirmişik. Rusiya ilə bu istiqamətdə razılaşma 2-3 il davam edə bilər”. Belarus Təhlükəsizlik Şurasının dövlət katibi Aleksandr Volfoviç ölkəsinin Ermənistanla Azərbaycan arasında məsələlərin alternativsiz, yalnız siyasi və diplomatik üsullarla sülh yolu ilə həllindən çıxış etdiyini diqqətə çatdırıb.Onun sözlərinə görə, KTMT-nin Kollektiv Təhlükəsizlik Şurasının növbədənkənar iclasında Azərbaycan-Ermənistan sərhədindəki vəziyyəti təhlil etmək üçün işçi qrup yaratmağı təklif edilib.
Ermənistanın KTMT və Rusiyadan əlinin üzülməsi fonunda bu ölkənin Azərbaycanın şərtləri ilə sülh müqaviləsinə razılıq verəcəyi istisna edilmir. Çünki daha Ermənistanın xarici himayədarı yoxdur. Türkiyəli tanınmış ekspert Abdullah Ağar “axar.az” portalına açıqlamasında Ermənistanın yalnız duruma düşməsini təsadüf hesab etmir. Onun sözlərinə görə, Azərbaycanın mövqeyi tamamilə haqlıdır: “Ermənistan Azərbaycanın beynəlxalq aləm tərəfindən tanınmış sərhədlərində təxribat törədir, delimitasiya üçün nə Rusiyanın əlindəki xəritələri, nə də digər sənədləri qəbul edir, əksinə, sözügedən ərazilərdə bir sıra giriş nöqtələri əldə etmək istəyir. İrəvanın 10 noyabr bəyanatına əməl etməməsi, rus sülhməramlılarının müvəqqəti yerləşdirildiyi ərazilərdə etnoqrafiq və topoqrafik intriqalar çevirməsi, müttəfiqlərinə Bakı ilə bağlı mütəmadi şəkildə yalan məlumatlar verməsi, onları qızışdırması və son olaraq sərgilədiyi təcavüzkarlıq güclü Azərbaycan Ordusunun hazırki beynəlxalq hüquqa uyğun və adekvat cavabını doğurdu. Azərbaycan Silahlı Qüvvələri mənsub olduğu ölkənin sərhədlərini, mövqelərini, əhalisini və gələcəyini qoruyur. Azərbaycan təcavüzkar Ermənistanla qarşı-qarşıyadır və buna uyğun cavab verdiyi üçün İrəvan indi ağlaşma qurub. Burada “oğru elə bağırdı, doğrunun bağrı yarıldı” məsəli yada düşür. Ermənistan məğlub olduğu 44 günlük müharibənin stresini üstündən ata bilmir, Paşinyanın imzaladığı 10 noyabr bəyanatı kobud şəkildə pozulur, Qarabağdan erməni əsgərləri çıxarılmır və davamlı olaraq təxribatlar baş verir. Bütün bunlara Azərbaycan da hüquqauyğun və adekvat formada cavab verir. Baş verən budur və heç kimin Azərbaycanı ittiham etməyə haqqı yoxdur”.
Tahir TAĞIYEV
