Sentyabrın 12-si gecə saatlarından başlayaraq Azərbaycanın Ermənistanla Laçın, Kəlbəcər və Daşkəsən istiqamətindəki dövlət sərhədlərində vəziyyət gərgindir və silahlı qarşıdurma baş verməkdədir.
Azərbaycan Müdafiə nazirliyinin yaydığı rəsmi məlumatda bildirilir ki, Ermənistanın təxribatları nəticəsində baş verən şiddətli atışmalarda hər iki tərəfdən itkilər var. Ermənistan qaynaqlarının yaydığı xəbərlərdə isə iddia olunur ki, guya Azərbaycan tərəfi hücuma keçib və Ermənistanın sərhəd kəndləri toplardan və minomyotlardan atəşə tutulur...
Müdafiə nazirliyimizin xəbərlərində isə deyilir: "Ermənistan silahlı qüvvələrinin diversiya qrupları sutkanın qaranlıq vaxtında ərazinin dağlıq relyefi və mövcud dərə boşluqlarını istifadə edərək müxtəlif istiqamətlərdə Azərbaycan Ordusunun bölmələrinin mövqeləri arasındakı əraziləri və təminat yollarının minalanmasını həyata keçirib.
Bu əməllərin qarşısının dərhal alınması məqsədilə bölmələrimiz tərəfindən görülən təxirəsalınmaz tədbirlər nəticəsində döyüş toqquşması baş verib.
Ermənistan silahlı qüvvələrinin Basarkeçər, İstisu, Qarakilsə və Gorus yaşayış məntəqələri istiqamətində yerləşən bölmələri tərəfindən Azərbaycan Ordusunun Daşkəsən, Kəlbəcər və Laçın rayonları ərazisindəki bəzi mövqeləri, sığınacaqlar və dayaq məntəqələri müxtəlif çaplı silahlar, o cümlədən minaatanlardan intensiv atəşə tutulub. Nəticədə şəxsi heyət arasında itkilər var, hərbi infrastruktura ziyan dəyib.
Ermənistan silahlı qüvvələrinin təxribatının və ölkəmizin ərazisinə və suverenliyinə qarşı hərbi təhlükələrin qarşısının alınması, hərbi qulluqçularımızın, o cümlədən Kəlbəcər və Laçın rayonları ərazisində infrastruktur işlərinə cəlb olunmuş mülki işçilərin təhlükəsizliyinin təmin edilməsi məqsədilə Azərbaycan Ordusunun bu istiqamətdə dislokasiya olunan bölmələri tərəfindən qəti cavab tədbirləri görülür.
Ermənistan silahlı qüvvələrinin atəş nöqtələrinin susdurulması və döyüş toqquşmasının miqyasının genişlənməsinin qarşısının alınması məqsədilə zəruri tədbirlər görülür.
Təxribat əməliyyatlarına cəlb olunmuş Ermənistan silahlı qüvvələrinin canlı qüvvəsi və döyüş texnikası sırasında itkilər var".
Görünən budur ki, Ermənistanın siyasi-hərbi rəhbərliyi bu kimi hərbi avantüralarla qəsdən regionda vəziyyəti gərginləşdirmək, sülh müqaviləsi üzrə danışıqların baş tutmasını pozmaq, 10 noyabr 2020-ci tarixli üçtərəfli bəyanat üzrə öhdəliklərini yerinə yetirməmək, Azərbaycanın Qarabağ və Şərqi Zəngəzurda apardığı tikinti-quruculuq layihələrini ləngitmək, Ermənistan əhalisini və beynəlxalq ictimaiyyəti çaşdırmaq kimi məqsədlər güdür.
Müdafiə nazirliyinin də qeyd etdiyi kimi, hazırda yaranmış vəziyyətə görə bütün məsuliyyət Ermənistanın hərbi-siyasi rəhbərliyinin üzərinə düşür!
Hərbi-siyasi ekspert, ehtiyatda olan polkovnik-leytenant Daşdəmir Əliyev “Bakı-Xəbər”ə açıqlamasında bildirdi ki, son döyüşlərdə şəhid olan bütün hərbçilərimizə Allahdan rəhmət diləyir: “Bunlar bizim üçün ağır itkidir. Bunula bərabər, onlar bizim qürur mənbəyimizdir. Ermənistanın bu təxribatının baş verdiyi dönəmə fikir versək, çox mətləblərə aydınlıq gətirilər. Bir müddət əvvəl Avropanın vasitəçiliyi ilə ölkə başçıları arasında görüş keçirildi. Həmin görüşdə biz Prezident səviyyəsində öz mövqeyimizi 5 bənddən ibarət şərtlərlə təqdim etdik. Ermənistan bundan əvvəlki görüşdə də həmin şərtlərlə razı olduğunu bəyan etmişdi. Lakin hər dəfə müxtəlif bəhanələrlə bundan boyun qaçırır. Bütün bəhanələr sülh sazişini imzalamaqdan yayınmağa yönəlib. Biz nəzərə almalıyıq ki, Ermənistan ölkə rəhbərliyi səviyyəsində deyil, kilsə və diasporun təzyiqi ilə idarə edilir. Baş nazirin verdiyi bütün sözlər kağız üzərində qalır. Bizim əlaqədar qurumlarda düşmənin hərəkətlənməsi haqda məlumatlar vardı. Düşmənin belə hiyləgər davranışları isə çox da gözlənilmirdi. Onlar gizli şəkildə ərazilərimizi minalamaq istəyiblər. Şəhidlərimizin qanı yerdə qalmadı. Biz düşmənin canlı qüvvəsini 5 qat artıq sayda məhv etmişik. Ermənilər bütün bu addımları planlı ediblər. Əvvəldən hətta buna informasiya zəmini də hazırlayıblar. Ermənistanın bu cür ziqzaqlı davranışları heç nəyi dəyişməyəcək. Lazım gəlsə belə lokal əməliyyatlarla biz Ermənistanı sülhə məcbur edəcəyik. Biz öz ordumuzun potensialını bilirik və ona güvənirik. Qarşıdan gələn Şanxay görüşündə bu məsələ bir daha müzakirə ediləcək. Görünür, Ermənistan “dəmir yumruğun” təsirini unudan kimi belə addımlar atır. Onların etdiyi bu təxribat bütün dünyaya bir daha sübut etdi ki, Ermənistan bölgədə sülhün bərqərar olmasını istəmir. Yenə də Paşinyan dünya liderlərinə zəng vurub yalvarır. Bunu etməkdənsə, yaxşı olardı ki, sülh müqaviləsi imzalayıb, sərhədlərin toxunulmazlığı qarşılıqlı şəkildə tanımağı təmin etsin. Bu öhdəlikləri Paşinyan imzası ilə öz üzərinə götürüb. Könüllü etməyəcəksə, biz onları bu addımı atmağa məcbur edəcətik”.
Məhəmmədəli QƏRİBLİ
