Prezident Vladimir Putin KTMT (Kollektiv Təhlükəsizlik Müqaviləsi Təşkilatı) Şurasına Rusiyanın Ermənistan və Azərbaycan sərhədində deeskalasiya ilə bağlı addımları barədə məlumat verib. Bu barədə Rusiyanın rəsmi media resursları məlumat yayıb . KTMT katibliyindən bildiriblər ki,
Vladimir Putin Rusiya tərəfinin yaranmış gərginliyin azaldılmasına yönəlmiş əlavə praktiki addımları barədə XTK üzvlərinə məlumat çatdırıb.
KTMT Şurasının hazırkı iclası növbədənkənardır və İrəvanla Bakı arasında gərginlik yarandığı üçün Ermənistanın xahişi ilə çağırılıb. Bundan əvvəl Kremlin sözçüsü Dmitri Peskov Putinin KTMT sammitində iştirak etdiyini bildirmişdi.
Maraqlıdı, Putin “əlavə praktik tədbirlər” deyəndə nələri nəzərdə tutub?
Politoloq Rəşad Bayramov “Bakı-Xəbər”ə açıqlamasında bildirdi ki, əslində, Rusiyanın bundan sonra nə addım atmaq istədiyi bəllidir: “KTMT-də aparılan müzakirələrdə bunun şahidi olduq. Bir qədər dəqiq ifadə etsək, KTMT deyəndə biz Rusiyanı başa düşməliyik. Qurumun son iclasının yekun bəyanatında bildirilir ki, Zasın başçılıq etdiyi missiyaya KTMT birləşmiş Qərargahının rəisi Anatoli Sidorov və üzv dövlətlərin nümayəndələri daxil edilib.
KTMT həmçinin Rusiyanın Ermənistan-Azərbaycan sərhədində vəziyyəti sabitləşdirmək üçün səylərini tam dəstəkləyib. Təşkilat KTMT-nin məsuliyyət zonasında olan ərazilərdə vəziyyətin monitorinqi üçün işçi qrupun yaradılması barədə razılığa gəlib.
Ermənistan müharibə zamanı da, müharibədən sonrakı təxribatlarında da dərhal KTMT-yə müraciət etməyə öyrəncəlidir. Paşinyan hakimiyyəti Kremlin KTMT üzərindən verdiyi Qazaxıstan qərarının bütün üzv dövlətlərin tələbi ilə təkrarlana biləcəyini düşünürdü. Bundan sonra dərhal da Azərbaycan-Ermənistan sərhəd bölgəsində silahlı təxribatlara başladı. Azərbaycan Ordusu bu təxribatlara yenə sərt cavab verdi. Ermənistan isə yenə ümidini KTMT-nın hərbi dəstəyinə bağladı. Ancaq KTMT rəsmi İrəvanın ümidlərinə adekvat reaksiya vermədi. Əksinə, bu qurumdan verilən açıqlamalarda Azərbaycan-Ermənistan sərhəd bölgəsində yaranmış gərgin vəziyyətin iki ölkə arasında danışıqlar yolu ilə həll edilməsinin vacibliyi vurğulandı. Putin bu dəfə də Paşinyanın arzusunu ürəyində qoydu. Rusiya Qərbin təsirində olan Paşinyana imkan vermir ki, o, anti-Rusiya qüvvələrini prosesə cəlb etsin. Strasburqdakı görüşdən sonra Rusiya rəsmən bəyan etdi ki, Aİ-nin vasitəçilik səylərini qəbul etmir. Rusiya Aİ-nin prosesə müdaxiləsini özünün Cənubi Qafqazdan sıxışdırılması cəhdi kimi qəbul edir. Ona görə də vasitəçilik missiyasında da özünə şərik görmək istəmir. Qarabağ ərazisinə nəzarəti sülhmıramlılar vasitəsi ilə bərpa edib. Qalır iki ölkə arasındakı sərhəd. Bura da nəzarəti KTMT-nin missiyası vasitəsilə təmin etmək istəyir ki, Qərb bu regiondan gözünü birdəfəlik çəksin. Bilirsiniz ki, Paşinyan dəfələrlə təklif edib ki, sərhəddə Rusiyanın təmsil olunmadığı beynəlxalq sülhməramlı qüvvələr yerləşdirilsin. Bu cür addımlarla Putin demək istəyir ki, sözügedən region hələ də onun təsir dairəsindəndir və tərəflər özlərinə başqa barışdırıcı axtarmasınlar. KTMT-nin bu dəfə prosesə bir qədər həssas yanaşması da bu amillə bsğlıdır”.
Məhəmmədəli QƏRİBLİ
